Getroud met Rugby
Natsja Jacobs speel die rol van Amanda in Getroud met Rugby. Foto: Willem Botha

“Jy kan my karakter haat of jy kan vir haar lief wees, maar dit is nie nodig om my voorkoms aan te val nie,” sê sy.

Natasja vertolk die rol van Amanda wat vir haar ’n katelknaap, die Stryders-rugbyspeler Reitz (vertolk deur Sean van Noordwyk), opgesaal het.

Die tonge het behoorlik in die sepie geklap oor die ouer vrou wat aan die jong spiertier verloof is, maar van die stel af het kuberboelies Natasja gekritiseer omdat haar gesig nie simmetries is nie.

“Dit is vir my so onnodig,” sê sy.

“Die betrokke dag, wat ek die kommentare gelees het, was vir my ’n moeilike dag en ek het verskriklik gehuil toe ek lees.”

Sy sê as aktrise verstaan sy dat sy ’n baie dik vel moet hê, maar nes enigiemand is sy ook maar net ’n mens en ook soms broos.

“Dit is mense wat agter rekenaarskerms skuil, en hulle sal twee keer dink voor hulle sulke lelike goed vir jou in persoon sal sê. Ek wil net hê mense moet twee keer dink voor hulle goed kwytraak.”

Sy is ook van mening dat ouers ’n goeie voorbeeld vir hul kinders moet stel.

“Baiekeer hoor kinders hoe die ouers mense kritiseer en dan doen hulle dieselfde by die skool met maatjies. Dit is hoekom daar geboelie word by die skool. Jy moet as ouer ’n goeie voorbeeld vir jou kind kan stel.”

Natasja sê haar vriende, familie en die wonderlike span by Getroud met rugby bied vir haar baie ondersteuning.

“My 5-jarige, Nathan, is ook my grootste aanhanger, en toe ek ontsteld was oor die kritiek wat ek ontvang het, was hy die een wat my getroos het en vir my gesê het ek is die mooiste vrou in die hele wêreld.”

View this post on Instagram

The little Easter bunny and mom ?????

A post shared by Natasja Jacobs. Actress. (@natasjajacobs79) on

Afgesien van die kuberboelies, geniet Natasja dit om weer op die kassie te wees.

“Ek is lief daarvoor om voor die kamera te wees en ek is mal oor my karakter, Amanda.

“Wat jy sien is wat jy kry, en sy is nie bang om haar mond oop te maak nie.”

Amanda gaan tans deur ’n soortgelyke probleem waar die publiek haar kritiseer omdat sy aan ’n veel jonger karakter verloof is.

“Wat is die kanse dat die werklikheid en fiksie so sal oorvleuel?” lag sy.

Sy verklap dat Amanda beslis hier is om te bly, maar sy wil nie ’n woord rep oor Amanda se storielyn nie.

“Kykers sal maar moet wag en sien,” sê sy.

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe