VRAAG:

Ek verwag my eerste kind. Hoe sal ek weet of ek begin kraam het? Is daar sekere dinge waarvoor ek op die uitkyk moet wees?

ANTWOORD:

Dr. JP du Buisson antwoord:

Die kort antwoord is: Jy sal weet wanneer jy begin kraam het. En dit kom van iemand wat nog nooit in kraam was nie. Ek sê altyd vir my pasiënte as jy wonder of dit ’n kontraksie is, dan is dit nie een nie! Hierdie woorde sal jy eers verstaan wanneer jy waarlik kontraksies ervaar.

Kontraksies word beskryf as ’n pyn wat uit jou rug kom en aan albei kante van jou maag om jou lyf tot voor strek. Kontraksie duur enigiets van 20 tot 60 sekondes en kom en gaan. Die beste plan is waarskynlik om te wag tot die kontraksies gereeld is voor jy hospitaal toe gaan.

Vra jou ginekoloog gerus hoe gereeld die kontraksies moet wees voor jy koers kies. Soms kan jy ’n paar dae lank gereelde kontraksies hê wat kom en gaan voor jy begin kraam.

Bloed is altyd abnormaal en jy behoort dadelik hospitaal toe te gaan as daar bloeding is. Maar as die bloed met slym gemeng is, is dit ’n kraamteken. Moenie te opgewonde daaroor raak nie; daar kan nog ’n week verloop voor jy in erns begin kraam. Jou water kan natuurlik ook breek voor jy begin kraam.

Dit sal ’n groot hoeveelheid water wees, genoeg om jou broek, die stoel of selfs die bed nat te maak. Gewoonlik is dit helder van kleur – maar as dit groen is, bevat dit mekonium. Dit beteken jou baba se maag het voor die geboorte begin werk. As dit gebeur, moet jy liewer hospitaal toe gaan.

As jou water egter helder is en jy nog nie gereelde kontraksies voel nie, kan jy maar rustig klaarmaak en miskien selfs tot ’n meer menslike tyd wag voor julle die pad hospitaal toe aanpak. Onthou as jy onseker is oor iets, bel gerus jou ginekoloog gedurende kantoor ure. Bel die kraamsaal as dit na-ure is; daar sal altyd iemand beskikbaar wees om vrae te antwoord.