Dis moeilik om geboortepyne te beskryf omdat dit anders is as enigiets wat jy al in jou lewe gevoel het. ’n Geboorte is seer, selfs al is dit ’n natuurlike fisiologiese proses. Medisynes wat met geboorte gebruik word, het dit veiliger as ooit gemaak om ’n baba te hê en is een van die oorsake waarom die uitkoms vir vroue nou beter is.

Dit is moontlik om met betreklik min pyn die lewe te skenk, maar dis tog wys om jou op die geboorte voor te berei deur strategieë te leer waarmee jy die pyn kan hanteer. Een van die beste maniere om seker te maak dat jy kalm bly en die pyn bestuur wanneer dit kom, is om jou daarop te voor te berei. Geboortepyne volg ’n voorspelbare patroon wat verband hou met die kontraksies van die baarmoeder. Die plek waar jy die pyn voel, sal aanmekaar verander wat betref die duur en intensiteit, en hoe gereeld die pyne kom.

Hoewel geboortepyne dikwels as een van die seerste menslike ervarings beskou word, verskil dit van vrou tot vrou en van swangerskap tot swangerskap. Amperma’s vind dikwels nie die pyn van elke kontraksie so moeilik nie as dat die kontraksies soos golwe op mekaar volg – en namate die geboorte vorder, is daar ál minder tyd vir asem skep tussen elke pyngolf.

Maar wat is dit presies wat jou so seer laat kry? Wel, die groot sondaar is die baarmoederspiere wat saamtrek, en die serviks waarop druk uitgeoefen word. Die pyn kan voel soos sterk krampe in die maag, lies en rug. Party vroue se sye en bobene is ook seer.

Tydens ’n kontraksie is daar ’n tydelike tekort aan suurstof in die spiere, wat veroorsaak dat die senuweepunte baie geïrriteerd raak. Dis een van die redes waarom asemhaling pyn verminder – dit help om die spiere suurstofryk te hou. Die bekkenvloerspiere en perineum bevat ook senuweepunte en pynreseptore. Wanneer hulle deur kontraksies gestimuleer word, stuur dit pynboodskappe deur jou ruggraat na jou brein toe.

Die gewig van die baba op jou baarmoeder, onderrug, sakrum en stuitjie veroorsaak ook hewige ongemak. Daar is baie senuwees in hierdie dele en druk daarop word as ’n skerp of dowwe rugpyn gevoel. Die fisieke en emosionele uitdaging en stres van geboorte lei boonop tot uitputting, wat jou meer sensitief vir pyn maak.

Ekstra oorsake van pyn
  • ’n Vol blaas
  • Ontwatering
  • Honger verhoog die persepsie van pyn.
  • Jy ervaar die pyn erger as jy onveilig voel of voel jy word dopgehou.
  • Vrees, spanning, verkeerde posisionering en ’n gebrek aan kennis van die geboorteproses

Berei voor vir pyn

Hier is ’n paar dinge wat jy voor of gedurende jou swangerskap kan doen wat sal help met pyn gedurende die geboorte.

1. Gereelde en toepaslike oefening sal jou spiere sterk help hou en jou liggaam voorberei op die stres van die geboorte. Oefening verhoog ook jou uithouvermoë en stamina, wat nuttig te pas kom in ’n lang bevalling. Onthou net om jou nie te ooreis nie!

2. Jy en jou maat moet voorgeboorteklasse bywoon en ingelig word oor die geboorteproses. So leer jy om saam met jou liggaam te werk en nie daarteen nie. Jy sal ook verskillende tegnieke leer om pyn te hanteer. Onthou, geboorte is ’n heeltemal natuurlike, normale en gesonde proses en vroue moet bemagtig word om dit met algehele selfvertroue aan te pak. In klasse leer vroue maniere om hul persepsie van pyn te verlaag, soos deur ontspanningstegnieke, asemhalingsoefeninge, afleiding of massering en vingerdrukterapie deur ’n ondersteunende maat.

3. Masseer jou perineum gereeld en doen bekkenvloeroefeninge. Die perineum rek dramaties gedurende geboorte; kry dit dus so soepel moontlik voor die groot dag. Jy sal mettertyd ál meer gewoond raak aan die strekgevoel daar onder sodat dit jou nie onkant vang wanneer baba sy weg deur jou bekken baan nie. Bekkenvloeroefeninge sal dié deel versterk, wat beteken dat dit makliker rek.

Pynmiddels

Afhangend van die omstandighede is daar ’n verskeidenheid pynmiddels wat tydens die bevalling ingespan kan word. Lig jou in oor die risiko’s en voordele van elkeen.

  • PYNSTILMIDDELS Pynmedikasie kan op baie maniere toegedien word. As dit binneaars of deur ’n inspuiting in die spiere gegee word, kan dit ’n uitwerking op die hele lyf hê. Dit kan jou lomerig of naar laat voel, en kan ook ’n uitwerking op jou baba hê.
  • EPIDURALE VERDOWING Die meeste vroue oorweeg hierdie opsie, wat behels dat die gevoel in dele van jou lyf verdoof word. Dié metode is geskik vir sowel ’n natuurlike geboorte as ’n keisersnee. Epidurale verdowing verlig die meeste van die pyn in die deel onder die naeltjie, asook die vaginale wande. Dit word deur ’n narkotiseur toegedien via ’n dun kateter wat in die onderrug ingesteek word. Epidurale verdowing kan jou bloeddruk laat daal. Dit kan jou ook laat jeuk en hoofpyn gee. Die risiko’s vir jou baba is minimaal.
  • KALMEERMIDDELS Hierdie middels verlig nie pyn nie, maar help om jou kalm en ontspanne te hou as jy baie angstig is. Soms word dit saam met pynstilmiddels gebruik. Dié middels word egter selde gebruik omdat dit newe-effekte vir ma en baba kan hê. Dit kan ook veroorsaak dat jy agterna nie besonderhede van die geboorte kan onthou nie. Sommige vroue wil sterk pynverligting aan die begin van die geboorte hê. Ander wil die geboorte meer intens ervaar en besluit om eers te kyk hoe sake verloop. Dit is belangrik om te weet dat jy kan doen wat jou ook al pas. Dit is ook lekker om te weet jy het keuses. Jy hóéf nie tussen natuurlike en medisinale pynverligting te kies nie. Albei kan alleen of saam gebruik word. Navorsing wys dat die dinge wat die grootste verskil maak in die uitkoms van kraam nie tegnologies is nie. Dis belangriker om gemaklik te voel oor die plek waar jy kraam, en om goeie ondersteuning te hê. 

Asemhaling verskaf suurstof wat pynboodskappe teenwerk.
Hanteer pyn so gedurende geboorte
  • Selfhipnose Dit behels dat jy vooraf tegnieke leer wat jou baie rustig laat voel en ”verby” die pyn help fokus.
  • Massering, teendruk of vingerdrukterapie Die krag van aanraking moet nooit onderskat word nie. Harde, ferm druk op sekere dele van jou liggaam sal die manier verander waarop pynboodskappe ontvang word. Vingerdrukterapie streel die pyn, so ook die vryf van jou hakke.
  • Verandering van posisie Beweging verdryf pyn en sal jou persepsie daarvan verander. Bly so regop moontlik en gebruik die swaartekrag om jou baba af te bring en jou bekken oop te maak. Maak ’n geraas tydens die geboorte. As jy kerm, word endorfiene vrygestel wat jou baba ook bevoordeel.
  • Bad of stort Water het ongelooflike pynverligtingskrag. Gebruik water om jou te streel voor en gedurende die geboorte en vir pynverligting. ’n Sterk waterstroom op jou rug kan rugpyn verlig. Maak seker die bad is diep genoeg om jou te laat voel asof jy dryf. Hoe dieper die water, hoe hoër die vlak van pynverligting.
  • Luister na musiek.
  • Lei jou gedagtes af deur te tel of ’n aktiwiteit te doen wat jou aandag op iets anders fokus. 
  • Bly kalm Streshormone steek die plasenta oor en bereik jou baba. As jy maniere vind om jou tot bedaring te bring en positief te hou, kan jy amper alles hanteer wat na jou toe kom.
  • Gebruik ontspannings- en visualiseringstegnieke Die vermoë om spanning te laat wegvloei en jou positiewe gedagtes in prentjies te verander, is nie net ’n kraaminstrument nie, maar ’n lewensvaardigheid.
  • Haal met mening asem As jy met bewustheid asemhaal, sal dit kraampyne help verminder.
  • Sorg dat jy jou blaas gereeld leegmaak ’n Vol blaas kan die kraamproses terughou en pyn vererger.
  • Aromaterapie Olies soos laventel en kamille het ’n strelende uitwerking op liggaam en gees.
  • Die TENS-masjien wat elektriese impulse met die pynpaadjies langs stuur, help om endorfiene in jou liggaam vry te stel en verander jou persepsie van pyn.
  • Bly gehidreer Ontwatering kan baarmoederkontraksies baie seerder maak. Drink dus water of helder vloeistof regdeur die kraamproses.
  • Span homeopatie in Daar is sekere middels wat ontsluiting van die serviks makliker help maak en jou ook help om die pyn van kontraksies te hanteer.