Uiteindelik is jy swanger! Nou kan jy eet wat jy wil en die ekstra vetjies onder lospassende kraamklere wegsteek – of so dink jy dalk. Moet egter nie net begin eet nie, want dis nou die tyd dat jou liggaam op sy gesondste moet wees omdat jóú gesondheid ook jou baba se gesondheid beïnvloed. Ons weet almal dit is nie lekker of goed vir jou as jy oorgewig is nie, maar met ’n baba in jou maag is dit vir julle albei nog slegter.

Die beste is dus om ’n ideale gewig te bereik voor jy swanger raak. As jy sukkel om swanger te raak, kan dit help om ’n paar kilo’s af te skud omdat oorgewig onvrugbaarheid kan aanhelp.

Hoekom eers verslank?

As jy nie swanger is nie, beïnvloed die ekstra gewig wat jy saamsleep net jou eie gesondheid. Gevolge van oorgewig sluit in ’n groter gevaar van diabetes, hoë bloeddruk, hartsiektes en sommige soorte kanker.

As jy swanger raak, het die vetrolle­tjies egter nie meer net op jou ’n invloed nie, maar ook op jou ongebore baba. Hoe meer oorgewig jy is, hoe groter is die gevaar van komplikasies.  Oorgewig verhoog die risiko van ’n miskraam en kan selfs ’n rol in doodgeboorte speel. Jy kan ook makliker hoë bloeddruk en preëklampsie opdoen. Laasgenoemde is vir sowel ma as baba baie gevaarlik.

Oorgewig verhoog ook jou kans om diabetes tydens swangerskap te ontwikkel. Die gevolg daarvan is dikwels dat jou baba so groot is dat jy nie normaal kan kraam nie. Selfs sonder diabetes is ’n oorgewig vrou se kans groter om ’n baie groot baba te hê. Die kans dat jou baba te vroeg gebore kan word, is ook groter.

Nie net kan oorgewig probleme met jou swangerskap veroorsaak nie, dit kan ook jou baba se gesondheid aantas. Babas van oorgewig mammas loop ’n groter gevaar om geboorteafwykings soos spina bifida hê, kort ná geboorte te sterf, ’n oorgewig kind te word of hartsiektes te kry.

Weeg ek te veel?

Jou liggaamsmassa-indeks (LMI) dui aan of jy oorgewig is.

Bereken jou LMI so
Bereken jou LMI so


Ruil die kilogramme so

Dalk is jy ook een van die ma’s wat hard probeer het om voor jou swangerskap van die winterrolletjies ontslae te raak, maar nie heeltemal daarin geslaag het nie. Moenie nou tou opgooi nie. As jy hierdie riglyne volg, kan jy minder gewig aansit en ’n gesonde swangerskap en baba hê.

Luister na jou ligaam

As jy honger is, eet iets gesonds en hou op eet die oomblik dat jy versadig voel. Eet stadig, sit jou vurk of lepel tussen happies neer terwyl jy kou en skep die volgende happie eers as jy klaar gesluk het. Eet jou groente, vrugte of slaai met elke maaltyd eerste.

Bly in beheer

Daardie vreeslike lus vir grondboon­tjiebotter, sjokolade of mango’s gaan die een of ander tyd kom, maar jy kan steeds in beheer wees van wat jy in jou mond sit. As jy vir iets lus het, eet klein hoeveelhede daarvan as deel van maaltye of peuselhappies. Moenie net toegee aan elke vreemde lus wat jou beetpak nie.

Eet gebalanseerd

Elke maaltyd behoort uit drie voedsel­groe­pe te bestaan: ’n beskermkos (groente of vrugte), ’n boukos (vleis, hoender, vis, melk, bone, neute) en ’n energiekos (stysel soos pap, volgraanbrood, bruinrys, volkoringpasta, aartappel of patat). Eet ’n verskeidenheid groente en vrugte, kies laevet-vleis en -melkprodukte en volgraan-­stysels met ’n lae glukemiese indeks. Eet klein hoeveelhede gesonde vette soos neute, avokado, olywe, kanolamargarien en kanola- of olyfolie.

Moenie dieet of vas nie

Banting- en kitsdiëte kan jou baba skade berokken. Die ketogene wat tydens ’n laekoolhidraat/hoëvet-dieet in ’n mens se liggaam gevorm word, is skadelik vir jou ongebore baba se brein en organe. Dieselfde proses vind ook plaas wanneer jy vas en daarom behoort jy nooit langer as12 uur nie te eet nie.

’n Halwe bord groente of slaai

Groente en vrugte is propvol belangrike voedingstowwe en bevat betreklik min energie. Die groot hoeveelhede vesel daarin help om jou versadig te laat voel. Deur ’n halwe bord groente, slaai of vrugte met elke maaltyd te eet kan jy genoeg eet om versadig te wees sonder om te veel energie in te kry. Eet dit waar moontlik rou of maak dit gaar sonder bygevoegde suiker, botter of olie. Onthou dat slaaie soos aartappelslaai, pastaslaai en rysslaai nie werklik slaai is nie, maar eerder stysel.

Peusel slim

As jy heeldag loop en peusel, eet jy heel-wat meer as wat jy besef. Kies liewer een tyd wanneer jy jou oggendpeuselhappie eet en een tyd vir jou middagpeusel­happie. As jy meer as drie uur ná aandete gaan slaap, kan jy ’n laataand-­peuselhappie ook insluit.

Kies voedingryke kos tussen maaltye om seker te maak dat jou baba al die voedingstowwe kry wat sy nodig het. Vars vrugte, rou slaaigroente soos tamaties, komkommer en wortelstokkies en vetvrye melk of -jogurt is slim keuses. Hou styselkosse soos brood en beskuit vir maaltye. Skep jou peuselhappie in ’n bakkie eerder as om uit ’n groot pak te eet om seker te maak jy eet net genoeg.

Verander jou bakkie en bord

’n Kleiner papbakkie en ’n kleiner bord sal jou help om kleiner porsies te eet. ’n Vol kleinbordjie lyk veel beter as ’n groot bord met net ’n paar skeppies kos op. ’n Klein bakkie keer ook dat jy per ongeluk te veel pap inskep.

Dink oor wat jy drink

Drankies kan jou maklik om die bos lei en terwyl jy dink dat jy jou dors les, kry jy sommer ’n groot klomp energie ook in. Vrugtesap, koeldrank en selfs tee en koffie met suiker in kan die vetjies vinnig laat aanpak. Drink liefs meestal water, drie glase vetvrye melk per dag en rooibostee sonder suiker.

Oefen elke dag

Oefening en ’n aktiewe leefstyl verrig wondere om gewig in toom te hou. Raadpleeg eers jou dokter om seker te maak dis veilig voor jy wegspring. Kies oefeninge waar jy nie maklik kan val of te warm kry nie, soos swem, vinnig stap, oefen­fiets ry of aërobiese oefeninge spesiaal vir swanger vroue.

As jou dokter jou aanraai om nie te oefen nie, kan jy steeds ’n aktiewe leefstyl hê. Klim trappe eerder as om roltrappe of die hysbak te gebruik, parkeer jou motor so ver moontlik van die winkel af, werk in die huis of tuin, gaan stap voor aandete om die blok en speel bal met die hond of jou kinders.

Stap ’n ompad om ongesonde kos

Aartappelskyfies, roomys, melkskommels, sjokolade, lekkers, koekies en koek is van die dinge wat jy liefs moet vermy. Een porsie van hierdie lekkernye bevat maklik meer energie as ’n gesonde bord kos terwyl dit geen voedingstowwe inhet nie. Vermy sulke eetgoed waar moontlik.

As jy nie anders kan nie, eet net ’n klein porsie. Wegneemetes is wel ’n baie makliker opsie vir ’n moeë ampermamma, maar dit bevat baie vet en daarom onnodig baie energie. Kook liewer ekstra en vries sodat jy net iets uit die vrieskas kan haal as jy nie kans sien vir kosmaak nie.

Sit soveel gewig aan

Die hoeveelheid gewig wat jy behoort aan te sit hang af van jou gewig net voor jy swanger word.

Sit soveel gewig aan
Sit soveel gewig aan