Hoe jy jou kleuter se skaam stadium bestuur is belangrik, want baie emosionele boustene word in die kleuterjare gelê. Kleuters moet leer om hul skaamheid met onafhanklikheid te vervang.

’n Mens moet nou versigtig wees om jou kind nie nóg skamer te maak nie. As jy jou skaam omdat sy take nie bemeester nie of onaanvaarbaar voor ander optree, voel sy jou verleentheid aan en word sy net meer teruggetrokke.

Dit kan ’n bose kringloop word waarin sy ál meer blootgestel voel. ’n Bietjie insig in hoe die wêreld uit haar oogpunt lyk, kan jou help om die stadium met meer empatie te benader.

Weifelende held

Kinders jonger as drie weet nie dat hulle dinge op hul eie kan bemeester nie. Maar daarna raak hulle stelselmatig bewus van dinge wat hulle self kan doen.

Dis dán dat daar ’n tweestryd in haar klein koppie begin woed: Aan die een kant wil sy sélf, maar aan die ander kant twyfel sy of sy dit sal regkry.

As jy jou kind nou ontmoedig, word sy skaam oor haar vermoëns en begin ’n lae selfbeeld ontwikkel. Dit kan vir sommige ouers moeilik wees, want jou kind kan soms hardkoppig wees en iets beproef wat jy voor jou siel weet nie suksesvol gaan wees nie.

Maar dis dan dat jy soms op jou onderlip moet byt en jou kind moet laat begaan. As jy elke keer take uit haar hande neem, gaan sy mettertyd in opstand kom of moed verloor.

Sommige kleuters onderdruk hierdie rebellie, maar dit kan later in die tienerjare onverwags uitbars. Laat jou kind dus eers self probeer. En as sy misluk, vra of jy maar kan help. In dié proses behou sy beheer en kan sy kies of sy hulp nodig het of nie.

Wil van haar eie

Jou kleuter gaan iewers tussen die ouderdom van twee en vier daarop begin aandring om self te bad, te eet, haar klere te kies, hare te kam en self die toilet te gebruik.

As jy haar ontmoedig en elke keer dié take vir haar verrig, leer sy om aan haarself te twyfel. Kinders moet ook in hierdie tyd begin om in hul eie kamer te slaap. Jou kind word nou van haarself bewus as ’n aparte identiteit en sy is besig om haar eie wil te ontwikkel.

Moet dus nie skrik as sy af en toe besluit om hierdie wil af te dwing nie. Moet haar ook nie probeer “inbreek” nie, want al is dit nou moeilik om te glo, is haar eiewilligheid eintlik deel van ’n belangrike ontwikkelingsfase.

As dit nie kans gegee word om te ontluik en te ontwikkel nie, word sy iemand wat later geneig is om te twyfel. Die beste ding wat jy in hierdie stadium kan doen is om jou kind keuses te gee – dit is ook ’n wonderlike manier om dissipline toe te pas.

DÍS HOE JY JOU KIND HELP


Wees ’n rolmodel As jy selfversekerd optree wanneer jy met ander mense kommunikeer – selfs in jou alledaagse doen en late soos met winkelkassiere, oor die telefoon en met jou vriende – gaan sy die een of ander tyd jou voorbeeld wil volg.

Maak oogkontak wanneer jy met vreemdelinge praat. Ken jou kind Leer jou kind se gedrag in sekere situasies ken en word bewus van omstandighede waarin sy skamer is as ander kere. Sodra jy verstaan wat haar angstig maak, kan julle daaroor begin gesels en saam daaraan werk om dit te oorkom. Onthou, jy kan nie jou drome deur jou kind leef nie. ’n Kind wat onder druk voel om te presteer, kan terugtrek juis omdat sy bang is vir mislukking en om jou teleur te stel.

Aanhouer wen Laat jou kleuter oefen hoe om in moeilike situasies op te tree. Dit sal haar gewoond maak aan die situasies wat haar angstig maak. Sy dink dalk dis simpel om te oefen hoe om mense by ’n verjaardagpartytjie te groet, maar dit sal haar meer selfversekerd laat voel. ’n Ander oplossing is om te gesels oor haar moontlike vrese by ’n plek en dan saam aan oplossings vir elkeen van dié probleme te dink. Neem kennis van haar vrese deur te sê dat dit normaal is om ’n bietjie bang te voel as ’n mens nuwe mense ontmoet. As jy haar gevoelens in ag neem, sal jy haar al klaar ’n goeie skoot selfvertroue toedien.

Moenie ’n bordjie om haar nek hang nie Jou kind is dalk glad nie skaam of teruggetrokke nie, maar as jy heeltyd vir ander vertel sy is, begin sy dit self glo. Probeer ’n slag iets baie positiefs oor haar sê terwyl jy weet sy kan jou hoor. Laat sy hoor hoe jy vir jou maat vertel hoe oulik sy vandag met iemand gesels het ...

Betrek jou kind Maak jou kind deel van sekere besluite en om probleme in haar lewe te hanteer. ’n Maatjie maak haar dalk seer by die skool of is aanhoudend lelik met haar.Betrek haar as julle ’n oplossing vir dié probleem bedink. Moenie outokraties namens jou kind besluit nie.

Moenie jou kind oorheers nie As sy in dié stadium deur haar ouers oorheers word, sal sy in haar volwasse lewe ’n drang hê om verhoudings te oorheers. Gee oneindig baie liefde As jy haar aan die ander kant min liefde gee en sy voel onsigbaar, sal sy as grootmens emosioneel hewig reageer as sy dink sy word geïgnoreer.