Baie dankie aan die South African Mushroom Farmers’ Association, wat die resepte en foto’s verskaf het.
Eiers in gebakte sampioennessies

ONTBYT

Eiers in gebakte sampioennessies

Genoeg vir 4 mense

Bestanddele

  • 30 g botter
  • 1 klein ui, gekap
  • 500 g knopiesampioene, ontstingel en in skyfies gesny
  • 125 ml (½ k) vars room
  • sout en peper na smaak
  • 4 eiers
  • 50 g gerasperde goudakaas
  • 30 g gekapte pietersielie

Maak so

Voorverhit die oond tot 200 °C.

1. Smelt die botter in ’n pan en braai die ui tot deurskynend. Voeg die sampioene by en braai sowat 3 minute.

2. Roer die room by en laat dit afkook. Geur na smaak met die sout en peper.

3. Skep die sampioenmengsel in vier klein gebotterde oondvaste bakkies.

4. Druk ’n holte in elke mengsel en breek ’n eier in elk. Sprinkel sout oor, bedek met die gerasperde kaas en bak sowat 12 minute in die voorverhitte oond tot die eier gaar, maar die gele nog sag is.

5. Verwyder uit die oond, besprinkel met die pietersielie en sit voor met roosterbrood.

Sampioene en botterbone op roosterbrood

MIDDAGETE

Sampioene en botterbone op roosterbrood

Genoeg vir 4 mense

Bestanddele

  • 1 e (15 ml) kookolie
  • 1 groot ui, fyngekap
  • 4 knoffelhuisies, fyngekap
  • 250 g bruinsampioene
  • 3 groot tamaties, geskil en gekap
  • 1 blik (400 g) botterbone, gedreineer
  • 1 e (15 ml) vars suurlemoensap
  • 1 e (15 ml) bruinsuiker
  • sout en peper na smaak
  • 1 e (15 ml) vars pietersielie, fyngekap
  • 4 snye gebotterde roosterbrood
  • pietersielie vir oorsprinkel

Maak so

1. Verhit die olie in ’n pan en voeg die ui by. Braai oor matige hitte tot sag. Voeg die knoffel by en braai 1 minuut.

2. Vee die sampioene skoon en sny in dik skywe. Voeg by die ui en braai bruin.

3. Voeg die tamaties by en laat prut. Voeg die bone by en laat prut tot die sous begin verdik. Roer die suurlemoensap en suiker by. Voeg die sout en peper by.

4. Skep van die mengsel bo-op ’n sny gebotterde roosterbrood en besprinkel met die pietersielie.

Tagliatelle met sampioene en witpeper

AANDETE

Tagliatelle met sampioene en witpeper

Genoeg vir 4 mense

Bestanddele

  • 400 g vars tagliatelle
  • 250 g witsampioene
  • 60 ml (¼ k) olyfolie
  • 250 ml (1 k) gerasperde parmesaankaas
  • 5 ml (1 t) witpeper
  • gekapte Italiaanse pietersielie

Maak so

1. Kook die tagliatelle in soutwater volgens die aanwysings op die pakkie. Dreineer en hou ’n bietjie kookwater eenkant.

2. Vee die sampioene skoon en sny in dik skywe. Verhit 30 ml olyfolie in ’n groot kastrol en braai die sampioene oor hoë hitte tot mooi bruin. Hou eenkant.

3. Gooi die kaas in ’n groot mengbak en voeg die oorblywende olyfolie en witpeper by. Meng tot ’n romerige pasta vorm. Voeg die pasta-kookwater by.

4. Voeg die gedreineerde tagliatelle by die kaasmengsel en meng goed. Voeg die sampioene by en meng goed.

5. Besprinkel met die pietersielie en sit onmiddellik voor.