VRAAG:

Hoe lyk ’n gesonde kosblik vir my Graad O-kind? En wat moet sy soggens eet voor sy skool toe gaan?

ANTWOORD:

ANEL KIRSTEN ANTWOORD: Die ideale ontbyt sluit ’n kombinasie van koolhidrate, proteïen en vesel in.

Koolhidrate is ’n onmiddellike bron van energie en proteïen, en vesel laat jou kind versadig voel. Dit help ook om die spysverteringskanaal gereeld te hou.

Kies ’n graankos of pap met ’n lae glisemiese indeks (GI) soos hawermoutpap, muesli of volgraan-graanvlokkies. ’n Alternatief kan wees lae-GI-roosterbrood met grondboontjiebotter, avokado of eier.

As dinge baie gejaag is en daar nie tyd vir eet is nie, kan jy seker maak daar is altyd “gryp-en-hardloop”-alternatiewe beskikbaar soos vars vrugte, individuele klein houertjies jogurt, klein pakkies onversoete droë vrugtevlokkies en onversoete vrugtestafies.

’n Maaltydvervanger-drankie is altyd vinnig, gerieflik en kan voedsaam wees indien die korrekte drankie gekies word. Maak seker dit bevat genoeg proteïen, min suiker en ’n wye reeks vitamiene en minerale.

Maak ’n gladdejantjie deur vrugte, jogurt, ys, semels en vrugtesap of melk te meng – jy kan selfs ’n bietjie weiproteïen-poeier byvoeg vir ekstra voedingswaarde.

Supermarkte verkoop soms gladdejantjies wat drinkgereed is – lees net die etiket versigtig! Hou die kosblik gebalanseerd maar ook interessant met ’n mengelmoes van items.

Sluit ’n bron van proteïen in (soos kouevleis, ’n hardgekookte eier, hoenderrepies, biltong, droëwors, neute of suiwel soos kaaswieletjies of -wiggies, jogurt of vla) en ’n bron van stysel (soos ’n toebroodjie, rolletjie, pita, tortilla, pastaslaai of beskuitjies soos Provitas).

Vir die nodige fitovoedingstowwe benodig jy ook vrugte en/of groente (soos heel vrugte, droëvrugte of ’n sosatiestokkie waaraan vrugteblokkies of groente soos klein tamaties, heel rou sampioene en wortel- of soetrissieblokkies geryg is).

Beperk die bederfies (sjokolade, koek en koekies, pretzels of aartappelskyfies) tot een keer per week.

Ontbytstafies kan ook ’n lekker vinnige opsie wees, vir ontbyt of vir die kosblik. Onthou net dat die voedingswaarde van baie ontbytstafies soortgelyk is aan dié van ’n sjokoladestafie en dat hulle dikwels baie suiker bevat. Lees die etiket deeglik voor jy die stafie in jou winkeltrollie gooi.

Bak vooraf lae-GI-kolwyntjies vir die kosblik of om sommer in die kar op pad skool toe geëet te word.

Blokkies van ’n tuisgemaakte korslose souttert kan met die hand geëet word en is ’n maklike opsie vir die kosblik.

As julle soggens te veel jaag om nog ontbyt ook te geniet, is dit veral belangrik dat die kosblik gesond en gebalanseerd is om vir die verlore ontbyt op te maak.