Waar jy ook al in die land woon, kan uiterste weerstoestande soos storms, koue en brande groot skade aan jou huis aanrig. Maar hoe eis jy vir meubels wat beskadig word weens ’n dak wat lek? Val dit onder gebouversekering of huisinhoudversekering?

Ons kyk na van die algemeenste eise weens winterweerskade en hoe jy kan seker maak alles is behoorlik gedek en hoe om te verhoed dat jou eis dalk misluk.

O WEE, DIE REËN

Dekking teen waterskade vir jou gebou en huisinhoud soos meubels weens ’n lekkende dak of oorstromings is gewoonlik standaard in polisse.

Die dak as deel van jou huis se struktuur word onder jou gebouversekering gedek. Jou meubels val onder jou huisinhoudspolis.

Maar onthou: Versekerings­maatskappye vereis dat jy jou huis struktureel goed in stand hou om moontlike skade te verhoed. As die assessor vasstel jou dakteëls was los en jou geute verstop, sal jou eise dalk afgekeur word.

Instandhouding bly te alle tye die verantwoordelikheid van die polishouer. Jou huis moet minstens teen gewone reënval bestand wees.

DIT BARS VAN DIE KOUE

  • Geisers of pype wat weens kwaai koue bars, is algemeen in die winter. Skade aan jou geiser, pype en plafon sal onder jou gebouversekering en water­skade aan meubels of matte onder huisinhoud gedek wees.
  • Vloer- en muurteëls wat weens koue kraak en lig, is ook ’n winterprobleem. Maar as die versekeraar in sy onder­soek bevind die werklike oorsaak was swak vakman­skap, kan die eis misluk.

AS VLAMME VERSWELG

Dekking teen verlies of skade weens ’n brand is gewoonlik standaard in huiseienaars- en huisinhoudsversekering. Maar daar kan voorwaardes en uitsluitings wees.

Weerlig

Omdat rietdakke en houtstrukture hoër brandrisiko’s inhou, kan dit ’n vereiste wees dat jy ’n weerligafleier aanbring en ’n brandblusser in jou huis het. Dit kan ook vir grasdaklapas geld. Doen jy dit nie, kan die versekeraar weier om vir brandskade te betaal.  

In hoërisikogevalle soos grasdakhuise in ’n streek waar weerlig dikwels voorkom, kan jou polis brandskade weens weerlig heeltemal uitsluit. As jy in ’n grasdakhuis bly, maar dit nie in jou polisaansoek sê nie, kan jou eis misluk omdat die versekeraar nie bewus was van al die risiko’s nie.

Verwarmers

Gastoestelle en kaggelvure hou brandrisiko’s in. As die brandskade deur nalatigheid veroorsaak is of jy kom nie versekeringsvereistes na nie, kan die versekeraar weier om uit te betaal.

Jy moet ingevolge die wet  ’n nakomingsertifikaat (Certificate of Conformity for Gas Appliances) vir gastoestelle hê wat in jou huis geïnstalleer word. Dié sertifikaat bevestig die installering is gedoen deur iemand wat by die Veiligheidsvereniging vir Vloeibare Petroleumgas van Suider-­Afrika (LPGSASA) geregistreer is.

Doen jy dit nie en jou huis brand weens byvoorbeeld ’n gaslekkasie, sal jou eis waarskynlik misluk.

As jou skoorsteen nie in stand gehou is nie en daar was blare, takke, voëlneste of ander dinge in wat weens vonke van die vuur ’n brand veroorsaak het, kan die ver­sekeraar bevind jy was nalatig en nie betaal nie.

Onthou: Versekeraars kan jou eiendom inspekteer om te sien of die polisvoorwaardes nagekom is.

ONWEERSWINDE WAAI

Die mure om jou erf val onder jou gebouversekering. Dit behoort teen waterskade en wind gedek te wees mits jy die boureëls nagekom het.

As jy byvoorbeeld ’n baksteen­muur het, maar die bouwerk voldoen nie aan die bouregulasies nie, of jy het nie ’n behoorlike fondament gegrawe nie om geld te bespaar en die wind waai jou muur om, sal die versekeraar waarskynlik bevind jy was nalatig.

Wenk

Moets vir eise

  • Maak ’n omvattende lys van die beskadigde items.
  • Neem foto’s van die skade vir waardasie.
  • Laat weet jou makelaar of versekeraar binne die sperdatum vir eise in jou polis; gewoonlik binne 30 dae ná die voorval.

MAAK SEKER ALLES IS VIR DIE REGTE BEDRAE VERSEKER  

’n Algemene probleem rondom water- én brandskade is wanneer jou huis of die huisinhoud nie teen die regte vervangings­waarde verseker is nie. Party mense verseker dit teen ’n laer waarde om laer maandelikse premies te betaal.

Maar as die bedrag van die versekerde waarde laer as die ware vervangingswaarde is, sal die versekeraar net proporsioneel uitbetaal.

So waarsku Ayanda Mazwi, die se­nior assistent-ombudsman vir korttermynversekering (Osti), in die jongste Osti-jaarverslag.

Byvoorbeeld: Gestel dis teen R400 000 verseker, maar die vervangingswaarde is eintlik R500 000. Dan sal net 80% van die skadebedrag uitbetaal word.

Kom neem deel aan die gesprek

Volg Huisgenoot op InstagramTwitterFacebookWhatsApp en teken gerus in op ons nuusbriewe.

Stuur voorstelle en versoeke na geldsake@huisgenoot.com. E-pos sal sover moontlik in die rubriek beantwoord word en nie persoonlik nie.