Die skoonheidskoningin het intussen uit Johannesburg getrek en woon as tydelike maatreël by haar ouers op hul kleinhoewe in Pretoria. Claudia, wat onlangs haar 36ste verjaardag gevier het, wil nie verder uitwei oor die besonderhede nie, maar sê dit is vir haar ’n baie moeilike tyd.

“My hart is baie seer, maar ek fokus nou op my kinders,” sê sy aan Huisgenoot.

Claudia en Orin is in 2015 getroud.

Die blonde sakevrou, wat ook voorheen Sun International se publisiteitsbestuurder was, vertel sy is nou voltyds ma vir hul 15 maande oue tweeling.

Sy het Donderdag ’n foto van haar saam met haar twee dierbare spruite op Facebook en Instagram gedeel en in ’n roerende inskrywing vertel dat sy nooit besef het hoe taai dit is om voltyds ma te wees nie.

“Ek wil nie enigiets van werkende ma's wegvat nie, want ek was een van hulle. Maar die afgelope twee maande is ek 24 uur, sewe dae ’n week ma vir my tweeling. En laat ek vir jou sê, dit is een van die moeilikste goed wat ek nog ooit moes doen!” het sy op Facebook en Instagram geskryf.

Sy meen sy moet die woelige kinders voortdurend dophou om seker te maak hulle val nie, vir hulle kos voorberei, hulle voed, vuil klere was, doeke omruil, en bad terwyl sy hul slaaproetines ook probeer volhou.

“Dit is baie harde werk,” vertel die langbeen-blondine wat in 2004 as Mej. SA gekroon is. “Maar die lekkerste is om te sien hoe hulle ontwikkel en groei."

“Ek het dwarsdeur my swangerskap gewerk en was daarna vir ses maande met kraamverlof. Maar toe was hulle nog so klein, ’n mens kon nog nie so mooi sien hoe hulle ontwikkel nie.

"Op die ouderdom wat hulle nou is, ontwikkel hulle elke dag baie. Al is dit net ’n glimlaggie of ’n woordjie of iets, ek voel baie gelukkig om dit te beleef.

"Toe ek gewerk het, het ek mylpale gemis wat ek wens ek kon beleef,” vertel sy. Sy sê hulle is baie geheg aan haar, en dit is vir haar heerlik om meer tyd saam met hulle deur te bring.

Claudia meen sommige mense dink vroue wat tuisteskeppers is en voltyds na hul kinders omsien, laat die heeldag hul naels doen en hang by die gimnasium uit.

“Laat ek vir jou sê, as jy ’n tuisblyma is, kan jy ’n uitvoerende hoof wees,” skryf Claudia verder by die foto. “Want as jy ’n huishouding en kinders bestuur, kos maak en geen tyd vir jouself het nie, is jy presies die teenoorgestelde van daardie stereotipe.”

Volgens Claudia kon sy as werkende ma in die aande voluit op haar kinders fokus maar het sy deur die dag, tydens haar kantoorure, ’n “bietjie van ’n breuk” van ma-wees gekry.

“Hierdie is beslis die moeilikste werk wat ek nog gehad het,” sê sy en spot dat die enigste tyd wat sy nou het om haarself mooi te maak en uit te gaan, is wanneer sy vinnig babakos gaan koop.

“Maar ek het gelukkig ’n wonderlike ondersteuningstelsel. My ma help my ongelooflik baie, en my susters loer ook dikwels in.”

Claudia se vriende en aanhangers het positief gereageer op haar inskrywing. “Hoor hoor,” het een aanhanger in reaksie gesê.