Jou vierjarige wil alles doen wat hy in sy wildste drome kan bedink en van stilsit is daar nog geen sprake nie. Tussen maats wil hy wees en hy sal maklik sy kosblik gooi dat dit daar trek en eerder gaan speel.

Die kans is baie goed dat as jy vir hom ’n perske en jogurt kleuterskool toe inpak, hy met ’n hand vol jellielekkers en ’n koekie in sy kosblik gaan terugkom. Hy wil graag sosiaal en in wees en kos by die skool uitruil is deel daarvan.

Maak seker dat elke maaltyd en peuselhappie gesonde kos bevat en sluit elke keer veral minstens een vrug of groentesoort in. Al ruil hy sy lemoen by die skool vir ’n malvalekker, weet jy minstens daar is vyf ander kere dat hy gesonde kos eet.

Om van binne en buite gesond te wees, het jou kind gesonde kos nodig, nie lekkernye en koeldrank nie.

Jou vierjarige se kos moet …

Hom gesond hou Met al die stoei- en kieliespeletjies met maatjies word kieme maklik uitgeruil. Maak seker jou kind se weermag is sterk genoeg om hom te verdedig. ’n Tekort aan vitamien A, B6, C, D, E en foliensuur sal sy weermag sonder skietgoed laat. Genoeg sink, yster, selenium, koper en proteïen gee sy weermag vegkrag. Die enigste manier om genoeg van al hierdie voedingstowwe in te kry, is deur ’n verskeidenheid gesonde kosse.

Voedingstowwe vir groei gee Jou vierjarige groei vinnig. Voor sy volgende verjaardag gaan hy sowat 2 kg aansit en 7 cm langer word. Daarvoor het hy genoeg kalsium, yster en proteïen nodig. Laevet-melk en -jogurt asook vleis, vis en hoender sal hierdie voedingstowwe verskaf.

Energie vir speel gee Hy is sowaar ’n bol energie en dalk het jy dit al oorweeg om hom uit te honger in die smagting na ’n tikkie rustigheid. Jou vierjarige het omtrent net soveel energie nodig uit kos as wat jy nodig het – en as hy baie besig is, selfs meer as jy. Maak seker hy kry genoeg volgraan-, lae-GI- (glisemiese indeks-) koolhidrate in en ook genoeg B-vitamiene, wat help om energie uit kos vir gebruik vry te stel. Kry dit in vars groente en vrugte, volgrane, melk, eiers en vleis.

Gesonde eetgewoontes leer Jou vierjarige moet sommer nou al leer om na sy magie te luister, om stadig te eet en sy kossies mooi fyn te kou. Hy moet ook leer om nie voor die televisie te eet nie, maar altyd aan tafel te sit wanneer hy eet. Leer hom om stil te sit aan tafel tot almal klaar geëet het en ook om mooi tafelmaniere te hê.

WAT JOU VIERJARIGE MIN OF MEER IN 'N DAG MOET EET
  • 6 halfkoppies stysel
  • 4 eetlepels vleis of vleisalternatiewe
  • 2 koppies laevet- of vetvrye melk
  • 5 middelslag-vrugte
  • 1½ koppies groente
  • 6 teelepels gesonde plantolies
  • 2 teelepels suiker of konfyt of 2 klein lekkertjies

Hoe kry jy die regte kos in jou vierjarige se lyfie?

1. Stel ’n voorbeeld.

2. Maak gesond eet pret.

3. Verduidelik wat gesonde kos vir sy lyfie doen.

4. Sing liedjies oor gesond eet.

5. Maak ’n groentetuin.

6. Moedig hom aan, maar moet nooit dwing of beloon nie.

Wat moet hy drink?

Jou vierjarige het omtrent ses glase vloeistof per dag nodig, vier glase skoon kraanwater en twee glase melk. Vermy water wat deur omgekeerde osmose gesuiwer is aangesien dit geen fluoried bevat nie en dus nadelig kan wees vir jou kind se tandjies.

Koeldrank en vrugtesap kan ook sy tandjies laat bederf en behoort daarom slegs per geleentheid gegee te word. Skaf liewer ’n gerieflike waterhouer aan waarin jou kind self water kan tap en laat hy self ’n waterbottel met sy gunsteling-karakter op in die winkel kies.

Jou vierjarige benodig elke dag:

  • 1 000 mg kalsium
  • 10 mg yster
  • 5 mg sink
  • 900 mg omega 3-vetsure (150-200 mg EPA + DHA)
  • 25 g vesel

HET JY GEWEET?

Kies vars, onverwerkte vleis, hoender en vis, vars melk, ongegeurde jogurt en vars vrugte en groente waar moontlik wanneer jy inkopies doen.

Kies min items wat in blikkies, pakkies en botteltjies is, aangesien hierdie verwerkte kosse baie sout en nitrate bevat wat kan bydra tot siektes soos hoë bloeddruk en kanker.

Spyskaart vir ’n vierjarige