Eiergesin
Eiergesin

Eiergesin

Jy het nodig

  • 5 eiers
  • wit papier
  • inkleurpotlode
  • skêr
  • gom
  • viltpen

Maak so

1. Plaas die eiers in ’n pot met koue water en plaas dit op ’n warm plaat. Bring die water tot kookpunt. Skakel die plaat af en plaas ’n deksel op die pot. Laat die eiers sowat 15 minute prut. Verwyder die pot van die hitte en spoel die eiers onder koue water af.

2. Teken vir elke gekookte eier ’n kenmerk op wit papier, soos haasore of ’n deftige hoed. Trek met ’n liniaal twee strepe aan die onderkant, middel of bokant van die prentjie (afhangende van hoe jy die prentjie gaan gebruik) om ’n strook te vorm. Kleur jou prentjie in en knip dit asook die groot wit strook uit.

3. Plak dit met gom op die gekookte eier vas en teken vir elke eiermannetjie ’n gesiggie met ’n swart viltpen.

Eiers wat mooi maak.

Eiers wat mooi maak

Jy het nodig

  • 6 wit lekkergoedsjokolade-eiers
  • dun tou
  • harde versiersel (resep onder)
  • verskillende kleure voedselkleursel wat by jou kleurskema pas

Maak so

1. Stal die eiers uit deur dit aan boomtakke te hang: Knip die tou in kort stukkies. Plak dit met harde versiersel op die bopunt van die eiers vas en laat dit droog word. Maak die twee punte van die tou aan mekaar vas. Die eiers is taamlik swaar en kan nie te lank hang nie – wag tot net voor die gaste opdaag voor julle dit aan die takke hang.

2. Jy kan van die eiers met voedselkleursel kleur. Verdun die kleursel eers met ’n bietjie water en doop die eiers stadig daarin. Laat dit goed droog word. Beproef verskillende patrone en doopeffekte. 3. Gebruik harde versiersuiker om suikerblommetjies of -balletjies op die eiers vas te plak. Jy kan ook ’n viltpen met eetbare ink inspan om mooi boodskappe op die eiers te skryf of prentjies te teken.

Harde versiersel

Bestanddele

  • 2 groot eierwitte
  • 750 ml (3 k) versiersuiker
  • 5 ml (1 t) suurlemoensap

Metode

1. Voeg die eierwitte en versiersuiker saam in ’n mengbak. Klits sowat 5 minute met ’n elektriese klitser tot dit glansend is. Roer die suurlemoensap met ’n draadklitser by en klits nog ’n minuut of wat. Verdeel die versiersel in verskillende bakkies en kleur dit met voedselkleursel. Smeer dit met ’n mes op die Paasversierings.

2. Volg vinnig met die versierings voor die versiersuiker hard word. Jy kan suikerblomme, -voëls, kraletjies en ander mooi lekkernye gebruik.

Vrolike southappie

Vrolike southappie

Jy het nodig

  • 6 eiers
  • 6 verskillende kleure voedselkleursel soos blou, geel, rooi, pienk, groen en oranje
  • mayonnaise na smaak (sowat 125 ml)
  • water
  • kombuispapier
  • spuitsak

Maak só

1. Eiers: Plaas die eiers in ’n pot met koue water en plaas dit op ’n warm plaat. Bring die water tot kookpunt. Skakel die plaat af en plaas ’n deksel op die pot. Laat die eiers sowat 15 minute prut. Verwyder die pot van die hitte en spoel die eiers onder koue water af. Laat dit effens afkoel voor jy dit afdop. Gebruik ’n teelepel om dit makliker te maak. Sny die gekookte eiers oor die lengte middeldeur en verwyder die eiergele. Meng die gele in ’n aparte bakkie met die mayonnaise. Bedek die eiergeelmengsel en plaas dit in die yskas. Spoel die eierwitte onder koue water af sodat daar geen stukkies eiergeel agterbly nie.

2. Kleursel: Kry vir elke kleur wat jy wil gebruik ’n glas gereed. Drup ’n paar druppels kleursel in ’n glas en voeg so 2 cm water by. Meng dit goed met ’n lepel. Herhaal die proses met die ander kleure in die ander glase.

3. Afronding: Plaas 2 eierwitte sowat 5 minute in elke glas tot dit ’n helder pastelkleur kry. Laat dit op kombuispapier droog word. Skep die eiergeelmengsel in die spuitsak en spuit dit in die gekleurde eierwitte.

Sjokoladestokkie-eiers

Sjokoladestokkie-eiers

Jy het nodig

  • 125 ml (½ k) gouestroop
  • 90 ml (6 e) botter, sag gemaak
  • 5 ml (1 t) vanieljegeursel
  • 875 ml (3½ k) versiersuiker
  • 2 ml (½ t) sout
  • 2 ml (½ t) geel voedselkleursel
  • 325 ml (1½ k) donkersjokolade, gekap (of gebruik ’n pak wat smeltgereed is)
  • houtstokkies
  • blok FoamaLite of iets anders waarin die houtstele regop kan staan
  • kleefplastiek
  • waspapier

Maak so

1. Klits die stroop, botter en vanieljegeursel saam. Skraap die bak se kante skoon en maak seker dat alles goed gemeng is. Sif die versiersuiker en sout apart en voeg dit bietjie vir bietjie by die bottermengsel terwyl jy dit teen ’n stadiger spoed klits. Meng tot glad.

2. Skep ’n derde van die vulselmengsel in ’n aparte bak en meng dit met die geel voedselkleursel. Dit gaan die binnekant van jou eier vorm. Bedek die bakke met kleefplastiek en plaas sowat 15 minute in die yskas sodat dit afkoel.

3. Die mengsel moet koel bly terwyl jy daarmee werk, want dit smelt baie maklik. Maak ook seker dat jou hande koud bly. As dit warm in die kombuis is, kan jy die mengsel binne-in ’n bak met koue water sit.

4. Haal die geel mengsel uit die yskas en rol dit in balletjies met ’n deursnee van 1½-2 cm. Plaas dit op die waspapier en plaas ’n paar minute in die vrieskas. Dit moenie vries nie, net baie koud word.

5. Verwyder die balletjies uit die vrieskas en die wit mengsel uit die yskas. Vorm ’n ronde wit balletjie in jou hand wat omtrent dubbel die grootte van die geel balletjies is. Druk dit plat en plaas ’n geel balletjie binne-in. Rol die wit om die geel en vorm ’n eier. Hou die eiers klein, tussen 4 en 5 cm.

6. Druk die onderkant van die voltooide eier in die houtstokkie. Druk dit in die FoamaLite en verkoel ’n paar minute in die ys- of vrieskas.

7. Smelt intussen die sjokolade deur water in ’n pot te kook en ’n glasbak in die pot te balanseer. Die glasbak moenie aan die water raak nie. Smelt die sjokolade in die glasbak. Maak seker die water raak nie op nie, want dan sal die sjokolade brand.

8. Stel die hitte laer sodat die sjokolade nie brand nie, maar louwarm en vloeibaar bly.

9. Haal die eiers een vir een uit die yskas en doop dit in die sjokolade. Laat die oortollige sjokolade versigtig afdrup en plaas terug in die yskas. Jy kan die sjokolade ook met ’n lepel oor die eier versprei. Plaas terug in die yskas tot die sjokolade hard is.