Lotta vier fees

Lotta se lewe 9: Die kangaroe se skoen is die nuutste aflewering in die storie van die 10-jarige Lotta Liebenberg. Lotta en haar gesin gaan vir ’n naweek weg om haar grootouers se goue bruilof te vier. Sy is rêrig nie lus vir al die aktiwiteite wat haar pa beplan het nie – veral nie om saam met haar klein boeties voor ’n klomp mense te sing nie. Maar sy sien wel daarna uit om eindelik haar niggies te ontmoet wat in Australië woon. Met die oulikste illustrasies. Ideaal vir dié wat reeds self lees, agt tot 12 jaar oud. Human & Rousseau, R160.


Toiletgrappies mag maar

’n Mens wil jou oë rol wanneer jou kleuter se toilethumor inskop, maar dis heeltemal normaal en jy kan dit selfs nou en dan vrye teuels gee. Dino poef ’n planeet sorg vir net die verskoning wat jy nodig het, veral as die ruimtegogga ook byt. Die ruimtevaarder Dirkman en sy Dino het hul padkos tuis vergeet en Dino begin dus alles in sig verslind, selfs hul vuurpyl… Hoe gemaak om na die aarde terug te keer? Vir kinders tot ses jaar oud of wanneer die toiletgrappies ook al flou raak. Random House Children’s Publishers, R130.


Ure se plakkerpret

Hier’s twee boeke wat die kleinspan ure lank gaan besig hou: Plakkerpret met 555 voertuie en Plakkerpret met 555 perde en towerponies. Elke boek het ’n hele klomp tonele (van die stampkarbaan tot die buitenste ruimte in die voertuigboek, en van ’n winterwonderland tot ’n towerdoolhof vir die perdeboek) en natuurlik plakkers by dosyne. Groot pret en die beste ding vir fyn motoriese ontwikkeling. Human & Rousseau, R140 elk.


Stories sonder einde

’n Groot bundel met stories is altyd nuttig vir vakansies of reise – en dis ook nie te versmaai op die kinderboekrak tuis nie. So is dit ook gesteld met die lieflik geïllustreerde Groot boek-reeks in hardeband. Die nuutste twee op die rak is Die groot boek met slaaptydstories en Elkeen bevat agt stories. Vir drie- tot sesjariges, en beginnerlesers sal hierdie boeke ook geniet. Penguin Random House, R190 elk.


Muismannewales met Tillie

Jy sal ver moet soek om mooier volkleurillustrasies te vind as in die Tillie Appelpit-reeks, wat uit Duits vertaal is. In Die lappieskombers is die dorp se naaldwerkkompetisie aan die gang en Tillie, die “appelbloeiselwit kerkmuisie”, wil graag wen – maar graag genoeg om haar vriendskappe op te offer? In Die onverwagse gas is daar skielik ’n reuse-eier voor Tillie se deur. Waar kom dié besoeker vandaan? En wat moet sy daarmee aanvang? Protea Boekwinkel, R150 elk.


Diereland brand & Haas Das word ontvoer!

Die nuutste twee “episodes” in die Haas Das se nuuskas-reeks is op die rak. Dis ’n reeks geïllustreerde stories gegrond op die geliefde TV-reeks van die 1980’s met die nuusleserhaas en sy assistent, Piet Muis. In episode vyf is daar ’n stoeigeveg tussen die Gemaskerde Wonder en Kongo Kangaroe en die diere van Diereland moet vir ’n gevaarlike veldbrand vlug. In episode ses is daar ’n nuwe aankomeling in Diereland. Moeder Raaf veroorsaak probleme vir Koning Leeu – en Haas Das self word ontvoer! Super vir saamlees van vier jaar af (veral as jy die TV-reeks nog onthou …) en self lees. Human & Rousseau, R150 elk.