Ons is baie opgewonde, want ons vliegkaartjies vir ons jaarlikse kuier in Suid-Afrika is reeds bespreek. Klein Ruan het al klaar begin vra hoeveel slapies daar nog oor is tot ons by oupa en ouma gaan kuier. Almal kry ’n WhatsApp om die datum waarop ons land, op hul kalender aan te teken.
Vakansies in Suid-Afrika word met erns beplan en ons probeer ons bes om die mooie land in daardie tyd ook te verken. Ons woon al 11 jaar in Taipei, Taiwan. Ons kan dié vreemde land hier in die Verre Ooste met sy vreemde taal en vreemde kos nou al huis noem. Ná ’n somervakansie van vyf weke in Suid-Afrika begin ’n mens so stukkie vir stukkie terugverlang na jou huis hier in die Verre Ooste.
Die plan was om vir twee jaar hier te kom werk en dan weer terug te gaan, maar hier is ons nog steeds … soveel jare later. My man, Herman, en ek is albei onderwysers by openbare skole en geniet ons werk geweldig baie. Ons het in Taiwan verloof geraak, maar gedurende ’n somervakansie in Suid-Afrika getrou.