As julle beplan om een van die dae met ’n nuwe pienkvoet te spog, is dit ’n goeie idee om te weet presies wanneer jy elke maand ovuleer en hoe dit werk. Jy weet seker reeds dat ovulasie die tydperk is wanneer ’n volwasse eiersel uit die eierstok – waar dit saam met duisende ander eierselletjies woon – vrygestel word. Op omtrent dag 14 van jou menstruasiesiklus beweeg die eiersel na die fallopiusbuis.

Die eiersel woon hier vir 12 tot 24 uur terwyl dit wag om deur ’n spermsel bevrug te word voor dit na die baarmoeder beweeg. Intussen vervaardig jou liggaam ook ekstra estrogeen, wat veroorsaak dat die voering van die baarmoeder verdik om solank gereed te maak vir die bevrugte eierselletjie wat daar gaan vasheg. As bevrugting nie plaasgevind het nie, word die baarmoedervoering en eiersel afgeskei wat jy as jou maandstonde ken.

Hoe werk dit?

  • Jou menstruasiesiklus begin teen die eerste dag van jou maandstonde en eindig op die eerste dag van jou volgende maandstonde.
  • ’n Menstruasiesiklus kan tussen 28 en 32 dae duur en verskil van vrou tot vrou. Ovulasie vind gewoonlik 12 tot 16 dae voor jou volgende maandstonde plaas.
  • Die gemiddelde vrou het ’n 28-dag- menstruasiesiklus waarin ovulasie op dag 14 voor die volgende maandstonde plaasvind. Volgens mayoclinic.org vind ovulasie in die vier dae voor of ná die middelpunt van jou menstruasiesiklus plaas. Hou dus ’n maand of twee lank ’n menstruasiekalender om vas te stel wanneer presies jóú middelpunt of ovulasiedag is.
  • Jy is op jou vrugbaarste op die dag van ovulasie, asook die dag daarvoor. Jou vrugbaarheid is egter ’n paar dae voor dié twee dae ook hoog. As jy en jou maat probeer swanger raak, moet julle dus in hierdie vrugbare tyd seks hê.

So weet jy jy ovuleer

  • Net voor ovulasie behoort jy ’n nat, dik en glibberige afskeiding te sien. Dit duur voort tot jy klaar geovuleer het.
  • Jy kan ook jou liggaamstemperatuur dophou. Neem jou temperatuur met ’n termometer terwyl jy rus of onaktief is, soos net voor jy in die oggend uit die bed klim. ’n Verhoging in liggaamstemperatuur beteken jy ovuleer.
  • Jou libido kan ook klim terwyl jy ovuleer, maar dis nie vir alle vroue waar nie.