Getty Images

Opsie #1

Jy oorweeg dalk ’n gladdejantjie gemaak van dubbeldik sjokoladejogurt, piesang en volroommelk in ’n wegneemkoppie van 500 ml.

Beter keuse

’n 250 ml-gladdejantjie gemaak van vetvrye natuurlike jogurt, aarbeie of frambose, peer, wortel en hawersemels.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer natuurlike vitamiene en minerale, meer vesel en minder vet en suiker.

Opsie #2

Gryp jy gou na ’n bak kitsgraankos met volroommelk en suiker?

Beter keuse

1 bakkie van Bokomo se Bran Flakes met rosyne, amandelsplinters en laevetmelk.

Hoekom is dit beter?

Dis ’n gebalanseerde ontbyt met ’n lae glukemiese indeks. Dis ’n verrykte opsie met meer natuurlike vitamiene en minerale, meer vesel en minder vet en suiker.

Bou ontbyt so

As jy slaafs by ’n eetplan wil hou, gaan jy waarskynlik misluk. Hou eerder die volgende in gedagte sodat jy ’n gesonde ontbyt aanmekaar kan slaan met wat jy in die huis het.

Kies een kossoort uit elk van die drie groepe:

  • Boukos soos melk, jogurt, eier of grondboontjiebotter
  • Energiekos soos pap, brood of 'n ander stysel
  • Beskermkos soos vrugte of groente Maak ook seker die maaltyd bevat vesel en probeer die suiker drasties beperk.
Getty Images

Opsie #3

’n Bakkie versoete jogurt, want jy’s haastig.

Beter keuse

100 g vetvrye natuurlike jogurt met vars vrugte en Bokomo se Morning Harvest Muesli.

Hoekom is dit beter?

Dis ’n gebalanseerde ontbyt met ’n lae glukemiese indeks wat jou langer vol sal hou. Dit bevat meer natuurlike vitamiene en minerale, meer vesel en min versadigde vet, asook minder suiker.

Opsie #4

Jy doop twee karringmelkbeskuitstukke in jou koffie. Klassiek!

Beter keuse

1 stuk tuisgebakte heelgraanbeskuit vol sade, neute en semels met ’n glas laevetmelk en ’n appel.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer vitamiene, minerale en vesel en minder vet, versadigde vet en suiker.

Opsie #5

Kies jy kortpad met ryskoekies met botter en stroop wanneer jy ’n bietjie later slaap?

Beter keuse

Provitas met grondboontjiebotter en ’n lemoen.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer vitamiene en minerale, meer vesel en minder versadigde vet en suiker.

Opsie #6

Gebakte eiers, ’n Weense worsie en wit roosterbrood met botter, want jy is baie honger soggens en verdien dit ...

Beter keuse

Gekookte eier, lae-GI- heelgraanbrood met kanola-margarien en bloubessies.

Hoekom is dit beter?

’n Weense worsie het nog nooit enigiets goeds vir enigiemand beteken nie. Die beter keuse is ’n gebalanseerde ontbyt met ’n lae glukemiese indeks. Dit bevat meer natuurlike vitamiene, minerale en vesel, minder vet en versadigde vet en meer onversadigde vet. Dit bevat ook geen suiker nie.

Getty Images

Opsie #7

’n Bloubessie-muffin van die winkel, want muffins is mos nie koek nie ...

Beter keuse

Een tuisgebakte laevet-semelmuffin met appel en sultanas en ’n glas laevetmelk.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer natuurlike vitamiene, minerale en vesel en minder versadigde vet en suiker.

Sorg dat ontbyt tel

Ontbyt skop jou lyf aan die gang ná ’n nag se rus. ’n Gesin wat die gewoonte volg om ontbyt te eet, het ’n kleiner kans om oorgewig te raak as maatjies wat soggens niks eet nie – heel waarskynlik omdat dié wat nie ontbyt eet nie, rasend honger word en die kombuis dan later bestorm en hulle ooreet. Ontbyt is ’n geleentheid om vitamiene en minerale in te kry, meestal in die vorm van vrugte. Mense wat ontbyt eet, konsentreer soggens beter. Die brein het glukose nodig, wat van kos af kom. Jy sal weet dat die glukose op is wanneer iemand prikkelbaar of huilerig raak. Dek dus saans al die tafel sodat julle elke oggend kan aansit en saam eet. Die beter keuses in hierdie artikel is nie werklik meer moeite as die ander opsies nie.

Opsie #8

Wit roosterbrood met botter en Nutella soos Duitsers, want hulle weet mos gewoonlik beter of hoe? Daar’s mos neute in.

Beter keuse

1 sny geroosterde lae-GI-heelgraanbrood met kanola-margarien en vissmeer, en ’n peer.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer natuurlike vitamiene, minerale en vesel, minder versadigde vet, meer onversadigde vet en ook minder suiker as daai sjokoladesmeeropsie.

Getty Images

Opsie #9

’n Staatmaker van mieliepap met botter, suiker en volroommelk kan mos nie verkeerd wees nie. Jy het dit mos kleintyd geëet.

Beter keuse

Hawermoutpap met appelstukkies, bessies, kaneel, ’n titsel heuning en laevetmelk.

Hoekom is dit beter?

Dis ’n gebalanseerde ontbyt met ’n lae glukemiese indeks. Dit bevat meer natuurlike vitamiene, minerale en vesel, asook minder vet, minder versadigde vet en minder suiker.