V: Hoe weet ek my kind is gereed om te begin?

A: Moenie oorhaastig wees om met potjielesse te begin nie. Jou peuter ontwikkel gewoonlik eers teen twee jaar oud genoeg beheer oor die spiere wat nodig is om urine in sy blasie te hou en dit dan willekeurig te laat uitvloei. Moet nooit potjielesse aan jou kind opdwing nie en wag tot hý belangstelling begin toon, soos dat hy jou begin na-aap. 

  • Hy is self bewus daarvan as hy piepie of poef en sê soms vir jou as hy wil gaan of besig is om te gaan.
  • Hy kan self sy broek op- en aftrek, hoewel dit soms maar skeef en krom is.
  • Hy stel belang in sy potjie.
  • Hy is geïnteresseerd daarin as jý toilet toe gaan.
  • Hy het gereelde opelyf, meestal op dieselfde tyd van die dag.
  • Hy kan al self praat en vir jou sê wanneer hy ’n draai wil loop. 


V: Hoe lank duur dit gewoonlik voor ’n kind die potjie kan gebruik?

A: Dit verskil van kind tot kind ... maar moenie verwag dat dit binne ’n week of twee gaan gebeur nie. Wees rustig en moenie ’n spertyd stel nie. Begin stelsel­ma­tig, sê maar soggens wanneer julle albei rustig tuis is, en rek geleidelik die tye waarin hy sonder ’n doek loop.

Sit aan die begin steeds ’n doek aan wanneer julle uitstappies onderneem omdat hy dalk so meegevoer kan raak deur al die bedrywighede dat hy skoon vergeet om te pieps.


V: Hoe pak ek die eerste dag van potjielesse aan? 

A: Gesels uit die staanspoor met jou kind en vertel hom wat vandag gaan gebeur. Wys hom waar die potjie is en sit dit op ’n plek waar dit altyd kan staan, soos langs die toilet.

Stel ’n wekker of alarm om elke uur af te gaan en neem hom elke uur toilet toe. Sorg dat hy baie vloeistowwe drink sodat sy blaas vol raak en maak ’n groot ophef van suksesvolle pogings.

Moenie met hom raas as hy glipsies het nie, nie eens as hy ’n hele paar ná mekaar het nie. Potjielesse mag nie met negatiwiteit gepaardgaan nie; dit moet eerder ’n lekker speletjie wees. As die weer lekker is, kan hy sommer kaalbas in die tuin rondloop en dalk vir die pret die blommetjies natpiepie.

Kry ’n spesiale speelding of ’n boekie waarmee hy mag speel net as hy op sy potjie sit. Moet hom nie dwing om op die potjie te sit as hy nie meer wil nie, selfs al het niks gebeur nie. (Soms help dit om ’n kraan met water te laat loop.)

Hou hom dop sodat jy kan sien wanneer hy toilet toe wil gaan, soos wanneer hy sy penis vasknyp, sy beentjies kruis of begin rondtrippel.

Probeer om sy potjieroetine dieselfde te hou tuis as by ’n dagmoeder of die kleuterskool. Maak seker almal wat bedags na hom omsien, weet hy is besig met potjielesse. Baie speelgroepies en kleuterskole het gewoonlik groot sukses met potjielesse omdat hulle die kinders gereeld saam-saam toilet toe neem. As hy dus oor ’n paar maande skool toe gaan, is dit dalk ’n goeie plan om eers ’n bietjie te wag.


V: Vaar kinders regtig in die somer beter met potjielesse as in die winter?

A: Ja. In die winter dra ons dikwels ’n paar lae klere en somerklere is outomaties ligter en makliker om uit te trek. En wie is nou lus om jou boudjies aan die koue bloot te stel as jy dit nie hoef te doen nie?


V: Hy gebruik die potjie bedags; het hy nog ’n nagdoek nodig?

A: Baie kinders is al maande (soms ’n jaar of twee) lank bedags droog, maar kry nog glipsies in die nag. Dis heeltemal normaal omdat die meeste kinders se blaas nog nie genoeg ontwikkel het om al die vloeistof ’n hele nag lank binne te hou nie. 

Jy sal mettertyd begin agterkom dat hy soms soggens met ’n droë doek wakker word en wanneer hy ’n paar oggende ná mekaar droog wakker word, kan jy daaraan begin dink om die nagdoek te los. Seuntjies het gewoonlik meer tyd nodig om snags sonder ’n doek te slaap as dogtertjies.

Beperk vloeistofinname voor hy gaan slaap, maar moet hom nie dors of ongemaklik laat gaan slaap nie. 

Neem hom vir ’n laaste pieps voor hy gaan slaap en as jy wil, kan jy hom selfs weer neem voor jý gaan slaap – hoewel party kenners meen dis beter om ’n kind te leer om ononderbroke te slaap sonder om ’n draai te gaan loop.

Aanvaar dat daar selfs ’n paar jaar lank nog glipsies in die nag gaan wees. Skaf ’n ordentlike waterdigte laken aan om die matras te beskerm en moenie met hom raas as hy ’n glipsie gehad het nie. 

Los ’n naglig in die kamer aan sodat hy snags sonder vrees kan opstaan as hy wil gaan piepie.