Om te sorg dat jou kleuter met ’n vol magie kleuterskool toe gaan, is nie al wat ’n ma met ontbyt moet regkry nie.

Die gewoontes wat gevorm word is amper nog belangriker. As jy jou kind van kleins af leer om ’n gesonde ontbyt te eet, skep jy ’n gewoonte waarby hy sy lewe lank sal baat vind.

Hoekom moet hy ontbyt eet?

Ontbyt is ’n belangrike deel van ’n gesonde lewenstyl. Kinders wat gereeld ontbyt eet, het ’n kleiner kans om oorgewig te raak as hul maatjies wat niks eet nie.

Dis waarskynlik omdat dié wat nie ontbyt eet nie, die kombuis teen middagete rasend honger binnestorm en omtrent meer as ’n tienerseun verorber.

Kinders wat ontbyt eet, kry ook meer vitamiene en minerale in, eet meer vrugte en groente en kry minder suiker in as kinders wat ontbyt oorslaan.

Moenie dink dat net julle twee sal weet as hy met ’n leë magie by die huis uit is nie. Sy kleuterskooljuffrou sal dit vinnig agterkom.

Hy sal nie so goed kan onthou of konsentreer as sy maatjies wat ’n gesonde ontbyt gehad het nie, en sal veral laatoggend meer foute maak.

Die brein het glukose nodig om te werk, en dit kom van kos af.

Jou mannetjie se brein gebruik dit wat in sy magie kan pas sommer gou op en daarom moet ’n kind gereeld eet: sodat die brein genoeg energie kry om slim planne uit te dink waarmee hy sy ma kan beïndruk.

Kinders wat nie ontbyt eet nie, se brein sal vinnig die bietjie glukose wat nog van aandete af beskikbaar is opgebruik, en dan is ma of juffrou met ’n prikkelbare, huilerige seuntjie opgeskeep.

As jy jou kleinding dus van kleins af leer om elke dag ontbyt te eet, sal dit hom help om beter te presteer wanneer hy grootskool toe gaan.

Beplan jou kinders se ontbyt en sorg dat daar altyd iets is wat gou gemaak en geëet kan word op daardie dae wanneer die horlosie julle voor is.

As jou kind sien jy doen moeite met ontbyt – ’n mooi gedekte tafel, ’n verskeidenheid vars vrugte en ’n mamma wat saam met hom eet – is die kans groot dat hy sal eet sonder dat jy hom hoef om te koop of te dwing, want laasgenoemde is selfs nog meer skadelik vir hom.

Wat is ’n gesonde ontbyt?

1. ’n Gesonde ontbyt is eerstens gebalanseerd.

Dit beteken dat daar een kos uit elk van die drie voedselgroepe op sy bord of in sy bakkie is: ’n boukos (soos melk, jogurt, ’n eier of grondboontjiebotter), ’n energiekos (soos pap, brood of ’n ander stysel) en ’n beskermkos (’n vrug of groente).

2. Ten tweede sal dit help as die maaltyd ’n lae glikemiese indeks (GI) het.

Dit sorg dat jou kind se bloedsuiker meer konstant bly en voorkom dat hy al weer honger is teen die tyd dat hy by die kleuterskool se hekkie instap.

3. Derdens wil ons hê daar moet soveel vitamiene en minerale moontlik in sy ontbyt wees sodat hy maklik genoeg van dié onsigbare wonders inkry.

4. En ten vierde sorg ons dat ontbyt ’n stewige dosis vesel bevat om sy magie gereeld te laat werk.

5. Vyfdens wil ons hê dit moet min vet bevat, veral min versadigde vet.

Dit moet liewer meer onversadigde vet bevat.

6. Laastens moet dit liefs nie onnodig baie suiker bevat wat kan bydra tot tandbederf en oorgewig nie.

Om ’n gesonde ontbyt voor te sit gaan jou nie ure in die kombuis besig hou nie.

Gereed-om-te-eet-pap bevat gewoonlik min vet, is met vitamiene en minerale verryk, bevat gewoonlik meer vesel as ander keuses en kan vinnig aanmekaargeslaan word, wat dit ’n uitstekende keuse vir ma en kleingoed maak.

Kies net die regte een! Kom ons bekyk ’n paar ontbytkeuses.

Ontbyt #1

100g ongegeurde vetvrye jogurt met vars perskestukkies en muesli

Hoekom?

  • Gebalanseerde ontbyt
  • Lae glikemiese indeks
  • Bevat meer natuurlike vitamiene en minerale
  • Bevat meer vesel
  • Bevat min versadigde vet
  • Bevat minder suiker

Ontbyt #2

Gekookte eier, lae-GI-heelgraanbrood met kanola-margarien en ’n pruim

Hoekom?

  • Gebalanseerde ontbyt
  • Lae glikemiese indeks
  • Bevat meer natuurlike vitamiene en minerale
  • Bevat meer vesel
  • Bevat minder vet en versadigde vet en meer onversadigde vet
  • Bevat ook geen suiker

Ontbyt #3

1 sny geroosterde lae-GI-heelgraanbrood met kanola-margarien en vissmeer, en ’n peer

Hoekom?

  • Gebalanseerde ontbyt 
  • Lae glikemiese indeks 
  • Meer natuurlike vitamiene en minerale 
  • Bevat meer vesel
  • Bevat minder vet en versadigde vet en meer onversadigde vet 
  • Bevat minder suiker

Ontbyt #4

ProVitas met grondboontjiebotter en ’n lemoen

Hoekom?

  • Gebalanseerde ontbyt
  • Lae glikemiese indeks
  • Bevat meer vitamiene en minerale
  • Bevat meer vesel
  • Bevat minder versadigde vet
  • Bevat minder suiker

Ontbyt #6

1 tuisgebakte laevet-semelmuffin met appel en sultanas en ’n glas laevetmelk

Hoekom?

  • Gebalanseerde ontbyt
  • Lae glikemiese indeks
  • Bevat meer natuurlike vitamiene en minerale
  • Bevat meer vesel
  • Bevat minder vet en versadigde vet
  • Bevat minder suiker

Ontbyt #7

1 bakkie Bokomo Bran Flakes met rosyne, amandelsplinters en laevetmelk

Hoekom?

  • Gebalanseerde ontbyt
  • Lae glikemiese indeks
  • Verryk en meer natuurlike vitamiene en minerale
  • Bevat meer vesel
  • Bevat minder ver- sadigde vet en meer onversadigde vet
  • Bevat minder suiker

Ontbyt #8

Hawermoutpap met appel, kaneel, ’n titsel heuning en laevetmelk

Hoekom?

  • Gebalanseerde ontbyt
  • Lae glikemiese indeks
  • Meer natuurlike vitamiene en minerale
  • Bevat meer vesel
  • Bevat minder vet en versadigde vet
  • Bevat minder suiker

Ontbyt #9

1 gladdejantjie, gemaak van vetvrye ongegeurde jogurt, aarbeie, peer, wortel en hawersemels

Hoekom?

  • Gebalanseerde ontbyt
  • Lae glikemiese indeks
  • Bevat meer natuurlike vitamiene en minerale
  • Bevat meer vesel
  • Bevat minder vet en versadigde vet
  • Bevat minder suiker ?