book-icon Uitgawe Junie & Julie 2018

Suiwel vir sussie

akkreditasie
Getty Images
Getty Images

Jy kan koeimelk in klein hoeveelhede begin insluit wanneer jou baba begin eet, en van haar eerste verjaardag af kan sy dit ook drink. Jou borsmelk bly egter die beste vir jou baba en as jou kind slegs koeimelk drink voor sy ’n jaar oud is, kan sy ’n ystertekort opdoen. Leer jou peuter van ’n jaar af om koeimelk te drink, selfs al borsvoed jy nog. So kan jy seker wees dat sy later van hierdie voedsame drankie sal hou.

Melk en melkprodukte is van die voedingrykste kosse wat jy jou kleinding kan gee. Dit bevat proteïene, koolhidrate, vet, vitamiene en minerale en daarom kan dit ’n vinnige maaltyd in ’n glas wees. Die gehalte van die proteïene in melk kan vergelyk word met dié van vleis, en twee glase melk verskaf die helfte van die proteïen wat jou peuter elke dag nodig het om te groei. Suiwel is ook die beste bron van kalsium, fosfate en magnesium en twee glase melk voorsien in onderskeidelik 90, 100 en 75 persent van jou peuter se behoeftes aan hierdie voedingstowwe. Die verhouding van kalsium, fosfate en proteïene in melk maak dit ideaal vir die bou van sterk bene en tande. Kinders wat genoeg melk drink se tandjies is sterker as dié wat dit vermy en hulle kry dus nie so maklik gaatjies nie. Melk bevat ook baie vitamiene en twee glase sorg vir 200 persent van die vitamien B12, 160 persent van die vitamien B2, 125 persent van die biotien en 40 persent van die vitamien A wat jou peuter nodig het. Sorg dus dat jou peuter dié wonderlike bron inkry. Volroommelk bevat wel ook heelwat versadigde vet en cholesterol, terwyl laevetmelk minder bevat en vetvrye melk feitlik niks. Een ander fantastiese feit is dat alle suiwel ’n lae glukemiese indeks het, wat beteken dat dit volgehoue energie vir jou woelwatertjie gee en nie ’n lae bloedsuiker met die gepaardgaande vloerstuipe sal veroorsaak nie.

Daar is geen ander kos wat soveel kalsium bevat en so goed opgeneem word as melk nie. ’n Kind wat dus nie melk en melkprodukte inneem nie, kry selde genoeg kalsium in. Jou peuter het elke dag 700 mg kalsium nodig, en sonder suiwel sal sy elke dag meer as twee koppies broccoli en 100 g geblikte sardyne met grate moet eet; selfs die beste ma sal sukkel om dit in ’n peuterlyfie te kry. Die vinnige aanvullingsopsie help ook nie, want kalsium in aanvullings word nie so goed opgeneem soos dié in melk nie, en jou kind sal ook die ander voedingstowwe in melk misloop. Te min kalsium kan haar duur te staan kom aangesien dit beendigtheid verlaag en die gevaar vergroot dat haar arm of been die een of ander tyd in gips gaan beland. Om dit te voorkom moet jy seker maak sy kry haar melk in en speel genoeg buite.

Kry die volle storie
Teken in op Netwerk24 en kry vandag onbeperkte toegang tot gehalte-joernalistiek, brekende nuus, voorste Afrikaanse koerante en tydskrifte, blits-videoinhoud, podsendings, luisterboeke en meer.
Teken in
Reeds 'n intekenaar? Meld aan
Jongste uitgawe

Feb - Mei 2022

Jongste uitgawe
Lees Baba & Kleuter gerieflik in digitale formaat.
Begin lees