VRAAG:

Ek het ’n week gelede op vyf weke swangerskap ’n miskraam gehad. Ek voel steeds swangerskapsimp­tome soos seer borste en ’n geswelde buikarea. Hoe lank sal ek nog so voel en wanneer kan ons weer probeer?

DR. JP DU BUISSON ANTWOORD:

Ek is so jammer om te hoor van jou verlies. Dit is nie lekker om steeds so swanger te voel nie, want dit herinner jou mos aan wat jy verloor het. Dis die verhoogde hormoonvlakke wat vir jou simptome verantwoordelik is. Dit daal gelukkig daagliks en binne ’n week of wat sal jy nie meer swanger voel nie. Jy sal ook binnekort ophou bloei, as jy nie reeds opgehou het nie.

Jy kan binne vier weke ná ’n miskraam weer ’n eiersel vrystel en dit sal dan weer moontlik wees om swanger te raak. 

My raad is egter dat jy wag tot jy twee normale maandstondes gehad het voor jy weer probeer. Dit help jou om te bepaal wanneer jou vrugbare tyd is. Dis ook makliker om te weet wanneer jy “laat” is en dan ’n swangerskapstoets te laat doen. 

Moet egter nie moedeloos word nie; drie uit 10 vroue het ’n miskraam en die oorgrote meerderheid gaan voort en bou gesinne!

Het jy 'n vraag?

E-pos jou vrae na yolandi@babaenkleuter.co.za. Vrae kan ongelukkig nie persoonlik be­ant­woord word nie.