Die egpaar, wat in Februarie uitgevind het dat die ooievaar hulle later vanjaar gaan besoek, kan nie meer wag vir hul dogtertjie se koms nie, maar dit was ’n moeilike pad tot hier, vertel die aktrise aan Huisgenoot. 

"Ek en Willem het redelik lank gevat om swanger te raak. Dit het sowat 26 maande geneem en was ’n ongelooflike moeilike en swaar proses. Nie heel van die begin af nie, maar eers later," sê Erica. 

View this post on Instagram

Ons. Erens by n uitkyk punt.waar daar mense spring.in die ewige blou van die oseaan. in. a leap of faith. Kroasië. Junie 2018.

A post shared by Erica Wessels (@ericawes_) on

Die aktrise sê nadat jy ’n jaar lank normaal probeer swanger raak, begin jy later ’n bietjie te wonder en raak bekommerd.

"Dit neem toe met elke afspraak by die ginekoloog, statistieke oor fertiliteit en ouderdom asook elke maand se onsuksesvolle probeerslae," vertel sy.

"Voor jy weet, is jy baie onseker van jouself as vrou en hoekom ons ook nie blessed word nie. Ons het dus elke toets moontlik gedoen en hulle kon niks fout vind nie, behalwe natuurlik my ouderdom," vertel Erica.

Dit was ’n donker tyd vir die aktrise wat al te sien was in die gewilde SABC 2-dramareeks Erfsondes en die kykNET-regsdrama Fynskrif. 

"As daar mense daar buite is wat ook al lank wag, seer is en nie verstaan hoekom hulle maand ná maand teleurgestel word nie, daar is hoop! Jy is ook nie alleen nie al voel dit so," sê sy. 

Sy en Willem het op die ou end mediese hulp gekry, maar bo en behalwe dit glo sy dit was tyd vir ’n totale wonderwerk van God af.

"’n Mens verstaan nie altyd die konsep van tydsberekening nie, maar nou weet ek elke hartseer oomblik het my kosbare lewenslesse geleer oor oorgawe, vertroue, aanvaarding, visualisasie en om te glo," sê Erica. 

Die aktrise is nou 21 weke swanger. Sy het op 13 weke uitgevind hulle verwag ’n dogtertjie. "Noudat ek weet dis ’n dogtertjie hou ek nogals van mooi kleertjies aanlyn koop en ons begin speel met die idee van ’n paar name," vertel sy.

Volgens Erica was haar eerste trimester baie rof. 

"Ek was so siek soos ’n hond en het selfs een aand in die hospitaal geëindig weens braking. Ek het toe oorleef van droë soutbeskuitjies, Bovril, Coca-Cola en so nou en dan ’n stuk roosterbrood met kaas."

Maar op 11 weke het dinge handomkeer vir haar verander. 

"Ek het beter begin voel en ’n enorme eetlus het gevolg, sowel as ’n konstante scary sugar craving. My tweede trimester gaan goed tot dusver. Ek het energie, eet alles, tel mooi gewig op en geniet die proses soveel meer," vertel sy trots. 

Erica en Willem het in 2016 afgehaak. Die twee het onlangs op die prentjiemooi La Digue-eiland in die Seychelles uitgespan.

Die aktrise sê al kan sy nie op die oomblik werk nie, mits dit ’n kortfilm of klein rolletjie is nie, fokus sy op stemwerk vir radio en televisie. Maar die grootste rol waarna sy uitsien is natuurlik dié van ma.