Hoe op aarde het sy dit reggekry? Dit is wat mense wêreldwyd wonder sedert hulle einde verlede jaar ’n glimp van die sangeres Adele se dramatiese transformasie gekry het.

Glennon Doyle
Die sangeres Adele sê haar nuwe uitkyk op die lewe is te danke aan Glennon Doyle se boek Untamed: Stop Pleasing, Start Living. Foto: Gallo Images/Getty Images

Dit het verder gegons toe die superster met haar 32ste verjaardag ’n foto gedeel het waarop sy nóg slanker lyk.

Sy het na raming ’n verstommende 50 kg afgeskud. Maar ten spyte van al die bespiegeling in die media en verwondering in die sosiale media, het Adele nog min oor haar nuwe lewensvreugde verklap. Tot nou.

Die ster is gewoonlik sku in die sosiale media, maar het op Instagram erkenning gegee aan Glennon Doyle se boek Untamed: Stop Pleasing, Start Living wat haar laat voel het asof sy “vir die eerste keer in my liggaam gevlieg het”.

Adele en haar eks.
Adele en Simon Konecki het in September 2019 aangekondig hulle gaan ná meer as agt jaar saam skei. Hulle het ’n sewe­jarige seun, Angelo. Foto: Gallo Images/Getty Images

En dit het minder te doen met dieet en oefening – daar is persoonlike afrigters daarvoor – en meer met die regte ingesteldheid.

Adele het by ’n foto van die boek, wat deels ’n selfhelpboek en deels memoires is, geskryf: “As jy gereed is daarvoor, sal hierdie boek jou brein vernuwe en jou siel laat skree. Hou ’n pen byderhand om notas te maak, want jy gaan wil terugverwys, glo my.”

Die boek het Adele gehelp om ’n gelukkiger mens te wees, wat meer in voeling met haarself en bewus van haar geestesgesondheid is. En toe sy na haarself begin omsien, het die res glo in plek geval.

Glennon (44) was duidelik in die wolke ná die huldiging. “I love you, my soul sister,” het sy geantwoord. “You are the ultimate goddamn cheetah.”

En Adele is nie die enigste bekende wat haar prys nie; Reese Witherspoon, Jennifer Aniston, Kristen Bell en selfs Oprah Winfrey is ook aanhangers. Maar wie is hierdie selfhelpghoeroe wat supersterre so laat koer? Sy is behoorlik ’n dinamiese vrou.

Glennon het bulimie, dwelmmisbruik, alkoholisme en ’n onstuimige huwelik oorkom en haar lewe omgekeer, liefde by ’n vrou gevind, sowat R68 miljoen gemaak en meer as R425 miljoen vir behoeftiges ingesamel deur Together Rising, haar welsynsorganisasie.

Haar motiverende inskrywings, pittige sêgoed en aanlyn video’s tydens die inperking het haar boonop in ’n sosialemediasensasie omskep en aan haar 1,2 miljoen Instagramvolgelinge besorg.

Sy het al drie topverkoperboeke geskryf – Love Warrior, Untamed en Carry On, Warrior – en daar is reeds planne om Untamed in ’n televisiereeks te omskep.

Glad nie sleg vir ’n vrou wat haar loopbaan as moederskapsblogger begin het wat gereeld oor die eentonigheid van ’n voorstedelike bestaan geskryf het nie.

Glennon het bevoorregte kinderjare net buite Washington, DC, gehad. Haar pa was ’n skoolhoof en haar ma ’n Spaanse onderwyseres, en vakansies het hulle op die gesin se boot deurgebring. Maar ten spyte van haar gelukkige grootwordjare het haar lewe reeds op laerskool begin ontspoor.

Sy het op 10 “behep” geraak met “molliger, kroeser en olieriger” as haar klasmaats wees en het haar tot bulimie as oorlewingsmeganisme gewend. “Ek het my elke dag verskeie kere aan kos vergryp en dan opgebring,” vertel sy.

“In my finale skooljaar het ek na die skoolberader gegaan en gesê ek gaan sterf as iemand my nie wegvat nie.”

Sy het in ’n psigiatriese hospitaal beland en toe by ’n universiteit ingeskryf – waar sy drank en dwelms begin misbruik het.

“Meestal kokaïen,” sê sy. “Ek het soggens in die stort begin drink. Daar was nie ’n enkele aand dat ek nie in ’n beswyming was nie.”

Sy het dit wel reggekry om haar graad te verwerf en het as laerskoolonderwyseres begin werk, maar die gedrink en dwelmmisbruik het voortgegaan.

“Dit was jare van: ‘Ja, sy is in ’n beswyming, maar kyk, sy gee klas.’ Dit het dus baie langer geneem om hulp te kry.”

Sy het tydens een van dié kuieraande vir Craig Melton, ’n deeltydse model en beroepsokkerspeler, ontmoet. Sy het vroeg in hul verhouding swanger geraak en ’n aborsie gehad, maar het toe nugter geword, Christenskap ontdek en met Craig getrou.

‘Dit het elke geloofsoortuiging wat ek ooit gehad het, weggebelaas’

“Ons het gedink dis die regte ding om te doen,” sê sy. “Nie dat ons die regte mense vir mekaar was nie.”

Drie kinders is gebore – Chase (17), Tish (14) en Amma (12). Die gesin het Florida toe getrek, maar pleks van die huislike lewe geniet, het Glennon depressief, angstig en ontevrede geword.

In ’n poging om sin te maak van haar gevoelens, het sy daaglikse e-posse oor die lewe op die herstelpad, geloof, ouerskap en die huwelik aan ’n klompie hegte vriende gestuur.

Sy het ’n paar uur later opgevolg om te hoor wat hulle dink, maar hulle het gewoonlik nog nie kans gehad om haar skryfwerk te lees nie. Nadat ’n vriend in 2009 vir Glennon ’n handleiding gestuur het om webtuistes te bou, het sy die skimp gevang en haar Christelike blog, Momastery, is gebore.

“Al rede hoekom my skryfwerk ooit die wêreld bereik het, is omdat my vriende dit nie meer wou lees nie,” sê sy.

“Die heel eerste keer toe ek iets skryf en mense wat ek nie ken nie, sê: ‘Sjoe, dis eerlik’, het ek ’n prikkel agter my nek gevoel. Ek het ’n ‘ons-gevoel’ ervaar.”

Haar openhartige, humoristiese bekentenisse het vinnig gewild geraak. Sy het in 2012 ’n inskrywing genaamd “Don’t Carpe Diem” geskryf, ’n gefrustreerde reaksie van hoor sy moet elke sekonde van nuwe moederskap geniet. “Duidelik werk carpe diem (gryp die geleentheid aan) nie vir my nie,” het sy geskryf.

“Ek kan dit nie eens 15 minute op ’n slag doen nie, so die hele idee is buite die kwessie.” Haar inskrywing het uitgewers laat vuisslaan vir ’n boek wat sy nog moes skryf, en ’n nuwe loopbaan as die moderne vrou se “waarsegster” is gebore.

Maar terwyl haar loopbaan floreer het, het haar huwelik begin verbrokkel. Sy het later erken sy het seks met Craig meer as ’n taak beskou en dit as “onaangenaam” beskryf. Die week voor sy haar eerste boek, Carry On, Warrior, moes bemark, het Craig erken hy was verskeie kere ontrou en aan pornografie verslaaf.

“Die onthulling van my man se verraad het my nie die wanhoop van ’n vrou met ’n gebroke hart laat voel nie,” sê Glennon in Untamed.

“Ek het die woede gevoel van ’n skrywer met ’n mislukte storielyn.”

Toe skryf sy maar weer. Haar tweede boek, Love Warrior, is pas gekies vir Oprah se boekklub toe haar lewe nóg ’n wending neem. Toe sy voorbrand gemaak het vir die boek in Chicago, het sy en Abby Wambach mekaar ontmoet.

Abby was die oudkaptein van die Amerikaanse vrouesokkerspan wat ook besig was om haar eie boek, Forward, te bemark.

Die gevoel van liefde met die eerste oogopslag “het elke geloofsoortuiging wat ek ooit gehad en alles wat ek oor myself gedink het, weggeblaas”.

Abby (40) het later erken hoewel sy ook die magnetiese aantrekkingskrag gevoel het, het sy gedink hulle “kan nie slegter pasmaats vir mekaar wees nie”.

“Glennon het ’n man en drie kinders gehad en het in Florida gewoon. Ek was vir ’n maand lank nugter, my huwelik (met die sokkerspeler Sarah Huffman, 36) het uitmekaargeval, ek het pas my sokkerloopbaan van 30 jaar beëindig en in Oregon gewoon,” sê sy. Maar met Craig en Sarah se medewete het die twee vroue ’n verhouding aangeknoop en ’n jaar later getrou.

Glennon se verhaal van veerkragtigheid en vasbeslotenheid het haar ’n baken van lig vir sterre en gewone vroue gemaak. En vir Adele sê die flapteks agterop Glennon se boek alles.

“Elkeen van ons kan onsself genoeg begin vertrou om grense te stel, vrede te maak met ons lyf, ons woede en hartseer te eer en ons opregste, wildste instinkte te ontketen.” 

BRONNE: DAILYMAIL.CO.UK, TIMESLIVE.CO.ZA, NYTIMES.COM, PEOPLE.COM, MOMASTERY.COM, INDEPENDENT.CO.UK
Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe