Sy het ’n punt in haar lewe bereik waar sy op haar laagste was.

Rozanne het een oggend opgestaan en ’n foto van haarself geneem om die draaipunt in haar lewe te onthou. Die punt waar sy die besluit geneem het om terug te veg.

En vandag lyk en voel sy beter as ooit. 

Rozanne het Sondagoggend ’n hartroerende boodskap op Instagram en Facebook gedeel en ’n foto geplaas wat op 26 Februarie 2018 geneem is.

Volgens die inskrywing was dit die laagste punt wat sy in haar lewe bereik het.

Die televisieprogram waarvoor ek gewerk en baie geniet het, se kontrak is nie hernu nie en my hart was gebreek. My hare het uitgeval en ek kon nie meer die gesig in die spieël verdra nie.

Die boodskap lees: “Hierdie foto is op 26 Februarie vanjaar geneem. Ek het geweet ek moet die oomblik vasvang, want dit was die laagste punt wat ek in my lewe bereik het.

Ek het ’n pragtige, gesonde babadogtertjie gehad wat nie wou slaap nie en sy het met koliek gesukkel. My driejarige se potjiedissipline en gedrag by die skool het verswak.

Dit het gevoel asof ek elke liewe dag as ’n ma misluk het.

"Ons geliefde baba-oppasser, wat vandat James agt weke oud was deel was van ons gesin, was besig om weens tuberkulose te sterf. Die televisieprogram waarvoor ek gewerk en baie geniet het, se kontrak is nie hernu nie en my hart was gebreek. My hare het uitgeval en ek kon nie meer die gesig in die spieël verdra nie.

"Ek het altyd gedink ek moet sterk wees en dinge op my eie doen. Dit het maande lank aan my gevreet.

"Op hierdie dag het ek besluit om hulp te vra en my hele lewe het verander.

"Met die ondersteuning van Chris, my ma en ’n handjie vol goeie vriende het ek dit deur hierdie donker tyd gemaak en kan ek nou na hierdie foto kyk en besef hoe ver ek gevorder het.

"Ek moet steeds elke dag ’n besluit neem om op die positiewe te fokus. Deur weer te begin oefen en gesond te eet, het ’n groot verskil gemaak.

"Moenie alleen ly nie. Kry hulp. En moenie alles glo wat jy op The Gram (Instagram) sien nie. Dankie, Jo Lurie (van #TheGramSham), dat jy ons aanmoedig om die werklikheid ook te deel.”

Rozanne het aan Huisgenoot gesê sy voel goed en is dankbaar vir die dag toe sy by haar dokter gesit “en net begin huil” het.

“Toe ek praat oor hoe ek voel, kon ek op die positiewe begin fokus. Ek het my hare gesny (een van die beste besluite van my lewe), ek het beter begin eet, weer begin oefen en met die mense om my begin praat oor my gevoelens,” vertel sy.

Sy glo dit is veral die sosiale media wat ’n mens se selfbeeld kan onderkry.

“So baie mense dink dit wat ons op Instagram plaas, is die waarheid, maar dit is nie altyd hoe dinge in die regte lewe is nie.”

Sy glo daarin om oop en eerlik in die sosiale media te wees en deel graag foto’s oor die vordering wat sy in haar oefenroetine maak.

 Rozanne en haar man, die musikant Chris Bishop, het twee kinders. Haar seuntjie, James, is drie jaar oud en haar dogtertjie, Fallon Ann, nege maande.