VRAAG

My pasgeborene het ná geboorte ’n naeltjiebreuk opgedoen. Moet ek bekommerd wees? Moet ek my kind pediater toe neem?

DR. MARETHA COMBRINK ANTWOORD:

’n Mens sien gewoonlik ’n naeltjiebreuk of umbilikale hernia in die vorm van ’n swelling om ’n baba se naeltjie. Dit kan vergroot met inspanning, soos wanneer hy huil, hoes of hardlywig is. Dis taamlik algemeen en kom by 15 tot 23 persent van babas voor.

Terwyl jy swanger is, ontwikkel die middeldeel van die embrio se derm buite sy lyf. In die tweede trimester keer dit terug na die buikholte. 

Daarna ontwikkel die weefsel wat die dermkanaal in plek hou. 

Oorsake van naeltjiebreuke is aangebore of verworwe. Eersgenoemde beteken daar was fout met die ontwikkeling van die naeltjie, en laasgenoemde is gewoonlik te wyte aan verhoogde druk in die buikholte, soos wanneer ’n baba baie hoes of hardlywig is.

Breuke wat voor die ouderdom van ses maande teenwoordig is, verdwyn in 80 persent van gevalle vanself teen een of twee jaar oud. Groter breuke het meer tyd nodig, maar sluit meestal tussen vyf tot ses jaar oud.

Soos met alle operasies kan komplikasies ontstaan as die dokter besluit om die naeltjiebreuk chirurgies te herstel. 

Raadpleeg jou dokter as die breuk baie geswel lyk, duidelik pynlik is, as jou baba se maag swel of as dit hom laat opgooi.

Die dokter sal jou in die volgende gevalle na ’n chirurg verwys:

  • As die breukpoort (gaping) groter as 2 cm is;
  • As die breuk ’n “olifantslurp”-voorkoms het;
  • As dit nie vanself teen vyf of ses jaar oud verdwyn het nie;
  • As dit derm- of ander weefsel vasknyp; of
  • As dit ná jou kind se eerste of tweede verjaardag vergroot.