MELANIE DU BOIS

Die Arendsvlei-aktrise en haar dogter, Roxy (13), het groot pret tydens die inperking. 

“Wanneer sy nie by die skool is nie, kyk ons Netflix, gaan stap of sy ry skaatsplank,” vertel Melanie, wat onlangs weer as Felicity in die sepie 7de Laan 'n draai gemaak het.

Sy hou van gesprekke voer met haar dogter. “Sy het baie sterk menings en oortuigings. Ons stem nie altyd saam oor alles nie, maar ek hou van die feit dat sy altyd dinge wat normaal is, bevraagteken.”

“Ek sien baie van my eie persoonlikheid in Roxy. Sy is sag maar ook baie hardkoppig, nes haar ma,” laat Melanie hoor. 

SUE DUMINY

Sue en haar dogtertjies, Isabella (5) en Alexa-Rose (2), is omtrent bedrywig tydens die inperking.

Hulle kweek tot groente! 

View this post on Instagram

A day in the life... ????

A post shared by Sue Duminy (@sueduminy) on

“Elke dag is verskillend, en ons het nie regtig ’n roetine nie. Ons doen skoolwerk, maak lekkernye in die kombuis, gaan stap of kyk flieks,” vertel Sue oor haar en haar man, die krieketheld JP Duminy, se kroos.

“Hulle is baie volwasse vir hul ouderdomme, so ek geniet die gesprekke – veral wanneer ons oor die gevare van tsoenami’s praat en Bella, met ’n ernstige gesig, dit ‘salami’s’ noem.” 

View this post on Instagram

My kroos??????

A post shared by Sue Duminy (@sueduminy) on

Al is Isabella en Lexi baie verskillend, sien Sue tog van haarself in albei dogtertjies. 

“Isabella is baie sag en sorgsaam, terwyl Lexi ’n behoorlike tomboy is en vir niks bang is nie. Ek vang gereeld vir Isabella waar sy iets sê, en dan dink ek ‘dit het nou nes ek geklink’,” laat sy hoor. 

HILDEGARDT WHITES

Die 7de Laan-aktrise Hildegardt Whites se seuntjie, Miles (3), volg deesdae in sy beroemde ma se voetspore. 

Hildegardt en Miles. Foto: Verskaf
Hildegardt en Miles. Foto: Verskaf

Klein Miles het onlangs sy TV-debuut gemaak – en dit nogal in Hillside! Hy was in die sepie te sien as Willem (Markus Haywood) en Felicity (Melanie du Bois) se seuntjie, Ethan.

Tuis geniet ma en seun dit om legkaarte te bou of saam te sing. “Hy hou ook daarvan om te verf en te bak. Sy gunsteling om te maak is pannekoek,” sê Hildegardt.

Hildegardt het met broers grootgeword; daarom geniet sy dit om ma te wees vir haar en haar man, die musikant Kuba Silkiewicz, se seuntjie.

“Ek was die enigste dogter in die huis, so ons het maar rof gespeel. Nou speel ek en Miles baie lekker," vertel Hildegardt.

“Een van my gunstelingdinge is wanneer ek my nou ’n bietjie op-dress en grimering aansit, dan sê hy vir my: 'Ag mamma, you look so beautiful’. Dis nogal oulikies. Seuntjies sê dit so mooi vir ’n mens.” 

ROXY BURGER

Die TV-aanbieder Roxy Burger word in Oktober die tweede keer ma.

Roxy deel gereeld foto's van haar eersteling, Adrienne Zoey (2), op Instagram. Ma en dogter pryk tot in bypassende uitrustings. 

“Tydens die inperking was ons gunstelingding om ’n danspartytjie met Lady Gaga se nuwe album te hou,” sê Roxy.

Roxy vertel aan Huisgenoot dat sy dit geniet om mamma te wees vir ’n klein dogtertjie. 

“Ek sien dit as ’n geleentheid om ’n sterk, etiese, bedagsame kind groot te maak wat een dag ’n verskil kan maak. Ek sien baie van myself in haar. Sy is beslis ’n wilskragtige kind,” voeg sy by. 

CHARLIZE BERG

Die sangeres Charlize Berg en haar dogtertjie, Aleiah-Rose (2), hou daarvan om tydens die inperking na musiek te luister, boek te lees of te verf. 

“Ek probeer maar om Aleiah te stimuleer. Sy is ’n regte busy meisie,” vertel Charlize. 

Die sangeres is mal daaroor om ’n “dogtertjie-mamma” wees.

“Aleiah is my spieëlbeeld. Ek love die baie pienk, die cute outfits en die ponytails,” lag sy. 

“Ek sien vreeslik baie van haar in my. Haar persoonlikheid is baie soos myne. Sy is vol energie en nie bang om haar stembande te gebruik nie,” terg sy.