VRAAG:

My baba van sewe maande bly aan haar oortjie vat. Daar is ook baie was in daardie oor. Moet ek eerder pediater toe? Watter simptome dui op oorontsteking en waardeur word dit veroorsaak?

ANTWOORD:

Dr. Maretha Combrink antwoord: Oorinfeksie (otitis media) kan gepaard gaan met die simptome van ’n boonstelugweg-infeksie soos ’n loopneus en koors.

Jou baba kan haar aptyt verloor en ook buitengewoon huilerig wees, veral wanneer sy neergelê word. Groter kinders kan lomp of van balans af voorkom wanneer hulle loop of hardloop.

Die infeksie kan ’n virus- of bakteriese oorsprong hê. Tydens infektiewe of selfs allergiese episodes kan die buis van Eustachius, wat die middeloor met die neus- en mondholte verbind, opswel en verstop. Dit kan vog agter die middeloor laat opbou, wat pyn en infeksie veroorsaak. As die druk baie hoog opbou, kan ’n gaatjie in die trommelvlies ontstaan en waterige of etterige vog kan by die oor uitloop.

By babas en kleuters is die buis van Eustachius korter en meer horisontaal as by volwassenes. Dit – en omdat hulle vir langer tye lê as volwassenes – is waarom oorinfeksie meer algemeen by babas is.

As jy vermoed dat jou baba ’n oorinfeksie het, is dit belangrik om dokter toe te gaan sodat die diagnose bevestig kan word. Medikasie sluit ’n pynverligtingsmiddel in. As die sondaar ’n bakterie is, sal antibiotika ook voorgeskryf word. In gevalle van herhaaldelike oorinfeksie sal die mening van ’n oor-neus-keel-arts van waarde wees om te help besluit of ventilasiebuisies (grommets) nodig is. 

E-pos jou vrae na yolandi@babaenkleuter.co.za.

Vrae kan ongelukkig nie persoonlik beantwoord word nie.