Vraag:

Watter aktiwiteite kan ek met my kleuter doen om sy fyn spiertjies oefening te gee?

Antwoord:

Lizanne du Plessis antwoord: Fyn motoriese spierontwikkeling maak dit vir jou kleintjie moontlik om hom self te voer, sy klere aan te trek, sy pop se hare te vleg en ’n potlood vas te hou.

Dis kommerwekkend dat die fyn motoriese ontwikkeling van ál meer kleuters nie op standaard is nie. Daar is verskeie redes voor, maar die grootste is waarskynlik dat kinders nie genoeg speel nie en te veel tyd voor skerms deurbring.

Jou kleuter word nie gebore met die vermoë om ’n knoop vas te maak of ’n potlood vas te hou nie.

Fyn motoriese spiere ontwikkel met verloop van tyd, maar dit is nooit te vroeg om kleuters aan speletjies bloot te stel wat dié vaardighede ontwikkel nie.

Sit genoeg tyd vir speel opsy. Moedig jou kleuter aan om te klim en te klouter, te spring, te gly, te swaai, te hang en te kruip. Speel met sand, water, modder, skeerroom en klei.

So leer jou kleuter om sy lyfie regop te hou, sy skouers word sterk, hy word vaardig in die gebruik van albei kante van sy liggaam en mettertyd ontwikkel sy fyn motoriese spiere.

Hier is ’n paar idees vir speletjies by die huis wat fyn motoriese spierontwikkeling sal aanmoedig

  • Maak ’n plastiekspuitbottel vol water en moedig jou kleuter aan om die potplante nat te spuit.
  • Tel klein voorwerpe op met plastiektangetjies (tweezers). Tel tosseltjies, plastiekdiere of pennetjies op en laat dit in ’n bak val.
  • Frommel stukkies papier in balletjies, tel dit met ’n wasgoedpennetjie op en gooi dit in ’n houer.
  • Suig water of gekleurde verf op met ’n medisynedrupper en laat dit op ’n stuk papier drup. Wanneer jou kleuter al die bogenoemde items – die spuitbottel, knypertang, wasgoedpennetjies en medisynedrupper – met gemak kan gebruik, is die tyd reg om met ’n skêr te begin knip. ’n Klein skêrtjie met ronde punte is ideaal vir klein handjies. Wanneer kleuters knip, ontwikkel hulle belangrike vaardighede wat die voorlopers is van potloodbeheer. Knip strooitjies, klei wat in slangetjies gerol is, karton en watte. Maak fyn motoriese speletjies pret en mettertyd sal jy sien hoe jou kleuter vaardig word en dit bemeester.