Gestopte hoenderdye

GESTOPTE HOENDERDYE

Deur vulsel onder die vel in te stop, sorg jy dat die geure regdeur die vleis trek en dat die vel bros bak.

Genoeg vir 6 mense

Bestanddele

  • 6-8 groot hoenderdye met vel en been
  • 2 wiele fetakaas, fyn gekrummel
  • 100 g ontpitte groenolywe, fyn gekap
  • 5 ml (1 t) tiemieblaartjies, baie fyn gekap
  • fyngerasperde skil en sap van 1 suurlemoen
  • olyfolie
  • sout en pas gemaalde swartpeper na smaak
  • vars pietersielie vir afronding

Maak so

Voorverhit die oond tot 190 °C.

1. Maak die vel van die hoender liggies los sonder om dit heeltemal af te trek – dit moet ’n sakkie vorm.

2. Meng die fetakaas, olywe, tiemie en suurlemoenskil goed saam en skep ’n lepel daarvan tussen die vel en vleis van elke hoenderdy.

3. Versprei die vulsel egalig en trek die vel terug oor die vulsel. Pak in ’n oondbak. Druk die suurlemoensap oor die hoender uit en bedruip met ’n bietjie olyfolie.

4. Geur elke hoenderdy bo-op goed met sout en peper. Bedek met foelie of ’n deksel en bak 30 minute.

5. Verwyder die foelie of deksel, verlaag die oondtemperatuur tot 170 °C en bak nog 20-30 minute tot die vel bros en die vleis sag en sappig is.

6. Rond af met die vars pietersielie.

7. Sit voor met aartappels, rys of koeskoes en groente of slaai van jou keuse.

Botterskorsie met maal­vleis-en-kaasvulsel

BOTTERSKORSIE MET MAALVLEIS-EN-KAASVULSEL

Genoeg vir 4 mense

Bestanddele

  • 2 klein botterskorsies, in die lengte deurgesny
  • 30 ml (2 e) olie
  • 1 ui, gerasper
  • 2 knoffelhuisies, fyn gedruk
  • 2 brandrissies, pitte verwyder en fyn gekap
  • 5 ml (1 t) komyn
  • 5 ml (1 t) koljander
  • 250 g beesmaalvleis
  • 80 ml (¹/³ k) water
  • 45 ml (3 e) gekapte pietersielie
  • sout en pas gemaalde swartpeper na smaak
  • 125 ml (½ k) ricottakaas
  • 125 ml (½ k) gekrummelde fetakaas
  • brandrissiesous van jou keuse
  • 2 avokado’s, in klein blokkies gesny en met suurlemoensap besprinkel
  • vars koljanderblare vir afronding

Maak so

Voorverhit die oond tot 180 °C en voer ’n bakplaat met foelie uit.

1. Skep die botterskorsiepitte uit en verf elke botterskorsiehelfte met ’n lagie olie. Bak 30 minute tot halfgaar.

2. Verhit intussen die res van die olie in ’n pan en braai die ui, knoffel en brandrissies daarin tot sag. Voeg die komyn en koljander by en braai tot geurig.

3. Voeg die vleis by en braai tot bruin en gaar. Voeg die water by, verhit tot kookpunt en laat prut tot afgekook.

4. Roer die pietersielie, sout en peper by en verdeel die vulsel tussen die vier halwe botterskorsies.

5. Bak die gevulde skorsies 25 minute tot dit heeltemal sag is. Meng die ricotta- en fetakaas, sprinkel oor die skorsies en plaas nog 5 minute in die oond tot die kaas deurwarm is.

6. Skep die brandrissiesous en avokadoblokkies oor. Rond af met die vars koljanderblare en sit voor met ’n groenslaai.

Pangebraaide varklies met appels en bloukaas

PANGEBRAAIDE VARKLIES MET APPELS EN BLOUKAAS

Appel, varkvleis en bloukaas bly ’n fantastiese kombinasie.

Genoeg vir 4 mense

Bestanddele

  • olie en botter
  • 2 groot varklies-steaks, gehalveer
  • sout en pas gemaalde swartpeper na smaak
  • 3 kleinerige Golden Delicious-appels, gehalveer
  • 180 ml (¾ k) water
  • 1 botteltjie (340 ml) appelbier, soos Savanna
  • 125 ml (½ k) suurroom
  • halwe wiggie (50 g) romerige bloukaas, grof gekrummel
  • 30 ml (2 e) heuning

Metode

1. Verhit die olie en botter in ’n groot swaarboompan. Geur die 4 steaks goed met die sout en peper en braai dit in die botter-en-oliemengsel tot goudbruin.

2. Voeg die appels by. Braai die appels met die gesnyde kant na onder tot goudbruin en draai dit dan om sodat die gesnyde kant boontoe wys. Voeg die water by en laat opkook.

3. Voeg die appelbier by, bedek die pan en verlaag die hitte. Laat prut tot die vleis sag en gaar is. Verwyder die deksel en laat die pansouse afkook tot daar sowat 180 ml (¹/³ k) sous in die bak oorbly.

4. Skep lepels suurroom in die pan en sprinkel die bloukaas oor.

5. Drup heel laaste die heuning oor. Laat prut tot die suurroom, bloukaas en heuning gesmelt het en deel van die sous vorm.

6. Sit die gereg voor op fyngemaakte patat en skep ’n lepel van die romerige pan- sous oor. Sit voor met slaai.

Kaasfees toe!
Die bekroonde SA Kaasfees, die grootste buitelug-kosgebeurtenis in Afrika, duur drie dae en word van Vrydag 27 April (Vryheidsdag) tot Sondag 29 April op die plaas Sandringham buite Stellenbosch gehou. Vermaak sluit uitstekende musiek in, asook aanbiedings deur bekende sjefs en klein kaasmakers plus aktiwiteite vol pret vir kinders en tieners, waaronder ’n kaaskerfkompetisie. Kaartjies is beskikbaar by Computicket, Shoprite en Checkers teen R180 per persoon per dag. Senior burgers betaal R120 en kinders tussen 2 en 13 betaal R20. Geen kaartjies sal by die hek verkoop word nie. Die feestye is van 10:00 tot 18:00 daagliks. Twitter: @SACheeseFest, Facebook: @SACheeseFestival, Instagram: @sacheesefest of gaan na cheesefestival.co.za
Resepte verskaf deur Landbouweekblad. Foto’s: Myburgh du Plessis vir LANDBOUWEEKBLAD en My Easy Cooking