Vraag

My peuter het ’n kwaai uitslag op dele van haar lyf. Veral haar arms en die waaie van haar bene is jeukerig en rooi en sy krap daaraan. Ek voel jammer vir haar. Watter produkte of stappe kan ek beproef om van die uitslag ontslae te raak?

Maretha Combrink, pediater, antwoord

Atopiese dermatitis, oftewel ekseem, is ’n algemene, chroniese, inflammatoriese veltoestand. Dit tas sowat een uit elke vyf Wes-Europese kinders aan en het ’n groot invloed op hul lewensgehalte omdat dit hul daaglikse aktiwiteite en maatskaplik-sielkundige funksionering beperk. By Suid-Afrikaanse kinders is die voorkoms sowat 17 persent. Dit word gediagnoseer as kinders se vel jeuk en drie of meer van die volgende faktore teenwoordig is:

  • ’n Sigbare veluitslag in die velvoue of fleksure (bv. onder die arms, in die waai van die arms of agter die knieë), of ’n uitslag op die wange en ekstensoroppervlaktes (vel aan die buitekant van gewrigte) by kinders jonger as 18 maande.
  • ’n Geskiedenis van ’n veluitslag in die velvoue of fleksure, of op die wange en ekstensoroppervlaktes by kinders jonger as 18 maande.
  • ’n Geskiedenis van ’n droë vel in die afgelope 12 maande.
  • ’n Geskiedenis van asma, hooikoors, ekseem of kosallergie by ’n nabye familielid in die geval van kinders onder vier.
  • Verskyning van simptome voor die ouderdom van twee jaar (mits die kind nou al vier jaar of ouer is). Die behandeling van ekseem is gemik op verbetering van simptome en langtermynbeheer van die toestand.

Die behandeling moet altyd aangepas word volgens die graad van die ekseem. Die benadering bestaan uit verskeie stappe:

  • Vermy faktore wat simptome kan aanhits, soos chemikalieë of troeteldiere.
  • Bevogtig die vel gereeld om die genesing van beskermende buitenste vellaag aan te moedig.
  • Gebruik ’n voorskrifsalf wat ontsteking teenwerk, soos kortikosteroïede. In ernstige gevalle waar die behandeling nie werk nie, sal ligterapie of middels wat die immuunstelsel onderdruk (kalsineurieninhibitore), oorweeg word.