Voel dit vir jou jou kind het vyf jaar laas groente geëet, al is hy net vier jaar oud? Dan het dit tyd geword om die groente tussen ander kos weg te steek ...

Die resepte hieronder help jou om dit te doen met geregte waarvan kinders hou. Dieetkundiges is nie gek daaroor om groente te verdoesel nie, want hulle meen kinders moet leer om groente net so te geniet. As dit altyd weggesteek is, leer hulle dit nie ken nie en sal hulle dalk later nie gesonde keuses maak nie.

Moet dus nie nét verdoeselde groente voorsit nie. Maak seker jou kinders kry met elke maaltyd steeds herkenbare groentehappies.

Maar as jou aapstert aanhou om sy neus daarvoor op te trek, sal die resepte hieronder jou help om minder bekommerd en gespanne te voel.

Sop

Sop is natuurlik die koning van verdoeselde groente, want dit bestaan in elk geval mos maar meestal uit groente. Vir ekstra oemf kan jy ’n blik witbone fynmaak en by enige sop voeg. Dit maak die sop dik en meer voedsaam.

Frikkadelle

  • 4 murgpampoentjies
  • 1 ui
  • 1 wortel
  • 5 sampioene
  • 500 g maalvleis
  • 1 eier, geklits
  • sout na smaak

Kap die murpampoentjies, ui, wortel en sampioene in ’n voedselverwerker fyn. Meng dit met die vleis en eier en geur met die sout. Vorm klein frikkadelletjies en braai dit in vlak olie of rooster dit in die oond tot gaar.

Kapokaartappel #1

  • 4 groot aartappels
  • ½ kop blomkool
  • bietjie melk en botter
  • sout na smaak

Kook die aartappels en blomkool tot heeltemal sag. Voeg die melk en botter by, geur met die sout en maak fyn. Die blomkool verdwyn heeltemal in die mengsel. Jy kan dieselfde doen met broccoli, hoewel dit sigbaar gaan wees as groen spikkels in die kapokaartappel.

Kapokaartappel # 2

Maak ewe veel gaar aartappel en patat saam fyn. Dit werk ook uitstekend as bolaag op ’n herderspastei. Patat is baie voedsaam.

Vleissous

Voeg ’n groot hand vol spinasieblare en ’n gerasperde wortel of twee by jou gewone bolognaisesous en maak dit met ’n stokmenger fyn.

Tuisgemaakte tamatiesous

  • 1 ui, fyngekap
  • 1 selderystingel, fyngekap
  • 1 rooi soetrissie, fyngekap
  • olyfolie
  • 2 blikkies (410 g elk) gekapte tamatie
  • 1 sakkie (50 g) tamatiepuree
  • 1 wortel, gerasper
  • 2 murgpampoentjies, gerasper
  • sout na smaak

Braai die ui, seldery en soetrissie in ’n bietjie olyfolie tot sag. Voeg al die ander bestanddele by en laat sowat 30 minute prut. Maak fyn met ’n stokmenger. Gebruik die sous as pastasous, doopsous of pizza-bolaag.

Gebak

Almal ken piesangbrood, maar jy kan ander vrugte ook inspan wanneer jy bak. Eksperimenteer met fyngemaakte appel, peer of pruim in jou gunsteling bakresepte. Jy kan tot die helfte van die suiker met puree vervang. Selfs soet groente soos pampoen, botterskorsie en soetpatat werk goed. Dink maar net aan ’n lekker wortelkoek! Puree dit of rasper dit om ’n growwer tekstuur te verkry.

Onthou die volgende as jy nie wil hê die vrugte- of groentesmaak moet oorweldigend wees nie: Appel- en peerpuree het ’n matige smaak en werk dus in koek of koekies. Sterker smake soos piesang, pruim of pampoen werk goed in resepte met kaneel, neutmuskaat of ander speserye. Piesang is ook ’n goeie pasmaat vir grondboontjiebotterresepte. Pruime kan weer goed weggesteek word in sjokolade-bruintjies. Gerasperde beet kan goed in sjokoladekoek verdoesel word.

As jy skepties is, begin geleidelik deur eers ’n derde van die suiker in die resep met dieselfde hoeveelheid puree te vervang. As dit goed werk, kan jy volgende keer helfte puree en helfte suiker beproef.

Vetkoek

Voeg ’n skep suikermielies by jou vetkoekbeslag. As die sigbare mieliepitte ’n probleem gaan wees, kan jy dit eers fynmaak. Dié vetkoek is besonder lekker saam met stroop.

Aanhouer wen!

Stel jou baba voor sy eerste verjaardag aan soveel groente in hul natuurlike vorm as moontlik voor. Dis die beste medisyne teen toekomstige fiemies. Dit kan tot 20 keer se probeer kos voor jou baba die groente geniet. Kyk watter vorm die beste werk: fyngemaak, rou, gerasper, saggekook, gemeng met ander groente, gerooster, as vingerkos of met ’n kaassousie.