Hierdie resepte kom uit Klein Kook & Geniet, wat pas weer uitgegee is. Ja, dis die kleinsus van die geliefde Suid-Afrikaanse Kook & Geniet deur S.J.A. de Villiers en haar dogter Eunice van der Berg.

As ma kan jy die boek gebruik om jou kinders by kosmaak betrokke te kry. Dis propvol staatmakerresepte en sluit als in van ou gunstelinge soos hamburgers, tjips en pizza tot ’n verskeidenheid soetgoed. Elke resep word stap vir stap met kleurfoto’s verduidelik.

Die boek sal jou help om jou kind te lei om 'n resep te volg, om te meet, wat kookterme beteken en hoe om kombuisgereedskap te gebruik. R280, Human & Rousseau (druknaam van NB-Uitgewers).

Hoenderkasserol
Hoenderkasserol

Hoenderkasserol

HAAL UIT  

  • oondskottel met deksel of tinfoelie (1,5 liter)
  • kombuispapier
  • maatbeker
  • skerp messie of skêr kapplank
  • papbord
  • vatlappies
  • houtlepel
  • skeplepel
  • koppie

WAT IS NODIG?   

  • 8 hoenderdye
  • 1 pakkie droë sampioensop
  • 300 ml appelkoossap
  • 250 g gewaste vars sampioene

GAAN SO TE WERK

1. Voorverhit die oond tot 160 °C.

2. Spoel die hoenderdye onder lopende koue water af. Droog elke stukkie af met kombuispapier. Sny sigbare stukke vet op die kapplank met die skerp messie af, of knip dit met die skêr af.

3. Knip die pakkie sop oop en skud die soppoeier in die papbord uit. Rol elke dy in die soppoeier en pak hulle in die oondskottel met die velletjies na bo.

4. Strooi die orige soppoeier bo-oor en giet die appelkoossap daaroor.

5. Sit die deksel op of bedek mettinfoelie en plaas in die oond.Laat dit 45 minute bak.

6. Haal dit uit die oond, maak versigtig oop sodat die stoom weg van jou ontsnap.

7. Roer die sampioene by sonder om die hoenderdye te breek en plaas die skottel sonder deksel nog 20-25 minute in die oond. Skakel die oond af. Haal uit.

8. Skep enige vet bo-op met die skeplepel in die koppie. Sit voor met rys.

Tuna­kasserol
Tuna­kasserol

Tuna­kasserol

HAAL UIT

  • blikoopmaker
  • oondskottel (1 liter)
  • klein mengbak en glasmaatbeker
  • draadklitser
  • vurk
  • koekroller
  • maatkoppies
  • maatbeker
  • vatlappies

WAT IS NODIG?

  • 1 blikkie (405 g) hoenderroomsop
  • 1 eier
  • 150 ml melk
  • 1 pak (125 g) aartappelskyfies of 500 ml (2 k) sagte broodkrummels, gemeng met 5 ml (1 t)sout
  • 1 blikkie (170 g) tuna
  • 250 ml (1 k) bevrore of ingemaakte ertjies

GAAN SO TE WERK

1. Voorverhit die oond tot 180 °C.

2. Sny die blikkie sop oop en giet die inhoud in die oondskottel.

3. Klits die eier en melk met die draadklitser saam in die mengbak en meng dit met die vurk by die sop in die oondskottel.

4. Skud die aartappelskyfies en rol dit met die koekroller fyn terwyl dit nog in die pak is. Roer 200 ml van die fyn skyfies of die broodkrummels by die sopmengsel.

5. Sny die blikkie tuna oop en laat die water of olie onder die deksel uitloop. Vlok die tuna met die vurk in die glasmaatbeker en roer dit ook by die sopmengsel.

6. Voeg die ertjies by. Meng alles weer en maak dit met die vurk bo-op gelyk. Strooi die orige fyn aartappelskyfies of broodkrummels bo-oor.

7. Bak die gereg 30-40 minute in die oond. Haal uit die oond met vatlappies. Skakel die oond af.

8. Sit voor met ’n mengelslaai.

Geurige maalvleis
Geurige maalvleis

Geurige maalvleis

HAAL UIT

  • groentemessie
  • kapplank
  • rasper
  • maatlepels
  • knoffeldrukker
  • mengbak
  • blikoopmaker
  • kastrol
  • houtlepel
  • skeplepel
  • opdienbak

WAT IS NODIG?

  • 30 ml (2 e) olie
  • 1 knoffelhuisie, gekneus
  • 1 groot ui, fyngekap
  • 1 wortel, geskil en fyngekap
  • 400 g maalvleis
  • 1 blik (400 g) gekapte tamaties 
  • 10 ml (2 t) droë basiliekruid
  • 30 ml (2 e) tamatiepasta
  • 5 ml (1 t) sout
  • 1 ml (¼ t) peper

GAAN SO TE WERK

1. Stel ’n stoofplaat op matige hitte. Plaas die kastrol op die stoofplaat.

2. Verhit die olie in die kastrol. Voegdie knoffel, ui en wortel by en roer­braai 6 minute. Voeg 15-30 ml (1-2 e) water by as dit wil begin brand.

3. Voeg die maalvleis by en braai sowat 12 minute oor matige hitte. Roer gereeld met die houtlepel sodat die vleis nie vasbrand nie. Druk die vleisklontjies fyn. Wees versigtig dat die stoom jou nie brand nie.

4. Sny die blik tamaties oop en roer dit by. Voeg dan die basiliekruid en tamatiepasta by en roer weer goed. Bring tot kookpunt en skakel dan die stoofplaat op lae hitte. Laat 40 minute prut. Skakel die plaat af.

5. Strooi die sout en peper oor, roer deur en skep in die opdienbak.

6. Sit die maalvleis voor op macaroni, roosterbrood of rys en saam met ’n mengelslaai.

Gebakte sagopoeding
Gebakte sagopoeding

Gebakte sagopoeding

HAAL UIT

  • mengbak
  • maatbeker
  • maatkoppies
  • maatlepels
  • teelepel
  • elektriese handklitser
  • oondskottel (inhoud: 1 liter)
  • kastrol
  • houtlepel 
  • vatlappies
  • oondpan
  • waterbeker

WAT IS NODIG?

  • 400 ml melk
  • botter of margarien
  • 50 ml sago
  • 2 eiers
  • 20-40 ml (4-8 t) suiker
  • 1 ml (¼ t) sout
  • 5 ml (1 t) vanieljegeursel

GAAN SO TE WERK

1. Meet 100 ml melk in die maatbeker uit en laat die sago 1 uur lank daarin week.

2. Voorverhit die oond tot 150 °C. Smeer die oond­skottel met die margarien of die botter.

3. Stel ’n stoofplaat op matige hitte. Giet die orige melk in die kastrol en laat kook.

4. Roer die geweekte sago by die warm melk. Roer gedurig met die houtlepel terwyl dit 5 minute kook. Skakel die plaat af.

5. Klits die eiers, suiker, sout en vanieljegeursel met die elektriese handklitser in die mengbak.

6. Roer die warm sagomengsel by die geklitste eiers en suiker.

7. Giet die mengsel in die gesmeerde oond­skottel. Plaas die oondskottel in die middel van die oondpan.

8. Tap warm water uit die kraan in die waterbeker. Giet die warm water rondom die oondskottel in die oondpan tot dit omtrent 2 cm diep is.

9. Skuif die oondpan na die middelste rak van die oond.

10. Bak die sagopoeding 45 minute lank. Haal versigtig uit die oond. Skakel die oond af.

11. Sit die poeding in bakkies voor met stroop of konfyt daarby.