Die storie van die molletjie wat wou weet wie op s
Die storie van die molletjie wat wou weet wie op sy kop gedinges het

Mol met ’n d . . .

Jy weet ’n kinderboek is goed as dit al 30 jaar lank te koop is. Die storie van die molletjie wat wou weet wie op sy kop gedinges het deur die Duitser Werner Holzwarth is wêreldwyd ’n treffer. Dalk het jy gelag toe jou ma dit vir jou gelees het; nou’s dit jou beurt om dit vir jou kinders te lees. R130, Human & Rousseau

Ek kan vlieg
Ek kan vlieg

Kyk, ma!

Pikkewyne bly maar koddig en dis seker hoekom hulle so gewild in prenteboeke is. Ek kan vlieg deur Fifi Kuo staan uit onder al die pikkewynstories. Klein Pikkewyn wil vreeslik graag vlieg en glo hy kan, al vertel almal, sy pa inkluis, vir hom dat hy nie daartoe in staat is nie. Eers as hy in die water val, ontdek hy wat pikkewyne regtig kan doen, en sy pa is aan sy sy. R140, Lapa Uitgewers

Manjifieke Mier
Manjifieke Mier

Vind jou stem

Die diere hou konsert. Almal neem deel, selfs ’n piepklein mier! Hoe op aarde? Manjifieke Mier deur Claire Freedman is ’n bekoorlike, humoristiese boek wat ons almal daaraan herinner om ander nie te gou te oordeel nie. Dis geskik vir kinders vanaf drie jaar. R140, Lapa Uitgewers

Goeienag
Goeienag

Bababoekies word net beter

Goeienag maak deel uit van Baby Touch se kleurryke interaktiewe vat-en-voel-speelboekreeks. Dis slaaptyd en jy en jou baba sê saam goeienag vir al die diere en dinge terwyl julle aan die verskillende teksture vat en voel en deur die interessante openinge kyk. Die kleure vervaag geleidelik van helder daglig tot donkerte namate die boek vorder, tot dit nag word. Dis die ideale reeks om jou baba van kleins af in die gewoonte te kry om saans voor slaaptyd te lees. R180 by takealot.com, loot.co.za, Exclusive Books en Reader’s Warehouse.

Vat en voel: My klein wildtuin en Dierebabas
Vat en voel: My klein wildtuin en Dierebabas

Kartonboekies wat vaardighede ontwikkel

Vat en voel: My klein wildtuin en Dierebabas gaan jou kleinding se ogies, vingers en oortjies goed besig hou. Hulle gaan flappe moet oplig en die diere voel terwyl jy die heerlike rympies voorlees. Dis die soort boek wat jou baba oor en oor na jou toe gaan bring. R115 elk, Human & Rousseau

Diereverkenners: Lola en die Singende Orgidee
Diereverkenners: Lola en die Singende Orgidee

Want die wêreld is ’n wonderlike plek

Lola die ysbeer is op pad na die reënwoud vir ’n asemrowende avontuur! Haar maats dink sy is verspot, maar Lola is ’n beer met ’n plan. Niks en niemand gaan haar keer nie. Kinders van sowat vyf jaar oud af sal die pretbelaaide avontuur beslis geniet. Diereverkenners: Lola en die Singende Orgidee deur Sharon Rentta leer hulle op die koop toe iets van ware plantsoekers. R150, Lapa Uitgewers

My groot boek oor treine, motors en lorries en My
My groot boek oor treine, motors en lorries en My groot boek oor vliegtuie, bote en ruimtetuie

Alles wat beweeg

Het jy ook ’n kind in die huis wat versot is op alles met wiele en wat beweeg? Dan is hierdie twee (baie billike!) voertuigboeke iets wat julle sommer vandag moet gaan koop. My groot boek oor treine, motors en lorries en My groot boek oor vliegtuie, bote en ruimtetuie is grootformaatboeke vol helder, groot illustrasies met byskrifte, en ekstra inkleurblaaie agterin. Jou kind se algemene kennis oor voertuie van alle soorte sal geweldig uitbrei. R90 elk, Human & Rousseau.

Word ’n virusvegter! ’n Gids vir gesond bly
Word ’n virusvegter! ’n Gids vir gesond bly

Vir ons tyd

Hou op neul oor handewas en veiligheidsmaatreëls en lees eerder ’n slag vir jou kinders daaroor. Word ’n virusvegter! ’n Gids vir gesond bly verduidelik sagkens wat virusse is (die koronavirus inkluis), hoe om dit te beveg en hoe om jou en die mense vir wie jy omgee teen virusse te beveilig. Dit verskaf ook wenke oor hoe om jou en jul huis kiemvry te hou, insluitend stappe oor hoe om jou hande te was asook hoe en hoekom ons moet keer dat ’n virus oral heen versprei. Dis geskik vir kinders van ses tot nege jaar oud. R100, Human & Rousseau

Nicole en Appelliefie: Die heel beste geskenk en N
Nicole en Appelliefie: Die heel beste geskenk en Nicole en Appelliefie: Die nuwe maat

Soos die lewe regtig is

Goeie kinderboekskrywers soos Wendy Maartens weet: ’n Mens hoef nie weg te skram van ernstige en selfs hartseer onderwerpe net omdat ’n boek vir kinders bedoel is nie. Nicole en Appelliefie: Die heel beste geskenk en Nicole en Appelliefie: Die nuwe maat wys dit. Nicole se ma is dood, hulle moet trek, sy moet aanpas by ’n nuwe stad (waar daar byna nie ’n druppel water is nie) en sy sukkel om ’n regte goeie maat te maak totdat sy vir Zintle ontmoet, wat blind is. Kinders dink en voel net so diep oor die lewe as volwassenes. Koop gerus hierdie twee boeke vir jou klein denkertjie. R100 elk, Pan Macmillan

Rooimiere-in-die-broek – Idioom- inkleurboek
Rooimiere-in-die-broek – Idioom- inkleurboek

Hoe ryk is ons taal

Rooimiere-in-die-broek – Idioom- inkleurboek bevat 22 eg Afrikaanse idiome wat jou kind kan inkleur, elk met interessante feite oor diere. Maak skerp daai potlode. Graad R- en graad 1-kinders sal dié een geniet. Dis deur Wendy Maartens en Linki Brand. R100, Lapa Uitgewers.