Aarde, daardie finale weke van swangerskap kan verbysleep. Jy voel uitgeput, swaar en ongemaklik. Die ironie is egter dat jy ook nie meer lekker slaap nie as gevolg van die pyne in jou bekken, die 12 uitstappies na die toilet wat jy snags aanpak en die klein akrobaat in jou maag wat teen drieuur soggens tussen jou binnegoed rondrol. Met dié nege wenke sal jy sommer gou weer woema hê.

1. Genoeg yster

Sommige swanger vroue sukkel met ’n ystertekort. Bespreek dit met jou dokter as jy in die derde trimester van jou swangerskap buitengewoon afgemat en moeg voel sodat ’n toets gedoen kan word.

Sorg dat jy genoeg donkergroen groente, rooivleis, olierige vis, eiers en bone by jou dieet insluit. Probeer om dit saam met iets soos lemoensap in te neem, aangesien vitamien C jou liggaam help om yster te absorbeer.

Aan die ander kant beperk die tannien in koffie en tee ysterabsorpsie.

2. Gesonde opelyf

As jy swanger is, verstaan jy presies waaroor dit gaan as daardie vrou met die groot glimlag op die televisieadvertensie knipoog terwyl sy ontbytgraan aan jou probeer verkoop: ’n gereelde, daaglikse stoelgang sorg dat jy minder traag voel.

Die probleem is egter dat baie swanger vroue hardlywig raak. Die antwoord is ’n lae GI-ontbyt wat baie vesel bevat – dit stel energie oor ’n lang tydperk vry en help met hardlywigheid.

3. Knip ’n uiltjie

Selfs ’n baie kort middagslapie teen middagete kan jou deur ’n lang middag help. As jy werk, kan jy sommer oor middagete wegsluip en ’n uiltjie in jou motor gaan knip.

En as jy tuis is, sal dit nie skade doen om jou kinders se gunsteling-TV-program aan te skakel en jou oë vir ’n rukkie toe te maak nie. Jou kinders sal nie omgee nie en in elk geval die vriendelike weergawe van jou meer waardeer!

4. Water bo!

Ja, dit is belangrik om goed gehidreer te bly, en dit sal jou ook minder moeg laat voel. Moenie in die versoeking kom om die twee liter water wat jy daagliks moet inneem eerder te vermy omdat jy snags kort-kort moet opstaan nie.

Jy kan wel sorg dat jy die meeste van die water wat jy moet drink, vroeër in die dag drink. Probeer om nie te veel te drink voor jy gaan slaap nie.

5. Skrop nes

Die nesskrop-instink sal in die derde trimester oorneem. Gebruik dit wys. Dit is dalk nie ’n slegte idee om die huis te stofsuig nie – dis goeie oefening!

6. Klein bederfies

As jy vet en lelik voel en na jou normale klere verlang, kan jy maklik in ’n spiraal van negatiwiteit verval waar jy lusteloos en onaktief is en jou ooreet.

Bederf jou met mooi skoene en bykomstighede om jou voorkoms op te tof. Die beste van alles? Dit kan nie te klein raak nie. Jou swangerskap het al ver gevorder – jy verdien dit!

7. Oefen meer

Jou voete kan so swel dat dit soos brode lyk. Die heel, heel laaste ding waarvoor jy waarskynlik nou lus is, is stap. Maar dit is natuurlik die beste ding wat jy kan doen om die bloedsomloop van jou voete na jou kop te kry en so vir meer energie te sorg.

Doen wat jy moet doen, al beteken dit dat jy televisie kyk terwyl jy die oefenfiets trap. Begin net beweeg!

8. Jou groen kaart

Swangerskap is die een kans wat jy kry om te doen net waarvoor jy lus het. As jy nie lus is vir jou maat se vriende of ’n aandjie saam met die skoonfamilie nie, is dit nou jou kans om daaruit te kom ...

Jy hoef nie eens sleg te voel nie – slaap eerder! Almal sal verstaan en jou selfs jammer kry.

9. Die gras is groener waar jy is

Een van die dae gaan jy lui middagslapies en ononderbroke nagte moet groet. Die volgende keer as jy moeg is of nie lekker voel nie, draai eenvoudig om en trek die duvet ’n bietjie nader.

Jou lewe gaan binnekort onomkeerbaar verander. Waardeer dus die tyd wat jy nog vir jouself het.