Die hertogin van Sussex se man, prins Harry (34), voel verantwoordelik omdat sy vrou, wat tans swanger is met hul eersteling, "erg stres" oor al die kritiek wat sy van die publiek kry, sê ’n koninklike bron aan die Amerikaanse tydskrif US Weekly. 

"Meghan het 'n groot opoffering gemaak om te trek – weg van haar ma en vriende,” sê die bron in die binnekring. 

"Om in die koninklike familie in te trou is nie naastenby so glansryk soos dit lyk nie, so in baie gevalle voel Harry verantwoordelik vir Meghan wat so ellendig voel,” sê die bron.

Harry vat elke aanval op die swanger Meghan "baie persoonlik" op, sê die ingeligte.

"Hy wou Meghan al telkemale in ’n verklaring verdedig om die valse gerugte aan te spreek, maar hy is aangeraai om dit nie te doen nie.” 

Ná hul verlowing in November 2017 en hul troue in Mei verlede jaar haal Meghan gereeld hoofopskrifte en nie al die stories is positief nie.

Daar word beweer sy is glo moeilik om mee te werk en haar vervreemde pa, Thomas Markle (74), en suster, Samantha Markle (54), spoel gereeld hul mond in die media uit oor Meghan.

Daar is selfs gerugte dat die hertogin van Sussex en haar skoonsuster, Kate (37), ook nie langs een vuur sit nie.

Meghan, wat roem verwerf het as Rachel Zane in die regsdrama Suits, is gewoond daaraan om op Twitter of deur 'n woordvoerder te reageer op enige omstredenheid of kommentaar, het nog ’n bron al vertel.

"Dit vat 'n ruk vir Meghan om gewoond te raak daaraan dat die paleis betrokke is by haar lewe en dat hulle nou haar openbare beeld bestuur. Maar sy word nou eindelik gemaklik daarmee en vertrou dat hulle haar beste belange op die hart het,” sê die bron.  

Nie al haar werkers by die paleis dink egter die hertogin van Sussex is 'n kwaai katjie nie. 'n Ander bron het gesê Meghan se personeel hou eintlik baie van haar en vind haar idees en entoesiasme opwindend.

Bronne: USWeekly, Mirror