VRAAG:

My sewejarige kind het enurese. Daar is gelukkig deesdae oulike slaapbroekies wat sorg dat hy nie sy bed natmaak nie. Hoewel ons glad nie ’n groot ding daarvan maak nie, is die hele affêre vir hom vreeslik vernederend. Wat kan ek doen of sê om hom beter te laat voel?

ANTWOORD:

Madelein Koen antwoord: Wanneer ’n kind ouer as vyf hom meer as twee keer per week natmaak, word dit enurese genoem. As ’n kind ouer as vyf jaar is of skielik die bed begin natmaak, moet ’n mens eers seker maak dat daar nie ’n fisiologiese rede voor is nie, soos ’n urienweginfeksie of diabetes.

Enurese is baie algemeen en kan lei tot angs juis omdat kinders verneder voel.

Ondersteun jou kind so: Wees geduldig, want dit is nie jou kind se bedoeling om hom nat te maak nie. As jy geduld en begrip wys, dra jy die boodskap oor dat jy nie kwaad is nie en dat jy saam aan ’n plan wil werk.

Vermy dit om jou kind te straf of kwaad te word. Dit gaan nie die ongelukkies verminder nie. Onthou, jou kind het nie beheer daaroor nie. Straf sal bloot skade aan sy selfbeeld aanrig en die boodskap oordra dat hy iets moet doen om sy ouers se goedkeuring te kry.

Soms praat ouers nie oor die enurese nie. Dit laat ’n kind dink dat hy die enigste is wat daaraan ly. Stel hom gerus dat daar baie ander maats is wat dieselfde probleem het. Leer jou kind wat met sy lyf gebeur om hom van skuldgevoelens ontslae te help raak.

Verduidelik op ’n manier wat hy sal verstaan: “Jou lyfie moet nog leer om die boodskap te kry wanneer om wakker te word en badkamer toe te gaan. Dit sal gebeur wanneer jou lyfie gereed is”. Voer hierdie gesprek in die dag en nie nadat hy sy bed natgemaak het nie.

Maak jou kind deel van die oplossing. Neem hom saam dokter toe en laat hom self sy slaapbroekie aantrek. So werk julle saam aan ’n plan en voel hy hy het beheer oor die situasie. Dit sal sy gevoel van angs en vernedering verminder.