Feestyd-versiering

Dekorversierings

Dekorversierings

Maak jul eie bekostigbare versierings van papier, plante, hout en bokse. Gebruik twee ou bokse om ’n huisie uit karton te bou. Sny ’n deur en vensters in die boks en versier dit met ’n goue en swart viltpen, wit bordkryt en kantlint.

Feestydversierings
Feestydversierings
Feestydversierings
Feestydversierings
Feestydversierings
Feestydversierings
Feestydversierings

Vir die Kersboom

Hou by een kleurskema wanneer julle versierings vir die Kersboom maak. Gebruik papier of karton. Hier het ons ’n diamant-, driehoek- en sirkelvorm gesny en ook ’n doilie omgevou. Sny ten minste drie van elke vorm sodat jy die agterkante teen mekaar kan vasgom om dimensies te skep. Laat kinders patrone daarop teken. Soek vere en takke in die tuin. Moenie van jou koskas vergeet nie. Span pastastrikkies in om Kersboomversierings te maak.

Geskenkpakkies met karakter

Versier jou pakkies met eenvoudige elemente wat jy maklik en goedkoop kan kry of reeds in die huis het. Maak gebruik van bruinpapier, plante, takke in kranse gevou, tou, doilies en selfs ou stukkies kant. Betrek die kinders by die versiering van die geskenkpakkies.

Mikrogolf-vrugtekoek
Mikrogolf-vrugtekoek

 Feestelike nagereg

Mikrogolf-vrugtekoek

BESTANDDELE

  • 1 kg droëvrugte-koekmengsel
  • 125 g botter
  • 375 ml (1½ k) bruinsuiker
  • 10 ml (2 t) kakao
  • 10 ml (2 t) koffiepoeier
  • 5 ml (1 t) gemengde speserye
  • 5 ml (1 t) gemmer
  • 7 ml (1½ t) koeksoda
  • 2 ml (½ t) sout
  • 500 ml (2 k) kookwater
  • 750 ml (3 k) koekmeel
  • 7 ml (1½ t) bakpoeier
  • 3 eiers
  • 100 g groenkersies (sny in 3 stukkies)
  • 100 g rooikersies (sny in 3 stukkies)
  • brandewyn na smaak

METODE

1. Meng al die bestanddele van die droë-vrugte-koekmengsel tot die kookwater in ’n mikrogolfbestande bak. Mikrogolf dit 10 minute teen volle krag en roer elke 2 minute sodat die suiker oplos en die mengsel nie aanbrand nie. Verwyder uit die oond, plaas in die yskas en laat afkoel.

2. Sif die koekmeel en bakpoeier saam. Klits die eiers liggies in ’n aparte bak. Meng die eiers by die afgekoelde vrugtemengsel en voeg die meelmengsel bietjie vir bietjie by. Voeg laastens die kersies by.

3. Bak die vrugtekoek in mikrogolfbestande bakke. Ons het plastiek-jelliehouers gekies om individuele koekies te bak. Jy kan ook 2 groot koeke in ronde glasbakke bak.

4. Smeer die vorms en voer onder met waspapier uit. Skep beslag in elke vorm. Die koek rys; moet dit dus nie tot bo vol maak nie.

5. Bak dit in die mikrogolf op ’n omgekeerde piering teen 30% of op die ontdooi-stelling. Klein koeke moet sowat 15 minute bak en groter koeke 32 minute.

6. Verwyder uit die mikrogolf en laat ’n rukkie staan. Sny die onderkant van die individuele koekies gelyk met die houer sodat die koek reguit staan wanneer dit uitgedop word. Dop uit en laat afkoel.

7. Sprinkel brandewyn oor die koek en draai in kleefplastiek toe. Hou dit vir drie tot vier weke so en besprinkel weekliks met brandewyn.

Rooifluweel-rolkoek

Rooifluweel-rolkoek

KOEK BESTANDDELE

  • 250 g koekmeel
  • 10 ml (2 t) kakao
  • 10 ml (2 t) bakpoeier
  • 2,5 ml (½ t) koeksoda
  • 100 g botter
  • 200 g strooisuiker
  • 1 bottel rooi voedselkleursel
  • 10 ml (2 t) vanieljegeursel
  • 2 groot eiers
  • 175 ml karringmelk
  • 5 ml (1 t) asyn

METODE

1. Voorverhit die oond tot 180 °C. Smeer ’n bakplaatjie met botter en voer dit met bakpapier uit.

2. Sif die koekmeel, kakao, bakpoeier en koeksoda saam.

3. Klits die botter en suiker in ’n aparte bak saam tot dit lig en romerig is. Voeg die kleursel en vanielje by en klits verder.

4. Voeg die eiers en die meelmengsel bietjie vir bietjie om die beurt by. Meng laastens die karringmelk en dan die asyn by.

5. Skep die mengsel in die bakpan en bak 15 minute of tot ’n toetspen skoon uit die middel kom. Dop die koek op ’n klam vadoek uit. Gebruik die doek om die koek op te rol en laat dit so droog word. Onthou: ’n Rooifluweel-koek is baie swaarder as ’n tradisionele rolkoek en kan barste vorm. Verbloem dit met die roomkaasversiersel en besprinkel dit met versiersuiker en vars bessies.

ROOMKAASVERSIERSEL BESTANDDELE

  • 500 g versiersuiker
  • 125 g roomkaas
  • 125 g wit, ongesoute botter
  • 5 ml (1 t) suurlemoensap

METODE

1. Sif die versiersuiker. Klits die roomkaas en botter saam en voeg die gesifte versiersuiker by. Voeg laastens die suurlemoensap by en klits goed.

2. Wag tot die koek behoorlik afgekoel het en smeer die versiersel binne-in die rol.

Koekies vir koffiekoppies

Koekies vir koffiekoppies

BESLAG BESTANDDELE

  • 630 g koekmeel
  • 5 ml (1 t) fyn kaneel
  • 10 ml (2 t) fyn gemmer
  • 2,5 ml (½ t) fyn naeltjies
  • 1,25 ml (¼ t) koeksoda
  • 110 g botter
  • 100 g bruinsuiker
  • 2 eiers
  • 180 ml (¾ k) gouestroop

METODE

1. Sif die meel, kaneel, gemmer, naeltjies en koeksoda in ’n bak en hou eenkant.

2. Meng die botter en bruinsuiker goed met ’n elektriese klitser in ’n aparte bak.

3. Voeg die eiers een vir een en dan die stroop by terwyl jy aanhou klits. Voeg die meelmengsel stadig by die eiermengsel. Meng tot ’n stywe deeg.

4. Deel die mengsel in twee aparte balle en draai dit in kleefplastiek toe. Laat dit ’n rukkie in die yskas rus tot dit styf genoeg is om sy vorm te behou terwyl dit uitgerol word.

5. Verhit die oond tot 180 °C. Rol die deeg uit en sny sirkels, bome en blomme of enige ander vorm uit die deeg. Smeer of bespuit ’n bakplaat voor jy die koekies daarop plaas. Bak dit sowat 20 minute of tot goudbruin (hou deurentyd dop). Laat dit op ’n rakkie afkoel en versier.

VERSIERSEL BESTANDDELE

  • 2 eiers, geskei
  • 375 ml (1½ k) versiersuiker
  • 5 ml (1 t) suurlemoensap

METODE

Klits die eierwit en versiersuiker met ’n elektriese klitser tot dit glansend en goed gemeng is. Voeg die suurlemoensap by. Spuit patrone en woorde met ’n versiersak of plastieksakkie waarin jy ’n gaatjie gesny het op die koekies. Jy kan die versiersel dikker maak deur meer versiersuiker te gebruik, of dunner met minder suiker. Moenie die rou-eier-versiersel aan klein kinders en swanger vroue voorsit nie – gebruik liewer ’n mengsel van suiker en kookwater vir hulle koekies.