VRAAG:

My kleuter is vier jaar oud. Ek het gedink skeidingsangs kom net by babas voor, maar sy klou soos ’n apie aan my wanneer ek haar soggens by die skool moet los. Hoe moet ek dit hanteer?

LIZANNE DU PLESSIS ANTWOORD:

Skeidingsangs maak deel uit van normale emosionele ontwikkeling en kan so vroeg as ses maande kop uitsteek. Vir die meeste kinders is dit die ergste teen 18 maande en neem dit teen twee jaar oud af. Alle kinders ervaar skeiding verskillend – op watter ouderdom en vir hoe lank kinders dit het, hang af van hul temperament, die ervarings waaraan hulle blootgestel word en hoe die angs hanteer word. Kinders met ’n sensitiewe temperament is geneig om skeidingsangs intens en vir langer rukke aaneen te ervaar.

Al is dit normaal, is dit glad nie lekker om jou kind so te los nie. Met verloop van tyd behoort jou kind se angs egter te verminder as jy die wenke hieronder beproef. Gesels ook met jou kind se juffrou om die planne te implementeer.

  • Besluit op totsiens- en ontmoetingstrategieë wat julle elke dag op dieselfde manier uitvoer. Die voorspelbaarheid sal jou kleuter veilig laat voel en behoort haar angs mettertyd te laat afneem. Besluit byvoorbeeld dat jy gaan probeer om vroeg by die skool te wees, voor al die maatjies daar is en dit besig en raserig is. Stap saam met haar by die klas in en neem haar na ’n spesifieke plek en aktiwiteit wat haar interesseer. Jy kan haar ook na die juffrou toe neem, wat haar dan moet verwelkom en indien nodig paai. Sak op jou knieë, gee jou kind ’n drukkie en herinner haar dat jy haar later kom oplaai. Dit sal goed wees as die juffrou van hier af oorneem sodat jy kan omdraai en wegstap.
  • Dit is ook belangrik hoe jy jou kleuter agterna ontmoet. Probeer om nie laat te wees nie en vertel haar hoe bly jy is om haar te sien en hoe trots jy op haar is dat sy by die skool was terwyl jy weg was.
  • Gee haar ’n knuffeldiertjie of kombersie wat saam met haar kan slaap en saam met haar skool toe kan gaan.
  • Sommige kinders se visuele stelsel is baie sterk ontwikkel. Dalk sal dit vir jou dogtertjie help om te “sien” wat die afskeids- en ontmoetingsrituele is. Teken prentjies of neem foto’s van waar julle in die motor ry, waar sy op haar spesiale plekkie gaan sit, waar juffrou haar hand vashou, waar hulle vir jou waai, waar jy weer in jou motor ry en waar jy voor jou rekenaar sit en werk.
  • Vertel vir jou kleuter stories waar die diertjie en mamma geskei word, maar die ma altyd terugkeer.
  • Speel speletjies waar julle vir kort rukke van mekaar af weg is, soos om deur tonnels te kruip of wegkruipertjie te speel.

Klop gerus by ’n opvoedkundige sielkundige aan as die skeidingsangs nie mettertyd verbeter nie.