Getty Images

Begin so: 6 tot 8 maande

As jy beplan om self vir jou baba kos te maak, is die beste toebehore wat jy kan aanskaf ’n stoombak vir jou mikrogolfoond en ’n voedselversapper of handverwerker. Sorg dat al jou potte, panne en eetgerei silwerskoon is, maar jy hoef nie alles te steriliseer wanneer jy jou eie babakos berei nie. Die tekstuur van jou baba se eerste vaste kos behoort baie glad en sag te wees sonder dat daar klonte of stukkies tussenin is.

Inge van Niekerk, ’n dieetkundige van Klerksdorp, raai ouers aan om tussen week een en twee by ’n verskeidenheid groente en vrugte te hou. Groente en vrugte wat jy in die eerste week kan bekendstel sluit in botterskorsie, patat, lemoenpampoen, wortels, aartappels, murgpampoentjies, spinasie, beet, appels, pere, perskes, pruime, avokado, piesang en mango. Kook die groente tot dit sag is en plaas dit daarna in ’n voedselverwerker.

Begin aanvanklik met een groentesoort. Ná ’n paar weke, wanneer jou baba aan vaste kos gewoond is, kan jy dit kombineer.

Verwyder aanvanklik die skille van die vrugte.

“Teen week twee kan jy ook ouderdomsverwante ysterverrykte pap of selfs Bokomo se Maltabella-pap bekendstel. Vanaf week drie af kan jy met hawermoutpap en gladde mieliepap begin en ook ander groente soos broccoli, blomkool, uie, ertjies en groenboontjies gee. Jy kan van week drie af ook volroomjogurt of roomkaas by jou baba se vaste kos voeg. Moet egter nie te haastig wees en aanvanklik te veel kombinasies prakseer nie.

“Dit is veilig om van ses maande af gladde, sagte en fyngemaakte hoender, lams- en beesvleis, bone, lensies en laesout-biltong bekend te stel, maar eers as jou baba gewoond is aan vaste kos,” sê Inge.

Moenie te lank met eier en vis wag nie – beproef dit sommer al tussen sewe en nege maande oud. Ná sewe maande moet die tekstuur steeds fyn wees, maar dit hoef nie meer puree te wees nie. Die porsiegrootte hang van jou kind se aptyt af. Moet nooit sout, suiker of versoeter by haar kos voeg nie. Hier volg ’n klompie resepte wat jy op die proef kan stel.

Resep #1 Tuisgemaakte appelpuree

Skil en ontpit ’n vars, soet en sappige, rooi appel en plaas dit in ’n kastrol. Voeg 2 tot 3 eetlepels water by om te keer dat dit kleef of brand. Bedek en laat dit sowat 5 minute oor lae hitte prut tot die appelskywe sag is.

Druk die appel deur ’n sif of plaas dit met sous en al in ’n versapper.

Maak seker dit het heeltemal afgekoel voor jy dit vir jou baba gee. Gekookte appels vries baie goed – jy kan dus sowat ses appels op ’n slag kook en dit in klein bakkies vries.

Resep #2 Wortelpuree

Maak dit presies soos die appelpuree hierbo. Onthou net dat wortels meer tyd nodig het om sag te kook; sowat 20 tot 25 minute.

Maak seker daar is genoeg water in die pot sodat dit nie droogkook en vasbrand nie.

Resep #3 Piesangpuree

Skil ’n piesang en druk dit met ’n vurk stukkend. Roer dit om die tekstuur nog sagter en romeriger te maak.

Moenie piesang te lank laat staan nie, want dit verkleur en die tekstuur verander vinnig.

Resep #4 Peerpuree

Harde pere moet eers gekook word (soos appels), maar sagte pere kan versap word. Al die basiese resepte hierbo kan gebruik word vir ander vrugte en groente soos botterskorsie en patat.

Sodra jou baba dit baasgeraak het, kan julle begin eksperimenteer met kombinasies en ander geure. Nou begin die pret!

Resep #5 Ertjie-en-piesangpuree

Stoom 3 eetlepels ertjies tot sag. Versap die ertjies saam met ’n ryp piesang.

Resep #6 Avokado-en-piesangpuree

Hiervoor het jy nie ’n versapper nodig nie; druk dit sommer met ’n vurk fyn.

Resep #7 Peer-appel-en-piesangpuree

Kook die peer en appel 5 minute en plaas dit in ’n versapper saam met die vloeistof waarin jy dit gaargemaak het.

As die puree te waterig is, kan jy dit met ’n bietjie ryspap of formulemelk dikker maak.

Resep #8 Broccoli, murgpampoentjies en pere

Stoom die murgpampoentjies tot dit sag is en maak dit fyn saam met gestoomde pere. Bied dit net so aan, of versap saam met ’n paar broccoli-blommetjies.

Resep #9 Aartappels, wortels en maalvleis

Kook geskilde aartappelblokkies en soetworteltjies tot sag. Maak die maalvleis apart in ’n klein bietjie olyfolie of regte botter gaar.

Rasper ¼ ui by. Voeg die aartappel en wortels by en maak alles fyn. As die kombinasie droog is, kan jy ’n bietjie melk byvoeg.

Rasper ’n bietjie soetmelkkaas by.

Resep #10 Jogurt-nagereg

Puree enige van die bogenoemde vrugte en meng dit met natuurlike jogurt. Jou baba sal dit verslind. Jy kan ook nou ander vrugte begin byvoeg, soos kiwi, perskes, appelkose en papaja.

Getty Images

8 tot 12 maande

Teen agt maande oud kan jy al goed begin eksperimenteer. Jou baba behoort nou al ’n paar tandjies te hê waarmee sy kos kan begin kou.

Die tekstuur van haar kos moet nou ál growwer begin word. As jy vir die res van die gesin hoender of vleis maak, kan jy stukkies afsny, dit baie fyn knip en by baba se kos meng.

Inge sê dis belangrik dat jou baba nou elke dag twee ysterryke proteïenporsies (soos rooivleis, hoender of lewer) inkry. ’n Nege maande oue baba kan al stukkies vaste kos begin eet en sal waarskynlik gek daaroor wees om stukkies groente (soos ertjies en stukkies murgpampoentjie) met haar vingers te probeer optel.

Maak seker dat sy nie verstik nie. “Onthou ook dat jy van nege maande af volroom-koeimelk by jou baba se kos en pap kan voeg,” sê Inge.

Resep #11 Mieliegereg

Stoom botterskorsie tot gaar en meng dit met ’n blikkie geroomde mielies. Vir ’n effens meer pikante smaak kan jy ’n piesang fyndruk en dit by die groente inroer.

Resep #12 Pasta met tuna

Maak macaroni gaar en kap dit fyn. Meng fyn tuna met ’n bietjie maas- of roomkaas en roer dit deur die pasta.

Resep #13 Viskoekies

Maak jou eie viskoekies deur ’n stukkie ontbeende vis soos stokvis gaar te stoom. (Maak seker daar is nie grate in nie.) Vlok die vis.

Kook ’n geskilde aartappel saam met gerasperde wortel en ertjies tot sag. Plaas alles in ’n voedselverwerker en meng 1 eier en ’n blikkie geroomde suikermielies saam. Meng alles goed en skep lepels vol in warm olie.

Braai aan weerskante tot bruin en gaar.

Resep #14 Eiergroente

Roerbraai verskillende groente saam in ’n bietjie olie. Kies groente soos ertjies, aartappels en repies wortel.

Klits ’n eier saam met ’n bietjie melk en voeg dit by die groentemengsel. Voeg bruinbroodkrummels by om dit te bind.

Skep in muffinpannetjies en bak dit ’n rukkie in die oond.

Resep #15 Fynaartappel met wortel en kaas

Kook geskilde aartappels tot gaar, voeg ’n bietjie melk by en maak fyn. Voeg natuurlike jogurt of roomkaas by om die tekstuur meer romerig te maak.

Voeg fyngemaakte gaar wortels by en rasper ’n bietjie kaas by.

Resep #16 Macaroni en kaas

Kook ’n pakkie macaroni tot sag. Klits ’n eier, ½ koppie melk en ’n gekapte tamatie saam en giet oor die macaroni.

Strooi kaas oor en bak 20 minute by 180 grade C. Wees versigtig dat die pasta nie uitdroog of hard word nie.

Resep #17 Spaghetti bolognaise

Kap ’n ui fyn en braai dit in ’n klein bietjie olyfolie. Voeg gekapte wortels, ’n hand vol ertjies, halfgaar aartappelblokkies en klein stukkies botterskorsie by.

Maak ’n sousie van tamatiepuree wat met ’n bietjie water of beesaftreksel gemeng is. Giet dit by die vleis.

Maak spaghetti in ’n ander pot gaar en sny in klein stukkies. Voeg dit by die bolognaise-sous.