Jou swanger lyf het groter voedingsbehoeftes. In die tweede en derde trimester het jy onderskeidelik 1420 kJ en 1889 kJ ekstra per dag nodig.

Jy kan dit maklik inkry deur ’n glas laevetmelk, ’n vrug en ’n sny brood of twee en twee eetlepels vleis ekstra in te neem. Om gesond te bly en om jou baba se gesondheid te help verseker, kan jy gerus ook ’n bietjie meer klem lê op van die volgende wanneer jy jou maaltye beplan.

Vitamien A

… is nodig vir vroeë selontwikkeling. Die beste manier om dit in te kry, is in die wateroplosbare vorm, betakaroteen. Dit kom voor in geel groente en vrugte soos wortels, pampoen, papaja, mango, geelspanspek, patats en groen blaargroente soos spinasie.

Te veel van dié vitamien is egter skadelik en kan misvorming veroorsaak. Beskerm jou en jou baba daarteen deur orgaanvleis te vermy en ook seker te maak dat jou aanvulling nie meer as 1500 μg (mikrogram) vitamien A bevat nie.

Vetsure

Die omega 3-vetsuur DHA is belangrik vir die ontwikkeling van die sentrale senustelsel asook visuele en verstandelike ontwikkeling. Jy het 200 mg DHA per dag nodig, wat jy kan inneem deur een tot twee keer per week seevis soos snoek, bottervis, makriel, ansjovis, sardiens, sardyne of haring te eet. Jy kan ook vissmeer eet of ’n aanvulling drink.

Foliensuur

Foliensuur beskerm jou baba teen neuraalbuis-afwykings soos spina bida, mits jy genoeg daarvan inkry voor jou swangerskap en in die eerste trimester. Jy behoort dus al voor jy swanger raak 400 μg foliensuur per dag in te neem deur aanvullings of verrykte kos bo en behalwe die foliensuur in kos.

Wanneer jy swanger is, verhoog dit na 600 μg. Foliensuur kom voor in spinasie, aspersies, broccoli, lemoensap, volgrane, droë bone, eiers en gis.

Aanvullings

Dis ’n goeie plan om ’n multivitamienen- mineraalaanvulling te drink as jy ystertekort-anemie het, nie gebalanseerd eet nie of vegetaries is. As jy meer as een baba verwag of MIV-positief is, is ’n aanvulling ook belangrik. Kies een wat spesiaal vir swangerskap geskep is.

Proteïen

Proteïne is nodig vir die bou van jou en jou baba se liggaamselle. Jy het 25 g meer as gewoonlik nodig en kan dit inkry deur meer melk te drink en jou porsie vleis, hoender of vis groter te maak.

Ander bronne van proteïen is eiers, kaas, bone, lensies en neute. Dié kosse is gelukkig ook goeie bronne van sink, ’n mineraal wat belangrik is vir die groei en ontwikkeling van jou baba.

Yster

Jy het dubbel soveel nodig tydens jou swangerskap! Eet elke dag kosse hoog in heemyster soos vleis, hoender en vis. Nieheemyster soos droëbone, spinasie, eiergeel en volgrane moet saam met vitamien C ingeneem word om die absorpsie daarvan te bevorder. Dis ’n uitdaging vir die liggaam om genoeg te absorbeer – gesels dus met jou dokter oor ’n aanvulling.

Kalsium

Kalsium is nodig vir die vorming van jou baba se beendere. Jy het 1000 mg per dag nodig – net soveel soos gewoonlik. Tydens swangerskap absorbeer jou lyf die kalsium beter. Jy kan dit maklik inkry met drie koppies melk of jogurt per dag. Ander bronne sluit in neute, broccoli, geblikte sardientjies of salm met grate.

Vitamien D

Te min vitamien D kan die fetus se beenvorming knou. Om vitamien D in te kry, moet jy twee keer per week 15 tot 30 minute in die son sit. Jy kan ook margarien eet wat met vitamien D versterk is, of ’n aanvulling oorweeg.

Loop lig vir

  • Kruie- en plantkure Hou eerder by medikasie wat as veilig tydens swangerskap bewys is.
  • Lewertraanolie is beslis nie geskik tydens swangerskap nie.
  • Alkohol Skakel dit heeltemal uit.
  • Eiervrug Dit bevat baie nikotien, wat sleg is vir jou baba. Te veel blomkool, groen tamaties en tamatiepuree is om dieselfde rede ook nie goed nie. Beperk dit en eet liewer ander groentesoorte.
  • Rou of halfgaar kos Dit sluit in soesji, gerookte salm, carpaccio, biltong, droëwors en saggekookte eiers, roomys wat rou eier bevat en mayonnaise wat rou eier bevat. Rou kos kan besmet wees met goggas soos Listeria, E. coli, Campylobacter, Salmonella of toksoplasmose, wat alles gevare vir jou baba inhou. Oppas ook vir gekraakte eiers. Moenie rou deeg eet nie.
  • Ongepasteuriseerde kase soos feta, brie, camembert, roquefort en ander bloukaas. Eet liewer cheddar, gouda, maaskaas of kaassmere.
  • Verwerkte koue vleis soos ham, polonie, salami en Weense worsies, en gerookte seekos en klaarbereide slaaie in supermarkte soos koolslaai. Behalwe dat verwerkte kos nie juis gesond is nie, is daar ook ’n groter risiko vir ’n Listeria-infeksie. As jy dié vleis wil eet, maak seker dis tot kookpunt verhit.
  • Rou groentespruite As dit gaargemaak is, kan jy dit egter eet.
  • Verkoelde patees en vleissmere Kies eerder geblikte of gebottelde patee of vleissmeer, maar moenie te veel daarvan eet nie, want dit bevat dikwels orgaanvleis soos lewer wat baie vitamien A bevat. Te veel daarvan is nie goed vir jou baba nie.
  • Kofe, tee, koladrankies en sjokolade Hou matigheid voor oë, want te veel kafeïen is sleg vir jou baba.
  • Vars vis Salm, tuna, marlyn, haai, swaardvis en koningmakriel moet beperk word tot een tot twee porsies per week omdat dit kwik kan bevat. Koop vis wat as laag in kwik aangedui word