Emmanuel, wat onlangs as dr. Sergio de Freitas in die hospitaaldramareeks Binnelanders op kykNET te sien was, het die goeie nuus in die sosiale media gedeel dat Sharlene swanger is met 'n dogtertjie.
“ ’n Klein bietjie kamera-sku, anders as haar pa. Sien jou in Februarie, klein engel,” het Emmanuel op Instagram by ’n sonarfoto geskryf.
Die toekomstige ouerpaar het die goeie nuus al in Junie uitgevind, maar het dit eers vir hulself gehou. Sharlene het ’n goeie swangerskap tot dusver gehad, vertel Emmanuel.
“Sharlene is nou sewe maande swanger. Sy ervaar maar net die gewone dinge wat met swangerskap kom, soos moegheid. Sy wou ’n dogtertjie gehad het en ek wou graag ’n seun gehad het. Bloot vir die Castis-naam se onthalwe,” verklap die akteur.
“Maar ek wou nog altyd ’n pa van ’n dogtertjie gewees het,” voeg hy by.
Sharlene se dogter uit ’n vorige verhouding, Anthea, borrel behoorlik van opwinding oor haar kleinsus wat op pad is.
“Sy kan nie wag vir die baba om te kom nie. Wanneer sy na haar suster verwys, praat sy van ‘ons baba,’ ” vertel Emmanuel.
Hul kleinding se naam is ook reeds gekies, maar Emmanuel en Sharlene sal dit eers verklap wanneer sy in Februarie haar opwagting maak.
“En die trouplanne moet ook eers wag tot ons klein mensie hier is,” laat Emmanuel hoor.
Teken in en kry onbeperkte toegang tot 11 Afrikaanse tydskrifte en 35 koerante. Alles op een plek.
KIES JOU PAKKET
