Jy kan jou maar begin gereed maak vir fiemies wanneer jou kind haar peuter- of kleuterjare binnegaan. Tot twee derdes van ouers meen hul kleuter het ’n eetgewoonteprobleem van die een of ander aard, sê Kath Megaw, ’n kliniese dieetkundige met ’n spesiale belangstelling in pediatrie. 

Stap een is om eers onderliggende redes vir die saak te soek, sê sy.

Fiemies kan sy oorsprong hê in ’n mediese toestand (soos refluks) of ’n sindroom, dit kan ontstaan omdat jou kind tasdefensief is en nie die reuk, temperatuur of tekstuur van kos kan verdra nie, omdat sy kort tevore siek was, of omdat sy te veel sap en verfynde suiker inkry wat haar aptyt verwoes. Nog oorsake kan wees dat die gesin geen maaltydroetine het nie of dat etens­-tye ontaard het en glad nie meer lekker is nie.

Natuurlik speel ’n peuter se ontwikkelende eiewilligheid ook ’n rol, om nie te praat nie van haar ontdekking dat sy ’n mensie is wat beheer kan uitoefen en haar ma kan manipuleer!

Dis nie genoeg dat die dieetkundige jou dan ’n gesonde eetplan vir jou kind in die hand stop nie. Gedrag en gewoontes moet hanteer word. 

Dís wat jy kan doen

Koop gesond Dis nie jou peuter wat besluit wat jy in jou winkeltrollie pak en wat in jou koskas beland nie. Dis jý wat beheer het oor hierdie keuses. Dis ouers se rol om voedsame, gebalanseerde kos op vasgestelde tye te voorsien. Kinders besluit dan wat en hoeveel om te eet. Moenie rolle ruil nie!

Dink slim Sorg dat jou peuter nie in die twee uur voor ’n maaltyd eet nie, en ook nie te veel sap of melk drink nie. 

Bly neutraal Hou maaltye stresloos en stel ’n voorbeeld deur self gesond te eet. Laat jou kind sien hoe jy vrugte en groente geniet. Moenie kos aanwend om te beloon of te straf nie en moenie op die fiemies fokus nie. Begin klein Begin met baie klein porsies en moenie daarop aandring dat jou peuter alles opeet nie.  Praat oor voorkoms Moenie klem lê op smaak nie; gesels eerder oor kleur, vorm, geur en tekstuur.

Maak die maaltye mooi Trakteer jou kleinding op ’n gesinsbuffet waar almal self kan kies wat hulle eet. 

Hou dit matig Moenie bang wees vir vet in jou kind se dieet nie – hulle het meer nodig as volwassenes.

Wees geduldig Dit kan tot 15 keer van probeer kos voor ’n kind iets nuuts aanvaar. Stel hulle geleidelik bekend deur byvoorbeeld die tamatie in die winkel uit te wys en jou kind dan in die kombuis te vra om dit aan te gee. Laat die kinders help kosmaak.

As dinge nie goed lyk nie Net meer as 10 persent van kinders met fiemies het dit so erg dat hulle wanvoeding ontwikkel. ’n Dieetkundige kan dan ’n geskikte melkformule aanbeveel tot tyd en wyl die fiemies beter bestuur kan word. Dit moet egter nooit as plaasvervanger vir vars kos beskou word nie, want ’n gebalanseerde dieet bly die beste manier om die regte voedingstowwe in jou kind se lyf te kry. Die melk is egter ’n oorbruggingshulp wat keer dat jou kind tekorte ontwikkel.

Wanneer moet jy dan bekommerd wees?
  • As jou kind hele voedselgroepe of kleure weier, soos om nie ’n enkele soort groen groente te eet nie.
  • As jou kind altesaam bitter min eet en dit nie net ’n tydelike fase is nie.
  • As jou kind se gewig en lengte belemmer word.
  • As jou kind ondergewig of oorgewig is.
  • As jou kind ’n tekort aan ’n mikrovoedingstof het (bv. yster).
  • As jou kind lyk of hy wil opgooi of verstik wanneer hy eet.
  • As jou kind konsekwent weier om iets nuuts te beproef.
  • As daar geen mediese rede is wat die fiemies kan verklaar nie.
  • As die fiemies begin inmeng met jul daaglikse roetine.
  • As die fiemies jul ouer-kind-verhouding ondermyn.