Rede #1

Geen newe-effekte van medikasie nie

Waarskynlik die enkele grootste rede waarom vroue ’n natuurlike geboorte verkies is omdat jou baba die invloed van medikasie vryspring en jy so normaal moontlik kan kraam.

Of en hoe erg medikasie jou baba tydens ’n normale bevalling aantas, hang af van die soort middel, die manier van toediening, en wanneer in die bevallingsproses dit toegedien word. 

Middels wat ingespuit word, steek die plasenta byvoorbeeld vinniger oor as mondelikse middels. Sou medikasie wel die plasenta oorsteek, sal jou baba se Apgartelling waarskynlik laer wees en kan dit sy hartklop en asemhaling tydelik aantas.

In die geval van epidurale verdowing is die grootste risiko vir jou baba dat jou bloeddruk erg kan daal, wat bloedvloei na jou kleinding kan belemmer. Dit kan veroorsaak dat jou baba nie genoeg suurstof kry nie.

Epidurale verdowing verhoog ook die moontlikheid van ’n keisersnee effens omdat dit soms jou vermoë om te druk ondermyn as jy nie die kontraksies kan voel nie. Dit het weer ander implikasies vir jou baba.

Rede #2

Beter binding en borsvoeding

Met sowel epidurale verdowing (normale geboorte) as ’n spinale blok (keisersnee) kan jy die geboorte en eerste oomblikke saam met jou baba beleef, maar selfs met ’n normale geboorte kan jy ná ’n epiduraal dit moeilik vind om jou baba te hanteer omdat jy minder beweeglik is. 

Met ’n natuurlike geboorte kan jy uit die staanspoor jou baba by jou hou en self versorg.

Omdat sowel ma as baba ná ’n natuur­like geboorte geen newe-effekte van medikasie het nie, is albei baie “wakkerder” en kan hulle dus makliker bind. Hulle is ook meer gereed om dadelik met borsvoeding weg te spring.

As medikasie die plasenta oorgesteek het, kan die baba aanvanklik met borsvoeding sukkel. 

Navorsing het gewys dat babas wat die lewe deur ’n natuurlike geboorte binnekom, wakkerder is en meer belangstelling toon in pre-borsvoedingsgedrag soos suig en massering van hul ma se bors. Hulle drink ook langer tye in die eerste uur en ’n half. 

Natuurlik kraam is ’n uitdaging en die geboorte kan vergelyk word met ’n atleet se finale poging om ’n wedren te wen. Agterna smaak jy dieselfde gevoel van oorwinning. Daar word ook gemeen dat die kontraksies en gang deur die geboortekanaal baba so masseer dat al sy stelseltjies vir werking voorberei word.

Rede #3

Beter beskerming teen kieme

Tydens ’n vaginale geboorte kry ’n baba blootstelling aan sy ma se perineum, waar hy kontak het met haar natuurlike bakte­riële flora. 

As jou baba direk ná die geboorte aan jou bors geplaas word en kolostrum drink, kry hy die teenliggaampies teen die einste bakterieë in, wat hom onmiddellik ’n groter weerstand gee. 

Dis omdat jou borsmelk reeds teenliggaampies teen die kieme in jou lyf bevat. 

Jou baba word dus eers met jou bakterieë ”gekoloniseer”, en dan met borsvoeding weerstand daarteen gegee. Die gevolg: ’n laer risiko vir infeksie. 

Jou borsmelk stimuleer ook die groei van die veilige kieme in jou baba se dermkanaal, wat hom nog meer bestand maak.

Rede #4

Gesonde longe

Die drukking wat jou baba in die geboortekanaal ondervind help om die vog uit sy longe te verwyder. 

As ’n baba normaal verlos word, is daar gewoonlik geen vog in sy longe oor teen die tyd dat hy gebore word nie. Keisersneebabas se longe is vol vog en dit kan tussen 24 en 48 uur duur voor dit weg of geabsorbeer is.

Rede #5

Meer bloed vir baba

Sowat 25 persent van ’n baba se normale bloedvolume is in die plasenta. Met ’n normale verlossing trek die baarmoeder saam en druk teen die plasenta sodat hierdie bloed uit die plasenta tot in die baba se sirkulasiestelsel vloei. En dis baie belangrik dat ’n baba met sy volle bloedvolume gebore word.

Sowat 25% van ’n baba se normale bloedvolume is in die plasenta

Voordele vir ma

Vroue is gewoonlik vinnig op die been ná ’n natuurlike geboorte – hulle kan letterlik direk ná die geboorte rondbeweeg en hul baba borsvoed – en bly ook korter in die hospitaal. Onlangse studies het getoon dat die gebruik van medikasie dit moeiliker maak om van posisie te verander, selfs ná geboorte.

Jy vermy die moontlike komplikasies wat gepaard kan gaan met ingrypings soos narkose of epidurale verdowing. Omdat daar geen keisersnee is nie, is daar ook geen maagsnit nie en is die risiko vir komplikasies ná die operasie (bloeding, infeksie, die nodigheid van ’n bloedoortapping) alles minder.

Medikasie kan nie inmeng met die normale prosesse van geboorte nie. Studies het byvoorbeeld getoon epidurale verdowing verleng die drukfase en kan die geboorteproses vertraag en dit moeiliker maak om baba uit te druk – wat uiteindelik ’n instrumentverlossing of selfs ’n keisersnee nodig kan maak.

Sonder pynmedikasie kan jy makliker rondbeweeg en die geboorte so aanhelp, sodat jy uiteindelik makliker kraam. Omdat jy jou liggaam se reflekse beter kan voel met natuurlike geboorte, kan jy oor die algemeen makliker en beter druk. Geboorte­pyne het ook ’n funksie: Dit dwing jou om van posisie te verander, wat weer die geboorte makliker maak.

Natuurlike geboorte bemagtig jou. Dit laat jou voel asof jy enigiets kan vermag. Nageboortelike depressie kom minder voor en is meestal van korter duur omdat jy gesond voel en krag het.