“Ek het nooit gedink ek sou eers drie seuntjies hê voordat ek swanger raak met ’n dogtertjie nie,” borrel Aletté-Johanni.

“Ek was altyd jaloers op die oulike dogtertjieklere in die winkels.”

Nou het Aletté reeds ’n paar pienk pakkies ontvang en die voorkomskonsultant kan natuurlik nie wag om met haar dogtertjie pop te speel nie.

“My skoonma het reeds gesê ek gaan nie meer die enigste queen in die huis wees nie,” vertel sy laggend. 

Die egpaar wat in Somerset-Wes woon het reeds drie seuntjies, Lian (9), Simeon (7) en Reuben (5). 

Op die vraag of hulle ’n dogtertjie of seuntjie wil hê het sy voorheen aan Huisgenoot gesê: “Ons het ’n beeld van die Here gekry dat ons drie seuntjies en ’n dogtertjie gaan hê, maar ek gee regtig nie om nie. Ek wil net ’n gesonde baba hê.”

Nou weet hulle dat die beeld akkuraat was.

Die voorkomskonsultant, wat nou 14 weke swanger is, sê sy het Vrydag uitgevind dat sy 'n dogtertjie verwag en toe dadelik vir Heinz laat weet. 

“Die vorige Maandag toe ons by die dokter was kon ons nog nie sien of dit ’n dogtertjie of seuntjie gaan wees nie. Dis amazing hoe ’n groot verskil vyf dae kan maak,” vertel sy aan Huisgenoot. 

Heinz en die seuns kan ook nie meer wag om nog ’n vrou in die huis te hê nie. 

Volgens Aletté is ’n pa en dogter verhouding vir haar baie spesiaal. 

“Simeon kan vir al nie sy opgewondenheid in hou nie. Hy is mal oor baba’s en veral dogtertjies,” vertel sy.

Aletté-Johanni het Vrydag regstreeks op Instagram die nuus dat hulle hul eerste dogtertjie verwag met haar sowat 22 500 Instagram-volgelinge gedeel.

Van haar aanhangers op Instagram is duidelik net so opgewonde oor die nuus en het die egpaar gelukgewens. 

“Baie geluk! Daar is iets magical en spesiaal om seuntjies en ’n dogtertjie te sien grootword,” het een laat hoor.

“Baie geluk. Ons kon jul vreugde intens ervaar. Dankie dat julle dit met ons deel,” sê nog een.