Langdurige blootstelling aan die son se ultraviolet- (UV-) strale kan uiters skadelik vir die oë wees, sê Inge Loubser, ’n oogkundige by die optometris Mellins i.Style. Die beste beskerming vir jou oë is om uit die son te bly wanneer hy op sy skelste is, oftewel tussen 10 vm. en 2 nm – selfs al is die weer bewolk.

Dis deesdae maklik om ’n sonbril vir jou baba of ouer kind te kry. Onthou net dat goedkoop of speelgoedsonbrille meestal nie UV-beskerming bied nie. Hulle kan trouens selfs meer skadelik wees omdat kinders se pupille agter die donker lense vergroot, sodat meer UV-strale in staat is om die oë binne te dring.

As julle by die see vakansie hou, is bykomende voorsorgmaatreëls nodig. Water en sand weerkaats UV-lig. Dit beteken dat al speel kinders onder ’n strandsambreel, word hul oë steeds aan die son se skadelike strale blootgestel. Dieselfde geld vir babas en kleuters in stootwaentjies. Kies dus liewer stootwaentjies met kappe wat UV-beskerming bied. ’n UV-bestande breërandhoed sal verder help om jou kind se delikate vel en oë te beskerm. Veral babas jonger as ses maande moet soveel moontlik teen direkte sonlig beskerm word omdat hul oë nog baie sensitief is. Hul velletjie het ook nog nie genoeg melanienpigment ontwikkel om hulle teen UV-skade te help beskerm nie. 

Baba- en kindersonbrille

Dit kan vir jong kinders moeilik wees om aan sonbril dra gewoond te raak. Kinders sal egter meer gewillig wees om hul ouers se voorbeeld te volg as hul ouers self sonbril dra. 

Daar is ook sonbrille vir babas beskikbaar wat ontwerp is om gerieflik op ’n baba se taamlike plat neusbruggie te pas. Hierdie sonbrille het ’n rubberbandjie wat om die koppie pas om die sonbril op sy plek te hou. Maak net seker dat die bandjie nie te styf sit nie omdat dit hoofpyn kan veroorsaak. Die bandjie moet ook nooit om jou baba se nek hang nie. 

Kies die regte sonbril 

Bepaal eers of jou kind die sonbril meestal vir sport of ontspanning sal gebruik. As dit ook as oogbeskerming tydens sportsoorte soos krieket of tennis moet dien, moet ’n stewige raam gekies word wat sal bly sit al is jou kind aktief.

Oorweeg ook gemak en hoe gerieflik die bril pas. Die raam moet nooit te swaar wees of afgly omdat dit te los sit nie. Wat lenskleur betref, is daar verskillende kleure om van te kies, maar die lenskleur hou geen verband met die hoeveelheid UV-beskerming wat dit bied nie. 

Wees versigtig

Maak jou kinders van kleintyd af bewus van die gevare en die oogskade wat hulle kan opdoen as hulle na die son of enige ander helder lig kyk. Omdat kinders van nature nuuskierig is, besef en onthou hulle nie altyd dat hulle nie reguit na die son moet kyk nie. Leer dus jou kind van jongs af om nooit na die son te staar nie, selfs nie eens vir ’n klein rukkie nie – en selfs nie met ’n sonbril op nie. 

Kinders se oë kan makliker skade opdoen, want hul oogpupille is groter as dié van volwassenes. Meer lig en UV-strale word dus deurgelaat.

Een van die toestande wat die oog kan opdoen nadat jy direk na die son gekyk het, is sonretinopatie. Dit behels dat jou visie vir ’n ruk versteur word. Dit kan ’n paar maande duur voor jy weer normaal kan sien, maar soms is daar blywende probleme en selfs ’n blindekol. 

Gesels met jou oogkundige 

Inge sê dis altyd ’n goeie plan om professionele raad by ’n oogkundige te kry wanneer jy ’n sonbril vir jou kind moet kies. So kan jy op ’n bril besluit wat teen UV-strale beskerm, gemaklik pas en wat jou kind met meer ywer sal dra. 

Lees meer
Gaan na mellins.co.za as jy op soek is na nog raad en wenke oor oog­gesondheid.