Kan jy nog onthou hoe jy met hout- en ander legkaarte gespeel het toe jy klein was? Daar is ’n hele boel goeie redes waarom dié speelgoed die toets van die tyd deurstaan het. Hier is vyf redes waarom jy beslis in legkaarte vir jou peuter moet belê.

Dit bou konsentrasie

Omdat ’n legkaart selfs in sy eenvoudigste vorm denke vereis, dwing dit jou peuter om sy denke te fokus op die taak waarmee hy besig is. Dit sal sorg dat hy vir kort rukkies aaneen fyn begin konsentreer, en so help dit hom om te leer.

Dit leer hom fyn kyk

Ten einde ’n legkaart te voltooi moet jou kind elke stukkie baie fyn van naderby bestudeer. So kan hy uitwerk of die stukkie in sy hand wel in die beskikbare gaatjie pas. Hierdie soort visuele fokus is ’n noodsaaklike leesvaardigheid wat reeds van kleins af baie goed geslyp moet word.

Hy leer oriëntasie

’n Legkaartstuk sal net pas wanneer dit met die regte kant na bo op sy plekkie geplaas word. As jou kind dit onderstebo neersit, sal dit eenvoudig nie pas nie. Dit leer jou peuter dat beelde en voorwerpe ’n spesifieke oriëntasie het, wat ’n belangrike vaardigheid is wanneer hy as ouer kind moet begin leer skryf. Dit help ook later met somme.

Sy begrip neem toe

Legkaart-voltooiing kan jou kleinding ’n hele paar ingewikkelde konsepte help uitwerk wat betref getalle, vorms, kleure, letters en selfs seisoene – danksy die prentjies of tonele op die legkaart. Omdat jou peuter aan al hierdie inligting blootgestel word terwyl hy speel, brei sy begrip van die wêreld om hom uit, asook sy algemene kennis.

Sy selfbeeld kry ’n hupstoot

Die hele punt van ’n legkaart bou is dat jy al die individuele stukkies bymekaar moet voeg om ’n prentjie te vorm. Die suksesvolle voltooiing van hierdie taak – en die feit dat jou peuter iets het om na te kyk wat sy sukses bevestig – help hom om goed oor homself te voel. Dit versterk sy selfvertroue en kan hom selfs aanmoedig om ander uitdagende take aan te pak. As jy die meeste uit jou kind se legkaartbouery wil haal, moet jy sorg dat die moeilikheidsgraad reg gemik word. As die legkaart te ingewikkeld is, sal jou kind waarskynlik belangstelling verloor en iets anders gaan soek om te doen. Begin met iets eenvoudigs en vorder dan na moeiliker legkaarte namate sy vaardigheid toeneem. So verseker jy dat hy altyd nog ’n legkaart sal wil bou. 

Maak legkaart bou maklik
  • Plaas al die stukkies op ’n tafel met die prentjies na bo sodat jou peuter ’n idee van die groter prent kry
  • Leer jou peuter om eers die hoekies uit te soek en daarna die kantstukkies te pas. So ontwikkel hy ’n sin vir strategiese denke.
  • Wanneer jou kleinding vashaak, kan jy voorstelle maak soos: “Wat as jy die stukkie omdraai?” sonder dat jy dit vir hom doen.
  • Laat jou kleinding altyd die laaste stukkie van die legkaart self inglip. Dan kan jy hom vir ’n knap stukkie werk prys!

Raakgekoop

Koop Laugh & Learn se mini-klavier by vooraanstaande winkels landswyd, soos Babies R Us en Toyzone, R399,99.

Laugh & Learn