Boer Déan en sy meisie, Megan.
Boer Déan en sy meisie, Megan. Foto: Instagram

Boer Déan het sowat ’n maand gelede vanaf sy familieplaas in Nelspruit verhuis na George in die Wes-Kaap waar hy en ’n vennoot ’n stuk grond gekoop het om ’n nuwe lewe daar te bou. 

Aan die voet van die Outeniquaberge sal hy en sy vriend, die Suid-Afrikaanse rugbyskeidsregter Marius van der Westhuizen, ’n makadamia- en avokadopeer-plaas op die been bring. 

En hy gaan dit nie doen sonder die nooi aan sy sy nie. 

“Megan is op die oomblik hier (in George) en sal so einde Julie se kant aftrek,” vertel Déan. “Dan sal ons dinge van daar af vat.”

View this post on Instagram

A post shared by Megan Wille (@megan_wille)

Déan, wat onlangs in die 13de seisoen van die kykNET-reeks Boer soek ’n vrou te sien was, het Megan Wille, ’n ballet-afrigter, tydens die plaaskuier eerste huis toe gestuur. Dinge tussen hom en die laaste meisie op die plaas, Marné, het egter nie uitgewerk nie en toe hy en Megan weer in die sosiale media begin gesels, het die vonke gespat. Hulle is sedert middel Maart 'n paartjie. 

Déan, wat ook ’n opgeleide vlieënier is, vertel hulle is tans besig om die grond te bewerk en die eerste makadamia-boompies behoort tussen November en Januarie op die plaas aan te kom. Voorheen is daar met beeste op die grond geboer. 

“Die area is tot ’n mate baie dieselfde as Nelspruit en dit is waarom dit hier ook goed aard. Dis harde werk, maar dit is baie exciting.”

Hy het altyd geweet hy gaan sy vlerke na elders sprei, vertel Déan. “Dit was tussen Namibië en George; ek het ook na Australië gekyk.

“Ek het baie hierheen gekom as kind. Ons plaaslike vakansies was in Knysna en my beste vriend van laerskool het hierheen getrek en ek het baie vir hom kom kuier.” 

Gelukkig is die plaas wat hulle gekoop het net sowat twee minute van die lughawe af en is dit maklik vir hom om te gaan kuier by sy ouers in Nelspruit. Hy sal ook graag een of ander tyd sy vliegtuig daarheen wil bring om self te vlieg as hy êrens heen wil gaan.

Intussen woon hy en sy vennoot, Marius, en dié se vrou saam in 'n huis op die plaas vir tyd en wyl hulle nog ’n huis laat bou.  

Hulle het ook reeds begin sosiaal verkeer in hul nuwe tuiste en die afgelope naweek het die Boer soek ’n vrou-aanbieder Marciel Hopkins en haar verloofde, Handré, daar gekuier. 

“Dis lekker om mekaar buite die program beter te leer ken,” vertel Déan. “Ons het so lekker gekuier. Hulle moes amper oorslaap.”

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe