Vir die geboorte self

Beplan jy ’n natuurlike geboorte? Daar kan ’n paar uur van kraam voorlê en dis die moeite werd om dit vir jou so gemaklik en aangenaam moontlik te maak. Stel vas wat jou plek van geboorte toelaat. Beskou die lys hieronder as voorstelle; kies waarmee jy gemaklik voel.

  • Baie vloeistof – water bly die beste, aangevul met energiedrankies of “oerwoudsap"
  • Twee of meer waslappe waarmee jou maat jou gesig kan afvee. Jy kan dit ook as ’n warm kompres op jou onderrug gebruik
  • Iets wat jou hare uit jou gesig kan hou: knippies, rekkies, ’n haarband
  • ’n Paar maklik verteerbare energiehappies vir jou soos rosyne, energiestafies, ’n paar neute
  • Gemaklike klere vir die eerste fases van jou bevalling
  • Bikini-bostuk of kort toppie as jy ’n watergeboorte beplan
  • Handdoek – meer as een vir ’n watergeboorte (en nie jou bestes nie)
  • Jou eie kussing vir persoonlike gemak
  • Lipbalsem
  • ’n Waterspuitkannetjie om jou koel te hou
  • Musiek op jou slimfoon vir atmosfeer.
  • Kerse vir atmosfeer
  • Kaartjies met positiewe geboortebevestigings (enige positiewe stellings wat jou tydens kraam kan help) wat jy in die kamer kan opplak om jou gefokus te hou
  • Olie of poeier vir massering – ligte aroma-olies kan baie bydra tot ’n gemakliker bevalling. Lemoenblom, roos, laventel en ilang-ilang is geure wat in die verskillende stadiums van kraam aangewend kan word om pyn te help verlig
  • Warmwatersakke vir jou onderrug, skouers en maag
  • Geboortebal
  • Masseerrollers
  • ’n Foto of prent met persoonlike betekenis vir visualisering en motivering
  • ’n Badkamersakkie met jou wasmiddels, rome en tandeborsel
  • Nagklere en/of skoon klere vir ná die geboorte
  • Slimfoon met kamera
  • Slimfoonlaaier

Vir baba

  • ’n Naelknipper
  • Twee pakke doeke vir pasgeborenes
  • Vaseline of boudjieroom
  • Vogdoekies
  • Babawasmiddel en -room
  • Watte
  • Ontsmettingsalkohol
  • Vyf stelle klere wat frokkies, gemaklike groeipakkies, mussies en babasokkies vir die winter insluit
  • Vier babakombersies, waaronder ten minste twee ligte toedraaikombersies.

Het jy geweet?
Die plek vir bagasie langs jou bed is gewoonlik beperk. Hoe kleiner jou tas, hoe beter!

Pa se sak

  • Kontant en jou bankkaarte
  • Mediesefondskaart
  • Horlosie om die tydsduur tussen sametrekkings te meet
  • Ligte leesmateriaal
  • Gunsteling-peuselhappies soos biltong, beskuitjies, Provitas – pak genoeg!
  • Skep vooraf ’n kontakgroep op jou slimfoon van vriende en familie wat jy in kennis wil stel.

Jou tas vir hospitaalverblyf

  • Genoeg gemaklike klere of nagklere wat voor oopknoop of oopvou vir die duur van jou verblyf
  • Pantoffels
  • Weggooibare broekies
  • Dik sanitêre doekies vir ná die geboorte (Carriwell s’n werk goed)
  • Linne-oortreksels (waterdigte vierkant van plastiek wat keer dat die linne vol bloed word)
  • Yspak vir pynverligting om die perineum
  • Voedingsbra
  • Borsdoekies
  • Jel-borsdoekies (koud of warm) vir verligting van oorvol borste
  • Gesonde peuselhappies en vrugtesap
  • ’n Pen
  • Boeke of tydskrifte; die meeste babas slaap baie en jy gaan tyd hê om te verwyl
  • Plastieksak vir vuil wasgoed
  • ’n Skoon stel los en gemaklike klere om mee huis toe te gaan (onthou dat jou baarmoeder nog geswel gaan wees). 

ONTHOU
Los jou kosbare juwele by die huis – dit gaan die laaste ding op jou brein wees as jy jou klein bondeltjie liefde vashou.