book-icon Uitgawe Oktober & November 2018

10 reëls vir ’n gelukkige peuter

akkreditasie
Getty Images
Getty Images

Klein kindertjies het nog ’n baie kort geheuespan. As jy goeie gedrag wil versterk en swak gedrag wil voorkom, moet jy dus dadelik ná die gedrag reageer. Teen vanaand het sy al vergeet wat sy vanoggend aangevang het. Uitlatings soos “wag net tot jou pa vanaand by die huis kom” werp geen vrugte af nie. Teen daardie tyd het die kind al vergeet wat sy verkeerd – of reg – gedoen het. Dis ook nie lekker vir pa om by die huis te kom en mnr. Kwaai te moet wees nie. Sekere optredes – soos wanneer ’n peuter haar eie lewe in gevaar gestel het – moet drasties aangepak word.

As jy jou reëls gemaak het, moet jy hulle deurlopend toepas. ’n Reël kan nie een dag geld en die volgende dag nie – dit maak kinders net deurmekaar en dan weet hulle regtig nie wat van hulle verwag word nie. Dis moeilik om konsekwent te wees, want ’n mens is soms moeg en wil jouself ’n bietjie “af” gee deur effens slapper te wees, maar jy pluk vir jou ’n lat… As reëls nie konsekwent toegepas word nie, sal die kleingoed aanhoudend die grense wil toets, wat jou net nog meer gaan uitput. Op die duur verloop sake baie rustiger en kalmer as jy altyd by die reëls hou, veral as dit by straf kom. As jou kind goed weet wat die straf vir ’n oortreding is en dit word konsekwent toegepas, verg dit baie minder emosie van die ouer. Jy hoef nie kwaad te word nie. Wys jou kind daarop dat hy oortree, waarsku, en as hy aanhou, word die voorspelbare straf opgelê. Jy weet wat kom, hy weet wat kom, en niemand skrik vir mekaar nie. As jy konsekwent is, sal die swak gedrag sommer vinnig verbeter.

Maak seker jou kind weet wat is aanvaarbare gedrag en wat nie. Praat gereeld oor die grense, verduidelik hoekom dinge so werk, gee jou kind die geleentheid om vrae te vra… maar moenie onderhandel nie. Jy is die baas van die huis en dit gee jou kind ’n sin van veiligheid, vertroue en regverdigheid om dit te weet. Die motief agter die grense wat jy daarstel, is liefde. Kinders wat nie weet wat van hulle verwag word nie, kan baie angstig raak. Kinders hou nie van onvoorspelbaarheid nie. As jy grense stel, leer jou kind wat jul gesin se waardes is en dit word deel van sy identiteit. Die grense hang ook nie af van jou emosies op ’n bepaalde tydstip nie – die grense is altyd dieselfde. Wraak en woede behoort nooit deel uit te maak van die grense nie – dis nie bedoel om sy lewe te versuur nie, eerder om hom gekoester te laat voel. Ouers wat omgee, stel grense. Ouers wat nie omgee nie, laat sommer alles toe en tree dan impulsief of woedend op as iets hulle kwaad maak.

Kry die volle storie
Teken in op Netwerk24 en kry vandag onbeperkte toegang tot gehalte-joernalistiek, brekende nuus, voorste Afrikaanse koerante en tydskrifte, blits-videoinhoud, podsendings, luisterboeke en meer.
Teken in
Reeds 'n intekenaar? Meld aan
Jongste uitgawe

Feb - Mei 2022

Jongste uitgawe
Lees Baba & Kleuter gerieflik in digitale formaat.
Begin lees