Ter illustrasie. Foto: Gallo Images/Getty Images
Ter illustrasie. Foto: Gallo Images/Getty Images

Boonop maak tegnologie nou buigsamer werkgeleenthede moontlik en dié geleenthede neem elke jaar toe. Statistieke SA se werkvooruitsigtestudie het reeds in 2018 getoon dat tydelike indiensneming van 2,6 miljoen in 2017 tot 3,9 miljoen in 2018 gestyg het.

Ongelukkig versuim talle mense om hul versekeringsmaatskappye in te lig as hulle ook tuis ’n inkomste verdien; daar is ’n verskil tussen jou persoonlike huisinhoud- en sakeversekering.

Ons bekyk die ses belangrikste vrae.

Wat is my verantwoordelikheid?

Jy moet verklaar dat jy ’n tuisonderneming het, want die versekeringsmaatskappy moet weet hoe groot jou risiko vir verliese is weens ’n moontlike brand of inbraak. Dit is dan die versekeraar se besluit om die risiko te aanvaar, en teen watter bepalings.

As jy byvoorbeeld meubels maak en vlambare materiaal tuis berg, sal jou versekeraar dalk eis dat jy sekere brandvoorsorgmaatreëls tref alvorens jy gedek word. En word jou toerusting gesteel, kan jou eis dalk misluk as jy nie alles verklaar het nie.

Moet ek ’n nuwe polis uitneem?

Nie noodwendig nie, want sekere dinge sal heel waarskynlik wel onder jou huisinhoud gedek word. Maar dit bly belangrik dat jy jou tuisonderneming verklaar, want dan sal die versekeraar vir jou kan sê of ’n sakepolis vir jou beter sal werk of jou raad gee as jy net sekere ekstra dekking opsioneel kan uitneem.

Wat van my toerusting?

Die meeste versekeringsmaatskappye sal toerusting soos rekenaars, drukkers en lessenaars onder jou huisinhoudversekering dek mits jy dit privaat aangekoop het. Maar baie versekeraars het ’n limiet van byvoorbeeld R2 000 of R2 500 op items in jou huisinhoudversekering. Om vir die volle waarde van items soos byvoorbeeld staanrekenaars (“desk PC’s”) vergoed te word, sal dit moontlik beter wees om dit onder sakedekking te laat lys. Vra jou versekeraar hieroor.

  • Skootrekenaars, fone en tablette, dus toerusting wat jy uit jou huis kan dra, word gewoonlik nie onder jou huisinhoud gedek nie. Jy moet dit afsonderlik onder allerisikodekking verklaar.
  • Ander toerusting vir jou tuisondermening, soos houtwerk- of naaimasjiene, word gewoonlik nie onder huisinhoud gedek nie. Verklaar dit dus eerder sodat jou versekeraar besluit hoe dit gedek sal word. Verklaar jy nie jou tuisonderneming nie en byvoorbeeld drie naaimasjiene word gesteel, kan jou eis misluk.
  • Die verlies van data en ander sagteware word gewoonlik ook nie onder huisinhoudversekering gedek nie. As data en sagteware uiters belangrik is vir jou onderneming, vind uit of jy opsionele dekking daarvoor kan kry of neem liewer sakeversekering uit.

Wat van voorraad by my huis?

Die meeste persoonlike versekeringspolisse bied nie outomaties dekking vir die voorraad van ’n tuisonderneming nie, byvoorbeeld die hout vir meubels of al die kinderspeelgoed wat jy verkoop. Dis gewoonlik opsioneel; dus moet jy daarvoor vra. Jy sal ’n ekstra premie daarvoor betaal en daar sal ’n vasgestelde dekkingsperk wees, soos R25 000 per voorval.

Die voorraad is gewoonlik net gedek terwyl dit in jou huis is en waarteen jy dit spesifiek verseker het, soos brandskade.

Wenk: Versekeringsmaatskappye se definisie van ’n tuisonderneming verskil. Sekeres het spesiale dekking vir spesifieke tuisondernemings. Vra ’n korttermynversekeringsmakelaar ’n behoeftebepaling. Hulle kan bepaal wat jou risiko’s is en watter dekking jy benodig. Kry altyd ’n tweede of selfs derde mening voor jy die beste opsie vir jou kies.

Hoe werk dinge met my motor?  

As jy jou motor vir sakedoeleiendes gebruik, moet jy dit aan jou versekeraar verklaar. Die vereistes vir voertuie se sakegebruik verskil onder versekeraars, maar oor die algemeen moet voertuie wat voorraad, passasiers, werknemers of saketoerusting vervoer deur ’n sakepolis gedek word.

Dié polis sal jou derdeparty-, diefstal- en branddekking gee en kan jou voorraad dek as jy tydens die ongeluk ’n voorraadverlies ly.

As jy in ’n ongeluk is tydens ’n sakebesoek – soos wanneer jy ’n bestelling aflewer – sal jou persoonlike dekking dalk nie uitbetaal nie. Selfs as jy net ’n saamryklub werk toe het, maar jy bestuur altyd en jou motor word gebruik terwyl jou kollegas wat saamry jou vergoed, moet jy sakeversekering hê.

Wat van dekking indien ek gedagvaar word?

Wat sal gebeur as ’n kliënt by jou huis seerkry? Of jy gee tuisonderrig en een van die leerders word beseer? Of iemand koop jou tuisgebak en kry voedselvergiftiging?

Hulle kan ’n aanspreeklikheidseis teen jou indien. Jou persoonlike versekering het gewoonlik nie aanspreeklikheidsdekking wat verband hou met jou onderneming of beroep nie.

Aanspreeklikheidsdekking kan apart uitgeneem word. Dit is belangrik as jy dikwels mense op jou eiendom het, byvoorbeeld as jy ’n skoonheidsalon of kleuterskool het.

Kry hier nog raad