Altyd vol pret

Z is vir Zackie: Die pretpark en Die tent-avontuur is kinderfiksie geskryf deur Jaco Jacobs en gerig op kinders van vyf jaar en ouer.

Hierdie boeke, met groot en maklik verstaanbare teks, is perfek vir beginnerlesertjies. Elke boek bevat volkleurillustrasies deur Alex van Houwelingen, wat dit ook ideaal vir voorlees maak.

In albei hierdie stories sien Zackie die skoolboelie, Anton, reg en het hy hope pret saam met sy beste vriend, Vincent.

Lapa Uitgewers, R85 elk.

Varkie vir ma en pa

Verrassing! Verrassing! is ’n boek is deur die geliefde Kaapse kunstenaar Niki Daly wat dit geskryf en geïllustreer het.

Die storie is eintlik ’n bietjie hartseer, maar dit word met humor vertel en het ’n snaakse einde wat jou kind beslis gaan verras!

Meneer Hartlief bring ’n oulike klein varkie vir mevrou Hartlief ná haar wens vir ’n baba. Dit is geskik vir kinders tot ses jaar.

Tafelberg-uitgewers, R155.

Kom ons hou verjaardag

In die boek Ek is Alex hoor jou kleuter van Alex se diverse groep maatjies. Alex hou ’n verjaardagpartytjie en nooi al haar maats om saam met haar partytjie te hou.

Drie- tot sewejariges gaan sommer baie leer (en dit ook geniet) uit hierdie boek, waarin al Alex se maatjies afsonderlik bespreek word.

Dit is deur die Suid-Afrikaner Elena Agnello geskryf en Adrie le Roux het die pragtige illustrasies gedoen.

Bumble Books, R135.

’n Rakker van ’n brak

Lana en Rakker: ’n Huis vir Rakker en Die hondeskool is albei deur Holly Webb geskryf.

Lana se nuwe aangenome jack russel-hondjie, Rakker, is woelig en stout, en in hierdie twee snaakse boeke probeer Lana Rakker uit die moeilikheid hou en by die hondeskool maniere leer.

Dié boeke is geskik vir sewejariges en ouer.

Lapa Uitgewers, R90 elk.

Diere oor die wêreld heen

As jou kind My eerste diere-atlas: ongelooflike diere van regoor die wêreld lees, gaan hy of sy binnekort ’n kennertjie van diere wees!

In hierdie boek, wat deur die Suid-Afrikaner Wendy Maartens geskryf is, leer jou kind watter diere waar te sien is.

Die boek is propvol feite oor diere, veral uit Suid-Afrika se enorme diereryk. Die besonderse illustrasies is deur Alistair Ackerman behartig.

Die boek is geskik vir kinders van sewe en ouer.

Lapa Uitgewers, R200.