In Engeland se hoogste kringe is die skindertonge in rep en roer oor ’n vete wat maar net nie wil bedaar nie.

Aan die een kant is ’n beeldskone vrou met ’n tuimelende bos donker hare, slanke bene en onberispelike styl. Sy is met ’n skatryk man getroud wat al as die grootste vangs in Engeland beskryf is.

Aan die ander kant: die toekomstige koningin van Engeland, ’n vrou wat skande en skinder verpes, maar tog nie die gefluister van die koninklikes en rykes kan stopsit nie.

Rose Hanbury, markiesin van Cholmondeley (uitgespreek as Chumley), en die hertogin van Cambridge het altyd ’n hegte band gehad, maar dit het vroeër vanjaar aan die lig gekom die twee het ’n “verskriklike uitval” by ’n ete gehad.

Rose Hanbury, markiesin van Cholmondeley (uitgespr
Rose Hanbury, markiesin van Cholmondeley (uitgespreek as Chumley). Foto: Gallo Images/Getty Images

Sedertdien het hul warm vriendskap glo in ’n kille afsydigheid ontaard.

Dis onduidelik waaroor hulle vasgesit het, maar die ongegronde gerugte het gevlieg dat prins William en Rose (35), ’n voormalige model, dalk ’n affair gehad het. Sy was kort voor lank as Kate se “plattelandse mededinger” bekend.

Die bewerings het gekom en gegaan, maar niks is gestaaf nie en die paleis het dit bloot geïgnoreer.

Tog broei iets dalk. Nie ’n affair soos die bitterbekke beweer nie, maar die een of ander onenigheid in die koninklike kringe.

Volgens The Mail on Sunday het koninklike raadgewers ingetree om Rose te vra om “niks te sê” oor die rusie nie – koninklike raadgewers raak nie betrokke as hulle nie absoluut moet nie.

“Die raadgewers help die markiesin en haar man om die media te hanteer,” word in berigte beweer.

Wat gerugte nog aanblaas, is dat Rose onlangs sonder haar trouring by die staatsbanket vir Amerika se pres. Donald Trump by Buckinghampaleis gewaar is.

Rose en Kate het mekaar nie eens gegroet nie, vertel mense in die binnekring, en die twee se sitplekke was aan teenoorgestelde kante van die eetsaal.

Rose se man, David Rocksavage (58), die markies van Cholmondeley, bring glo ál meer tyd in Parys deur en los sy vrou aan die stuur van sake by Houghton Hall, die manjifieke landgoed en 106-vertrek-herehuis wat hy 27 jaar gelede geërf het.

Die uitgestrekte eiendom van 405 ha is glo meer as R2 miljard werd, grens aan die koningin se plattelandse woning, Sandringham, en die Houghton-perdeproewe word elke jaar daar gehou.

Zara Tindall, William se niggie, het verlede maand aan die geleentheid deel­geneem, maar daar was geen teken van die Cambridges nie, hoewel Kate verlede jaar die sonskyn saam met George en Charlotte daar geniet het.

Rose se kinders, die negejarige tweeling Alexander en Oliver, en haar drie­jarige dogter, Iris, was die Cam­bridge-­kroos se speelmaats. Maar dit is onwaar­skynlik dat die kleingoed vorentoe saam op die grasperke van die twee families se eiendomme sal baljaar.

Houghton Hall is net 5 km van Anmer Hall, William en Kate se plattelandse woning, en Rose en David was eens lede van die Turnip Toffs, soos die Cambridges se vriendekring in Norfolk heet.

Kate en Rose saam met hul mans, William en David R
Kate en Rose saam met hul mans, William en David Rocksavage, in 2016 by ’n formele liefdadigheidsete by Houghton Hall, Rose en David se imposante woning. Die eiendom van 405 ha is glo meer as R2 miljard werd. Foto: Gallo Images/Getty Images

Die markies en markiesin was in 2011 gaste by die Cambridge-troue, waar Rose as die besgeklede gas beskou is. Sy en David was ook gereelde gaste by Kate se “verjaardagnaweke” in Sandringham elke Januarie, wat ’n fisanteskietsessie, ’n partytjie die Saterdagaand en kerk op Sondag insluit.

Maar koninklike waar­nemers sê Rose was vanjaar nêrens te sien nie en Kate het haar “uitfaseer”.

“Dinge is gespanne tussen hulle,” het ’n bron aan The Sun gesê.

“Niemand verstaan hoe dinge tot dié punt gekom het nie. Rose en Kate se lewe was oor die jare op verskeie maniere ineengevleg.”

Rose, sê dié wat weet, raak “ál meer afgesonder”. Mense wat haar en Kate ken, voel “verskeur” tussen die twee en meer skaar hulle by die hertogin.

“Mense is bekommerd oor Rose,” het ’n vriend aan die Daily Mail gesê.

Rose Hanbury (LINKS) en Kate (REGS), die hertogin
Rose Hanbury (LINKS) en Kate (REGS), die hertogin van Cambridge, gesels met prins William toe hulle nog vriende was. Foto: Gallo Images/Getty Images

“Die lojaalste vriende staan agter haar, maar ander nie. Dis vir haar moeilik om skielik die onderwerp van bespreking op almal se lippe te wees.”

Om dinge te vererger is sy op Houghton Hall se amptelike Instagramblad aangeval. Van Mei tot September elke jaar gooi die landgoed op sekere dae sy hekke oop vir die publiek, wat dan in die tuine en sekere dele van die imposante herehuis kan wandel.

Internetboelies het kwaadwillige boodskappe langs foto’s van Rose geplaas, maar dit is sedertdien verwyder.

William is glo “dronkgeslaan” deur die uitval en “het aanvanklik nie geweet of hy bekommerd of geamuseer moet wees nie”, het ’n bron aan die Daily Express gesê.

Die hertog het toe besluit om in te gryp.

“Hy wou help vrede maak omdat hy en Kate afsprake met Rose en David geniet het, en William kom baie goed met hulle oor die weg,” het ’n bron aan Daily Express gesê.

Hulle woon naby mekaar en het baie gemeenskaplike vriende.

“Maar Kate het dit duidelik gemaak sy wil hulle nie meer sien nie, ten spyte van hul sosiale status.”

Dit is duidelik dat Rose, eens die “Queen Bee” van die glansryke groep vriende, nou heel­temal uitgesluit is.

Rose en Kate het glo albei regsoptrede oorweeg toe die ongegronde gerugte van ’n affair die Britse media haal.

“Maar nie een van die berigte kon bewys waaroor die sogenaamde vete gaan nie,” sê die koninklike skrywer Richard Kay.

“Hulle het dus besluit om dit te ignoreer.”

Maar waar Kate met haar koninklike pligte voortgaan en soos altyd glansryk en bedaard lyk, sukkel Rose glo om kop bo water te hou; haar eens idilliese bestaan lyk nou wankelrig.

Sy was voorheen by die modelagent­skap Storm, wat Kate Moss ontdek het, en het kortliks as ’n politieke navorser vir die Konserwatiewe Party-parlementslid Michael Gove gewerk.

Sy het blou bloed in haar are: Haar ouma aan vaderskant, lady Rose Lambert, was ’n strooimeisie op koningin ­Elizabeth se troue in 1947.

Rose en David is in Junie 2009 ná ’n “kort verlowing” in die Chelsea-stadsaal in Londen getroud, wat dié in deftige kringe verstom het, berig Hello!

“Hulle het in Junie 2009 hul verlowing aangekondig; die volgende dag is bekendgemaak sy is swanger en ’n dag later was hulle getroud,” het die publikasie berig.

Rose was vier en ’n half maande swanger met hul tweeling, en ná die seuns se geboorte het sy haar aan haar gesin, man se landgoed en sosiale lewe gewy.

Nou is sy ’n eensame figuur en woon sy in ’n betreklik beskeie woonstel op die eiendom terwyl haar man ’n swierige bestaan in Parys voer, word berig.

“David is meer weg van die huis as tuis,” sê ’n vriend.

“Sy afwesigheid dra net by tot die gissings.”

Rose op die onlangse staatsbanket vir pres. Donald
Rose op die onlangse staatsbanket vir pres. Donald Trump. Die oë het gerek omdat sy nie haar trouring gedra het nie. Foto: Gallo Images/Getty Images

The Mail on Sunday het berig David bly by sy beste vriend, Francois-Marie Banier (71), ’n man met ’n kleurryke verlede.Hy was hegte vriende met Liliane Bettencourt, die oorlede L’Oréal-erfgenaam, wat hom die hoofbegunstigde in haar testament gemaak het.

Liliane se dogter het in 2007 ná haar ma se dood ’n strafregtelike klag aanhangig gemaak en Francois-Marie daarvan beskuldig dat hy haar “swakheid misbruik” het. Die hof het hom met sowat R5,8 miljoen beboet omdat hy die erf­genaam bedrieg het.

Hy het nogtans weer op sy voete geland en besit ’n pragtige huis in Parys en ’n plattelandse woning in die suide van Frankryk; David is ’n gereelde gas by albei blyplekke. Hy en Francois-Marie is ook sake­vennote en bestuur saam eiendoms- en  landboumaatskappye.

Intussen woon sy gesin aan die ander kant van die Engelse kanaal en dit lyk of sy vrou haar trouring afgehaal het.

Ná die Trump-banket is gegis Rose maak ’n stelling deur nie haar trouring te dra nie, maar of daardie stelling gemik was op haar dwalende eggenoot of op Kate, bly ’n ope vraag. Een ding is seker: Die onenigheid in die Turnip Toff-kringe is nog lank nie verby nie.

BRONNE: DAILY MAIL, MAIL ON SUNDAY, DAILY EXPRESS, TOWN AND COUNTRY, THE SUN, INTERNATIONAL BUSINESS TIMES
Kom neem deel aan die gesprek

Volg Huisgenoot op InstagramTwitterFacebookWhatsApp en teken gerus in op ons nuusbriewe.